1 Timoteo 2 - Nuevo Testamento Tzeltal de Amatenango

Te tutꞌil ya skꞌan kꞌoponel te Diose

¹ Jaꞌ nail ya kalbeyex to: Sil tiempo ya skꞌan ya akꞌoponbeyik Dios ta spisil te genteetike y sok ya awalbey kola yal Dios ta skuentaik.

² Ya skꞌan kꞌoponbeyel Dios te machꞌatik ay ta gobiernoile y sok spisil te machꞌatik ay yaꞌtelike, yuꞌun jich me bujtsꞌan kꞌinal ya kaꞌitik te ben jun koꞌtanike, sok jich me maꞌyuk kꞌop ya xjajch. Jich me ya xjuꞌ kuꞌuntik xchꞌuunel te Diose y jich me toj ya xꞌanotik.

³ Jaꞌ to jaꞌ lek ya yil te Dios te jKoltawanej kuꞌuntike.

⁴ Yuꞌun stukel ya skꞌan te spisil ya xkole y te ya xkꞌot ta yoꞌtanik te tut batsꞌi jiche.

⁵ Jtul nax te Diose, y jtul nax te winik te ya xjuꞌ ya yikꞌ bael spisil te winketik te jun nax ya xkꞌot sok te Diose, jaꞌ bi jaꞌ te winik Jesucristoe.

⁶ Porke te Jesucristoe la yakꞌ sba entregal ta milel yuꞌun la stojbe stojol skolel ta spisil, jich tutꞌil te albil skꞌoplal te kꞌalal la sta skꞌaalele.

⁷ Jich yuꞌun joꞌon aꞌbilon kaꞌtel ta apostolil ta yalel te tutꞌil aye, y la yaꞌbelon kaꞌtel te ya jnopes te machꞌatik ma juriyouke tutꞌ ay ta chꞌuunel sok te tut batsꞌi jiche. Te tut ya kale batsꞌi jich, ma jlotuk.

⁸ Jich yuꞌun, ya jkꞌan te ya skꞌoponik Dios ta spisil te winketik ta bayuk naxe, y te ya stoy skꞌabik ta stojol Dios te maꞌyuk tut ay ta yoꞌtanik y ma me ayuk iliꞌba ni pleto yuꞌunik.

⁹ Jich mismo te antstike ayuk me sluwaril te ya slap skꞌuꞌ spakꞌike. Ma me yuꞌunuk ya yakꞌ sbaik ta kꞌupinel. Aꞌ xchap sbaik, pero ma me kꞌaxemuk to xan ya xchꞌalik sjolik, niuk sok oro o perlaetik o kꞌuꞌul-pakꞌal te ben toyol stojole.

¹⁰ Jaꞌ me a xchap sbaik yuꞌun te lekil aꞌtele jich tutꞌil te ya skꞌan spas te antstik te jun yoꞌtanik xchꞌuunejik te Diose.

¹¹ Te antstike a me chꞌunan sbaik ta yaꞌiyel te pꞌijutesele, a me xchꞌunan sbaik.

¹² Ma xkakꞌ te ants te ya snojpeswan ta komone, ni ma me yauk xmantalaj ta stojol te winketike. Jaꞌ ya jkꞌan te makꞌ ya xkꞌopojike.

¹³ Porke te Diose nail a spas te jꞌAdane y patil te xꞌEvae.

¹⁴ Y te jꞌAdane ma jaꞌuk a loꞌlayot, sino ke jaꞌ te antse. Y te kꞌalal loꞌlayot, yal ta mulil.

¹⁵ Pero te antse ya xkol teme ya xchꞌuun te ya stsꞌites te yuntikile sok teme ma xchꞌay yoꞌtan ta xchꞌuunel te Diose, sok te ay skꞌuxul yoꞌtane, y sok teme jun yoꞌtane.