1 Timoteo 3 - Nuevo Testamento Tzeltal de Amatenango

Tutꞌil ya skꞌan ya xꞌanin te ansianoetike

¹ Jaꞌ to batsꞌi jich: Teme ay machꞌa ya skꞌan yoꞌtan te ya xꞌaꞌtej ta ansianoile, ben tsaꞌam te aꞌtel te jich ya skꞌane.

² Jich yuꞌun, te machꞌa ya yichꞌ yaꞌtel ta ansianoile, jaꞌ ya skꞌan te makꞌ xmulawixe. Ya skꞌan te jtul nax ants ay soke, sok te sil tiempo kuidado ay sok te yoꞌtane, sok te ma snaꞌ xkꞌajkꞌube, sok te lek ay te xkuxlejale. Ya skꞌan te sil tiempo ya sꞌotseswan ta snae, sok te ay spꞌijil yoꞌtan ya snojpeswane.

³ Sok ma me jyakubeluk, sok ma me kꞌayemuk ta sjajchel pleto. Ayuk me slekil yoꞌtan, chꞌunuluk me, sok ma me yauk skꞌupin takꞌin.

⁴ Ya skꞌan te lekuk ya xmantalaj ta snae, y lekuk ya xchꞌuun mantal te yuntikile, sok yak me xakꞌot ta jkuenta yuꞌunike.

⁵ Porke teme ay jtuluk te ma snaꞌ xmantalaj ta snae, ¿tutꞌil kꞌan juꞌuk yuꞌun skanantayel te hermanoetik yuꞌun te Diose?

⁶ Jaꞌ yuꞌun, te machꞌa ya yichꞌ yaꞌtel ta ansianoile, ma me jaꞌuk te laj to nax xchꞌuun te Diose. Ma me teyuk ya xlijk stoy sba a, y jich ya sta kastigo jich tutꞌil la sta te pukuje.

⁷ Sok ya skꞌan te lek skꞌoplal yuꞌun euk te machꞌatik ma xchꞌuunejuk Diose, yuꞌun jich me makꞌ xtabot ta alel a te yaꞌtele, y sok ma xꞌoch ta strampa te pukuje.

Tutꞌil ya skꞌan xꞌanin te diakonoetike

⁸ Jich mismo te diakonoetike ya skꞌan te jaꞌ te winketik te lek yoꞌtanike, sok te toj ya xkꞌopoje, sok te ma xyakube, sok te ma yauk skꞌupin sloꞌlayel takꞌin.

⁹ Ya skꞌan te jun yoꞌtan xchꞌuunej te batsꞌi jich te tut jchꞌuunejtikixe, sok te ben lek te yoꞌtane.

¹⁰ Nail ya skꞌan ilel teme ya xjuꞌ yuꞌun. Y ta patil teme maꞌyuk palta yuꞌune, ya xjuꞌ ya xtuun ta diakonoil.

¹¹ Jich euk te antsetike ya skꞌan te ya xꞌakꞌawan ta jkuenta sok ma me tojoluk puk-kꞌop-aꞌabiyej. Sok ya skꞌan te kuidado ay sok te yoꞌtanike, sok te jun yoꞌtanik ta spasel te yaꞌtelike.

¹² Te jtul diakonoe ya skꞌan te jtul nax ants ay soke. Y te ya snaꞌ smantaltesel lek te yuntikile y sok spisil machꞌatik ayik ta sna.

¹³ Porke te diakonoetike ya me xꞌakꞌot ta jkuenta teme lek ya spas te yaꞌtelike. Y jich me sok yip yoꞌtan ya xjuꞌ xkꞌopojik, yuꞌun te ay xchꞌuunel yoꞌtan sok te Cristo Jesuse.

Te tut batsꞌi jich te jchꞌuunejtike

¹⁴ Koꞌtanuk te ya xtal kilat ta orae. Pero jich a jtsꞌibabeyat to

¹⁵ yuꞌun teme maꞌ talon ta orae, jich me ya anaꞌ tutꞌ ya skꞌan xꞌaꞌtejat ta stojol te yuntikil te Diose, ja te hermanoetik yuꞌun te kuxul Diose, te jaꞌ ipajem a sok jaꞌ ya skoltay a te tut batsꞌi jiche.

¹⁶ Jamal chikan te lom mukꞌ te tut jchꞌuunejtik te mukul aye: Dios la yichꞌ stiꞌbalul, chiknaj ta ilel. Akꞌot ta naꞌel te toj yoꞌtan yuꞌun te Espiritue. Ilot yuꞌun te chꞌul angeletike. La yichꞌ alel ta stojol te nasionetike. La yichꞌ chꞌuunel ta balmilal. Sok ikꞌot bael ta lekilal.