1 Timoteo 4 - Nuevo Testamento Tzeltal de Amatenango

Te machꞌatik ya sjilesik ta chꞌuunel te Diose

¹ Pero jamal ya yal te Espiritue: Ta slajibal kꞌaal ay machꞌa ya sjilesik ta chꞌuunel te Diose. Jaꞌ ya xbajt ta yoꞌtanik te skꞌopik jloꞌlawanejetike y te nojpesel yuꞌun te pukujetike.

² Jaꞌ ya yakꞌ ta jkuenta te gente te ma tsaꞌamuk yoꞌtanike y te puro lot ya yalik soke. Kꞌax tulanejemix yoꞌtanik.

³ Jaꞌik ya xkomawanik ta nujpunel sok ay weꞌelil te ya xkomawanik ta tuuntesel te pasbil yuꞌun Dios sok te ya yalbeyik kola yal Dios yuꞌun te machꞌatik ya sweꞌik, jaꞌ bi jaꞌ te machꞌatik xchꞌuunejik Dios sok te ya snaꞌik te tut batsꞌi jiche.

⁴ Yuꞌun lek ay spisil te tut spasoj te Diose, y ma me ayuk machꞌa ya spꞌaj. Jaꞌ nax ya skꞌan te ya kalbetik kola yal a te Diose kꞌalal ya jweꞌtike.

⁵ Porke ya me yichꞌ bendision yuꞌun te skꞌop Diose y sok te skꞌoponel Diose.

Te lekil aꞌtel yuꞌun te Jesucristoe

⁶ Teme jich ya awaꞌbe snoptalan te hermanoetike, jich jlekil jꞌaꞌtelat ya xkꞌoat yuꞌun te Jesucristoe. Sok ya me yipin awoꞌtan te skꞌop Dios achꞌuuneje, y sok te lekil pꞌijutesel te atamoje.

⁷ Pero ma me awakꞌ ta jkuenta te kuentoetik skuenta balmilal te jowil naxe. Kꞌayesa me aba ta xchꞌuunel te Diose.

⁸ Ya xtuun chꞌinuk te ya jkꞌayestik te jtiꞌbalultike; yan te ya jkꞌayes jbajtik ta xchꞌuunel Diose, jaꞌ bayal ya xtuun yuꞌun stukel, porke ay me tut ya jtajtik a yuꞌun te jkuxlejaltik to y sok yuꞌun te jkuxlejaltik ta patile.

⁹ Jaꞌ to batsꞌi jich me, y ya skꞌan ya yichꞌ chꞌuunel.

¹⁰ Jaꞌ yuꞌun ya xꞌaꞌtejotik sok ya jpastik puersa, porke jaꞌ ayotik ta smaliyel te kuxul Diose te jaꞌ jKoltawanej yuꞌun ta spisil, pero ja mero ya xkoltayot yuꞌun te machꞌatik ya xchꞌuunike.

¹¹ Spisil to ya me awakꞌ ta chꞌuunel y ta nopel.

¹² Ma me wakꞌ spꞌajelat yuꞌun te chꞌielat toe. Jaꞌ ya skꞌan ya awakꞌ ta ilel yuꞌun te kermanoetik te tutꞌil lek ya xkꞌopojate y sok te tutꞌil lek ya xꞌaꞌtejate. Sok ayuk me slekil awoꞌtan, sok xchꞌuunel awoꞌtan sok lekuk me te akuxlejale.

¹³ Te jayeꞌ kꞌaal ma to xtalone, oꞌtantaya me yalel ta komon te Sjun Diose. Aꞌbeya me spuersa yoꞌtan te hermanoetike, tsitstalana me.

¹⁴ Ayuk me skꞌoplal awuꞌun te majtaniletik te Dios a yaꞌbeyate, te kꞌalal kꞌopoj ta atojol te jꞌalwanejetik yuꞌun Dios sok te kꞌalal la skajan skꞌabik ta ajol te ansianoetik yuꞌun te hermanoetike.

¹⁵ Nopilana me spisil te tutik la kalbeyatixe, yuꞌun spisil ya me yilik te tutꞌil yipal ta juꞌel awuꞌun te awaꞌtele.

¹⁶ Ila me aba jaꞌat mismo, y sok kuidadoat me yuꞌun spisil te tut ya awakꞌ ta nopele. Junuk awoꞌtan ya me apas spisil. Teme jich ya apase, jaꞌat mismo ya akoltay aba, y jich me ya akoltay euk te machꞌatik ya yaꞌibeyat akꞌope.