1 Timoteo 6 - Nuevo Testamento Tzeltal de Amatenango

¹ Spisil te machꞌatik ayik ta mosoile ya me skꞌan ya yakꞌik ta jkuenta te yajwalike, yuꞌun jich me makꞌ xꞌalbot ma tsaꞌamuk skꞌoplal sbiil a te Diose ni te tut ya kakꞌtik ta nopele.

² Teme ay te abatetik te xchꞌuunej Dios te yajwale, ma me xyijkitayik ta yakꞌel ta jkuenta te yajwale yuꞌun te yermano sba ta xchꞌuunel te Diose. Jaꞌ ya skꞌan te kꞌax jich ya yakꞌ sbaik ta mantaltesele. Porke te machꞌa ya xꞌabatinotik yuꞌune, jaꞌ xchꞌuunej Dios sok yermano sbaik te kꞌux ya yaꞌiy sbaike. Jich me xꞌawakꞌ ta nopel, sok jich me xꞌawalbey yaꞌiyik.

Ya skꞌan te junuk koꞌtantik ta xchꞌuunel te Diose

³ Teme ay machꞌa yan tut ya snojpeswane y teme ma pajaluk sok te lekil nojpesel yuꞌun te Kajwaltik Jesucristoe, sok teme ma jaꞌuk te tutꞌil jchꞌuunejtike,

⁴ jaꞌ jun toybajel te maꞌyuk tut ya snaꞌe. Jaꞌ nax baem ta yoꞌtanik puru kꞌopetik skuenta tsalawe jich tutꞌil jun chamel, y tey ya xtal a te il-oꞌtantawaneje sok pleto y toybael y te ma junuk yoꞌtanike.

⁵ Ya sjajchesik te pleto te maꞌyuk slajibal sok te gente te ma tsaꞌamuk spensarik y ma snaꞌojuk te tut batsꞌi jiche. Ya skuyik ta snegosioik te tut xchꞌuunejike. Ma me ajoyin aba sok te machꞌatik jich ayike.

⁶ Batsꞌi jich te jaꞌ jun mukꞌul kꞌulejalil te tut jchꞌuunejtike, pero jaꞌ nax teme jun koꞌtantik yuꞌun te tut kichꞌojtike.

⁷ Porke maꞌyuk tut kichꞌojtik tal liꞌ ba balmilale, y maꞌyuk tut ya xjuꞌ ya kichꞌtik bael.

⁸ Jich yuꞌun teme ay tut ya jweꞌtike y sok teme ay jkꞌuꞌ-jpakꞌtike, junuk me koꞌtantik yuꞌun.

⁹ Yan te machꞌatik ya skꞌan xkꞌulejibe, ya xyalik ta mulil y ya me xkꞌo yaluk ta strampa. Bayal tut ya xbikꞌtaj yoꞌtan yuꞌun te tut ma xtuune sok te ya xꞌixlanot yuꞌune. Ya me xmetꞌot te gente yuꞌun y sok chꞌayel ya xbajtik yuꞌun.

¹⁰ Porke te skꞌupinel te takꞌine jaꞌ me te ya xlijk spisil ta jkaj te tut ma lekuke. Y ay machꞌatik ta skaj sbikꞌtal yoꞌtan yuꞌun takꞌin te la xchꞌayikix te xchꞌuunel yoꞌtanike. Y la staix bayal swokolik sok te xkuxlejalike.

Ya me xjuꞌ kuꞌuntik ta skuenta te xchꞌuunel koꞌtantike

¹¹ Pero te jaꞌate, te swinikat te Diose, xiꞌan me yuꞌun ta spisil to. Tojuk me xbaat sok te akuxlejale ta snaꞌel te Diose. Ayuk xchꞌuunel awoꞌtan, sok xkꞌuxul awoꞌtan, sok jun awoꞌtan, sok chꞌin me xꞌawakꞌ aba.

¹² Ma me akoles ta akꞌab te kuxlejal sbajtel kꞌinale. Yuꞌun jaꞌ a yikꞌat Dios yuꞌun, te kꞌalal la awalix ta jamal ta sit te bayal testigoetike te tutꞌil achꞌuunej te Diose.

¹³ Te ora to, ya jpasat ta mantal ta stojol te Diose, te ya yaꞌbe xkuxlejal spisil te tutik aye, y ta stojol te Jesucristoe te jich jamal a yal sba euk ta sit te Poncio Pilatoe.

¹⁴ Ya kalbeyat te ya me achꞌuun te tut ya jpasat ta mantale, ma me ayanutes. Sok jich me ya apas jaꞌ to teme tal te Kajwaltik Jesucristoe.

¹⁵ Te Dios ya me yakꞌ taluk te kꞌalal ya sta yorail yuꞌun. Porke jaꞌ úniko stukel, y ben tsaꞌam ay spoder, Rey yuꞌun te reyetike, y Ajwalil yuꞌun te ajwaliletike.

¹⁶ Stukel nax stalel ay, te ay ta jun sakil kꞌinal, te maꞌyuk machꞌa ya xtijilaj aye. Ni jtuluk winik yiloj ni ma sta ta ilel. Stukeluk me sil tiempo ya xꞌakꞌot ta jkuenta y sil tiempo ay ta ajwalinel. Jichuk.

¹⁷ Te machꞌatik ay skꞌulejalik liꞌ ba balmilal to, altalanbeya te makꞌ me stoy sbaike yuꞌune. Ni ma me wakꞌ smukꞌulin yoꞌtan te skulejale, porke te kꞌulejalile ma segurouk ay. Jaꞌ lek te jaꞌ ya smukulin yoꞌtanik te Dios te kuxul stukele, te stukel ya yaꞌbotik spisil te tutik ya xtuun kuꞌuntike sok te tutik ya jkꞌupintike.

¹⁸ Altalanbeya te lekuk me te tut ya spasike. Jaꞌuk me ya xkꞌulejibik yuꞌun te lekil aꞌtele. Y junuk me yoꞌtan ya me spuk te tut ay yuꞌunike.

¹⁹ Jich me ay skꞌulejalik te lek ya xtuun yuꞌunik ta patile, y jich me ya staik te kuxlejal sbajtel kꞌinale.

Slajibal konsejo ta stojol jTimoteo

²⁰ Jaꞌat, jTimoteo, kanantaya me lek te tut kalojbeyate. Ma me awakꞌ achikin a te kꞌopetik skuenta balmilale te ma xtuune, ni te pꞌijil kꞌopetik te jowil nax te kuybil te ya snaꞌbe sluwarile.

²¹ Yuꞌun ay machꞌatik la xchꞌuunikix, sok jich chꞌayix te xchꞌuunel yoꞌtanike. Te Kajwaltike a yaꞌbeyex te slekil yoꞌtan ta akuentaike. Jichuk.