1 Pedro 5 - Nuevo Testamento Tzeltal de Amatenango

Tsitsel yuꞌun te machꞌatik xchꞌuunejik Dios

¹ Te ora to ay tut ya kalbeyex te ansianoex te ba jujun kongregasione, joꞌon te pajal ansianoon sok te jaꞌexe, sok joꞌon te la kil te wokoletik a kꞌax yuꞌun te Cristoe, sok te pajal ya kichꞌtik te lekilal te ya xba chiknajuke.

² Kanantayaik me te karneraetik yuꞌun te Diose te jaꞌ yakꞌojbeyexix ta akuentaike. Pasaik sok spꞌejel awoꞌtanik jich tutꞌil ya skꞌan te Diose, y ma me ta sujeluk ya apasik. Ma me xbajt ta awoꞌtanik takꞌin. Gano me xꞌaꞌtejex.

³ Ma me jachikukex te batsꞌi ajwalilex yuꞌun te machꞌatik ay ta akuentaik skanantayele, sino ke jaꞌex ya skꞌan ya awaꞌbeyik yilik te tut lek ta pasele.

⁴ Jich te kꞌalal ya xchiknaj te Statal jKanane, te jaꞌexe ya me awichꞌik te korona yuꞌun te lekilale, te jun korona te maꞌyuk tut ora ya xlaje.

⁵ Jichex euk jaꞌex kermetik, chꞌuunbeyaik me smantal te ansianoetik te tutꞌil ay yaꞌtelike. Ta apisilik ya skꞌan talel baeluk ya achꞌuunbey aba amantalik, sok chꞌunulukex me. Porke Dios skontrainej te machꞌatik lom toybaike. Pero ya skoltay sok slekil yoꞌtan te machꞌatik chꞌunul ayike.

⁶ Chꞌunul me xꞌawakꞌ abaik ta yanil skꞌab Dios te bayal spodere, yuꞌun ya me yakꞌex ta ichꞌel ta jkuenta te tut ora ya sta yoraile.

⁷ Aꞌbeyaik ta skuenta stukel te yajtal awoꞌtanike, porke stukel skanantayejex.

⁸ Pꞌij me xꞌawakꞌ abaik y kuxuluk me awoꞌtanik. Porke te akontraike, jaꞌ te pukuje, jachik ay tut choj te ya xkꞌuxuxan ye, sok te yipal ta sleel te machꞌa ya sweꞌe.

⁹ Ma me wakꞌ abaik ta tsalel yuꞌun. Jaꞌ me a yipin awoꞌtanik te Dios achꞌuunejike. Naꞌaik me te jich mismo ay swokolik te awermanoik ta bayuk nax ta balmilal.

¹⁰ Pero ta patil te ay awokolik cheꞌoxeb nax kꞌaale te jaꞌexe, Dios me ya yakꞌ xjuꞌ awuꞌunik ta lek. Ya me sjunutesbeyex awoꞌtanik sok ya me yaꞌbeyex yip awoꞌtanik sok jun awoꞌtanik. Ben bayal slekil yoꞌtan te Diose te la yikꞌotik yuꞌun ya kichꞌtik te slekilal sbajtel kꞌinal, te jun nax ayotik sok te Jesucristoe.

¹¹ Stukel ay spoder ta sbajtel qꞌuinal. Jichuk.

Spajtil-oꞌtanil ta slajibal

¹² Te Silvanoe, jaꞌ te jtul hermano te jun yoꞌtan xchꞌuunej Diose, jaꞌ la jmajanbey skꞌab ta stsꞌibayel te chꞌin karta to. Yuꞌun ya jtsꞌitsex y ya kalbeyex ta jamal te bendisionetik te awichꞌojikixe, te chikan a te jich ay slekil yoꞌtan te Diose. Jmel nax me junuk awoꞌtanik te tutꞌil jich ay te xkꞌuxul yoꞌtane.

¹³ Ya stikonbeyex spajtil awoꞌtanik te hermanoetik te aylan ta Babilonia, te jaꞌ a tsaot yuꞌun te Diose jich mismo tutꞌil te jaꞌexe. Y sok te jMarcose te jnichꞌan ta koꞌtane.

¹⁴ Patbeya aba awoꞌtanik ta juju-tulex te awermano abaike ta skuenta te xkꞌuxul awoꞌtanike. Bujtsꞌanuk me kꞌinal ya awaꞌiyik ta apisilik te ayex ta skuenta te Cristoe.