1 Tesalonicenses 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPabloon, joy jba sok te Silvano y sok jTimoteo la jtsꞌibayex te karta to, jaꞌex te hermanoetik te ayex ta mukꞌul jtejklum Tesalónicae, te jun nax ayex ta skuenta te Jtatik Diose y sok te Kajwaltik Jesucristoe. Te Jtatik Dios aꞌ yaꞌbeyex te slekil yoꞌtane y sok te bujtsꞌan kꞌinal ta akuentaike.

Te xchꞌuunel yoꞌtanik te Tesalónicaetike

² Sil tiempo ya kalbetik kola yal Dios yuꞌun ta apisilik te jaꞌexe, y ya jnaꞌtikex ta skꞌoponel Dios.

³ Maꞌyuk ya jkom jbajtik ta snaꞌulanelex ta stojol te Jtatik Diose te tutꞌil bayal xchꞌuunel awoꞌtanik aꞌtejemexix te jaꞌexe, sok te tutꞌil bayal slekil awoꞌtanik la awakꞌ abaik ta abatinele, y sok te tutꞌil yipalex ta smaliyel te Kajwaltik Jesucristoe te la skoltayex te juꞌ awuꞌunik te kujch awuꞌunik te wokoletike.

⁴ Kermanotak, Dios me ya xkꞌuxutayex te jaꞌexe, y jnaꞌojtik te stukel a stsaexe.

⁵ Yuꞌun te kꞌalal la kalbetikex te skꞌoplal kolele, ma tojol kꞌopetikuk nax te kꞌo kaltike, sino ke sok ta spoder te Chꞌul Espiritue, yuꞌun la jnaꞌtik te batsꞌi jich te tut la kalbeyex awaꞌiyike. Anaꞌojik lek te tutꞌil a atꞌejotik ta akuentaik skuenta alekuteselik.

⁶ Te jaꞌexe jaꞌ la anopik te tutꞌil ayotike y sok te tutꞌil ay te Kajwaltike. Y la awichꞌik ta jkuenta te skꞌop Diose sok te sbujtsꞌ awoꞌtanik te la yaꞌbeyex te Chꞌul Espiritue, aunke la ataik bayal awokolik ta ilbajinel yuꞌun.

⁷ Jich la awakꞌik ta ilel te tut leke ta stojol spisil te hermanoetik te ayik ta estadoetik yuꞌun te Macedoniae y sok te Acayae.

⁸ Jaꞌex ta akuentaik a pujk te skꞌoplal yuꞌun Kajwaltik ma jaꞌuk nax ta Macedonia sok ta Acaya, sino ke ta spisil ta bayuk nax. Jich la snaꞌik te tutꞌil ay xchꞌuunel awoꞌtanik ta stojol Diose. Jaꞌ yuꞌun ma puersaukix te ay tut ya kaltik te joꞌotike,

⁹ porke stukelik mismo ya yalik te tutꞌil kꞌo kiltikex tal, sok te tutꞌil lek la awikꞌotik te jaꞌexe, y sok te tutꞌil la ajilesik te lotil diosetike. Yuꞌun la asujtes awoꞌtanik ta stojol te batsꞌi kuxul Dios y te lijk awakꞌ abaik ta abatinel yuꞌune.

¹⁰ Sok ya yalik xan te tutꞌil yipalex ta smaliyel te ya sujt tal ta chꞌulchan te Jesus te Xnichꞌan Diose. Jaꞌ te Jesus te la yichꞌ xchaꞌkusesel yuꞌun Dios te ba ay animaetike, sok te stukel ya skoltayotik yuꞌun te tulan kastigo ya xtale.