1 Timoteo 5 - Nuevo Testamento Tzeltal de Amatenango

Tutꞌil ya skꞌan te ay sok te hermanoetik

¹ Ma me abal ta utel te mamki viejoe. Lek nax me xꞌatsits jichuk tutꞌil atat. Y jaꞌ nax jich euk te kermetike, jichuk me kꞌoem ta awoꞌtan tutꞌil awijtsꞌinab.

² Te meꞌ-meꞌeletike jichuk me kꞌoem tutꞌil batsꞌil ameꞌ. Y sok te aꞌchetike jichuk me kꞌoem tutꞌil awijtsꞌinab. Lekuk me awoꞌtan ta stojolik.

³ Koltaya te meꞌba antstike te maꞌyuk machꞌa ya xkoltayot yuꞌune.

⁴ Pero teme ay jtul meꞌba ants te ay yuntikil o yil-alatake, ya skꞌan te ya yichꞌ kuentainel yuꞌun te machꞌatik batsꞌi ay yuꞌune. Yuꞌun jich me ya sujtesbot a te tutꞌil ay skꞌuxul yoꞌtan te smeꞌ-statike. Porke jaꞌto jaꞌ lek ta pasel sok lek ya xꞌilot yuꞌun te Diose.

⁵ Yan te meꞌba ants te yal stukel xanix aye, jaꞌ yipinej yoꞌtan te Diose, y ma skom sba ta yalulanbeyel y skꞌoponel Dios ta kꞌajkꞌal ajkꞌubal.

⁶ Pero te meꞌba ants te tey baem yoꞌtan a te tut ya skꞌupin te stiꞌbalule, chamenix sok te xkuxlejale.

⁷ Jich me ya awaltalanbe to, yuꞌun jich me makꞌ ya sta smulik a.

⁸ Yuꞌun te machꞌa ma yajtaluk yoꞌtan te machꞌatik ay yuꞌune y sok spisil te machꞌatik ay yuꞌun ta snae, la sjilesix ta chꞌuunel Dios abi, y mas yesuk ke te machꞌatik ma xchꞌuunejuk Diose.

⁹ Te ba slistaul te meꞌba antstike, jaꞌ nax ya skꞌan te machꞌatik kꞌaxemix sesenta jaꞌbile, sok te jun yoꞌtan a kꞌax sok te jtul smamlale.

¹⁰ Sok ya skꞌan ya xchiknaj te lek yaꞌtel a spase, jich tutꞌil teme lek a stsꞌijtes te yuntikile sok teme lek ya snajkan te machꞌatik ya xkꞌot ta snae, sok teme ay ya spokbe yok te machꞌatik xchꞌuunejix te Diose, y sok teme skoltayej te machꞌatik ay swokolike, sok teme yaꞌtelinej spasel spisil ta jkaj te lekil aꞌtele.

¹¹ Pero ma me wakꞌ ta lista te meꞌba antstik te bikꞌtal toe. Porke te kꞌalal ya xkay ta abiyej te yoꞌtanike te ya skꞌan xnujpunik xane, jaꞌ ya xpitotik lokꞌel yuꞌun ta stojol te Cristoe.

¹² Y ya staix smulik te maꞌ juꞌ yuꞌun te tut yaloje.

¹³ Y ya xlijk snop beral ta nantik, y ya xkꞌay ta chꞌajilal. Y ma jaꞌuk nax te lom chꞌaje, sino ke ya xlijk yal te tut ma tojuke, y tutikuk nax ya xchꞌik sba a, y ya yaltalan te tutik ma lekuke.

¹⁴ Jaꞌ yuꞌun ya jkꞌan te ya xnujpun xan te meꞌba antstik te bikꞌtal toe. Jaꞌ lek ayuk yuntikil, sok yauk skanantay te snae, y ma me wakꞌ yaꞌbe luwar te kꞌopetik yuꞌun te jkontratike.

¹⁵ Yuꞌun ay meꞌba antstik te la spit sbaikix lokꞌel y jaꞌix stsꞌakliyejik te pukuje.

¹⁶ Te ants o winik te xchꞌuunej Diose, ya skꞌan ya skoltay te meꞌba antstik ta snae, skuenta yuꞌun jich makꞌ me yakꞌ ta wokol a te hermanoetike. Jich te hermanoetik ya xjuꞌ ya skoltay te meꞌba antstik te batsꞌi maꞌyuk machꞌa ya xkoltayot yuꞌune.

¹⁷ Te ansianoetik te lek ya skanantay te hermanoetike, ya skꞌan te kꞌax lek ya xꞌakꞌot ta jkuentae, batsꞌi jaꞌ te ansianoetik te ya yaꞌtelinik yalel te skꞌop Dios sok te ya snojpeswane.

¹⁸ Yuꞌun te Sjun Dios jich ya yal: “Ma me awaꞌbe bosal te wakax te ya stekꞌ te triwue”, xchi me. Y sok ya yal xan: “Te jꞌaꞌtele ya xjuꞌ ya yichꞌ te stojole”, xchi me.

¹⁹ Ma me achꞌuun ta ora teme ya xlebot smul te jtul ansianoe, jaꞌ to teme ay chaꞌtul o oxtul testigoetike.

²⁰ Te machꞌatik ma skꞌan skom sbaik ta mulawe, ya skꞌan ya akomtalan ta sitil komon ta spisil. Yuꞌun jich me ya xiꞌ ekꞌa te yane.

²¹ Ya kalbeyat mantal ta stojol te Diose y sok te Kajwaltik Jesucristoe y sok te angeletik te tsabil yuꞌune: Jich me xꞌapas sil tiempo. Pajal me ya achap ta spisilik.

²² Ma me ayuk machꞌa ya awaꞌbe yaꞌtel ta ora nax teme ma to la yichꞌ nopel ta leke. Yuꞌun jich me makꞌ ya amulinbe smul ekꞌa te yane. Ila me aba yuꞌun spisil te tut ma lekuke.

²³ Ma me awuchꞌix tojol jaꞌ yuꞌun te ayat ta chamel sok te achꞌujte. Uchꞌa chꞌinuk euk te binoe.

²⁴ Ay machꞌatik chikanix ta ilel smulik antes te ya xtalik ta chapele. Pero ay yanetik te ta patil to ya xchiknaje.

²⁵ Jaꞌ nax jich euk, te lekil aꞌteliletike ya xchiknaj ta jamal. Sok te tutik ma chikanuke, ma spas te sil tiempo nakꞌal ya xjile.