1 Pedro 4 - Nuevo Testamento Tzeltal de Amatenango

Aꞌtelinaik te amajtanik te awichꞌojik yuꞌun te Diose

¹ Jaꞌ yuꞌun, jachik tutꞌil kꞌax swokol ta stiꞌbalul te Cristoe, jich euk te jaꞌexe ya skꞌan te junuk awoꞌtanik te ya awilik wokole. Yuꞌun te machꞌa ya xkꞌax swokol ta stiꞌbalule, teꞌ chꞌayix jil a te smule.

² Yuꞌun jich ya xkuxuyin te jayeb xan kꞌaal kuxul jich tutꞌil ya skꞌan yoꞌtan te Diose, y ma jaꞌuk te tut ya skꞌan te stiꞌbalule.

³ Bayal kꞌaal la apasik te jaꞌexe jich mismo te tutik ya spasik te machꞌatik ma snaꞌbeyik sba te Diose. Jich kꞌayex ta spasel te mulile, sok te tut ma tsaꞌamuk te ya skꞌan awoꞌtanike, sok te yakubele, y niketel ta pas-kꞌin, y lom nax la alajinik atakꞌinik, y la akejan abaik ta stojol lotil diosetik te kꞌax ma tsaꞌamuke.

⁴ Te ora to, te jaꞌexe makꞌ ya ajoyinlanikix ta spasel te lom nax ma tsaꞌamuk te xkuxlejalike. Jaꞌ yuꞌun te lom yan ya yilexix y ma lekuk ya xkꞌopojik ta atojolik.

⁵ Pero te stukelike ya me xkꞌo yakꞌik jkuenta ta stojol te Machꞌa ya yichꞌ ta jkuenta te machꞌatik kuxajtike y machꞌatik chamenike.

⁶ Yuꞌun te machꞌatik chamenikixe altalanbot skꞌoplal te lek achꞌ kꞌope. Yuꞌun jich me ya xjuꞌ ya xkuxuyinik sok xchꞌulelik ta skuenta Dios, aunke liꞌ ba balmilale la me yichꞌ chapel te stiꞌbalule, jich tutꞌil spisil te genteetike.

⁷ Nopolix ya xtal slajibal ta spisil te tutik aye. Jaꞌ yuꞌun, te jaꞌexe naꞌaik me tutꞌ ayex y kuxa me awoꞌtanik ta skꞌoponel Dios.

⁸ Jaꞌ tulan skꞌoplal te ayuk me bayal xkꞌuxul awoꞌtanik, porke te xkꞌuxul-oꞌtanile bayal perdon ya yakꞌ yuꞌun muliletik.

⁹ Ikꞌa abaik me ochel ta anaik ta juju-tulex, ma me ayuk tut ma lekuk ya awalik yuꞌun.

¹⁰ Talel baeluk me xꞌamantaltes abaik chikan te amajtanik aꞌbilex yuꞌun te Diose. Lekil jꞌaꞌtelukex me te tutꞌil bayal aꞌbilex te bendisionetik yuꞌun te Diose.

¹¹ Te machꞌa ay smajtan te ya xkꞌopoje, a me yal te tut yaloj te Diose. Te machꞌa ya snaꞌ mantaltesele, a me yakꞌ sba ta mantaltesel sok te spuersa te ya xꞌaꞌbot yuꞌun te Diose. Spisil te tut ya apasike, pasaik skuenta yuꞌun jich me lek ya xꞌalbot skꞌoplal a te Diose ta skuenta te Jesucristoe. Jaꞌ te machꞌa ay slekilal sok te ay spoder sbajtel kꞌinale. Jichuk.

Ay wokol yuꞌun te xchꞌuunel Diose

¹² Kermanotak te kꞌuxex ta koꞌtane, ma me lom yanuk ya awaꞌiyik yuꞌun te ayex ta prewa te jachik tutꞌ kꞌajkꞌ te lom kꞌuxe. Ma me xꞌakuyik te ay tut lom yan ya xkꞌot ta akuentaike.

¹³ Junuk me awoꞌtanik teme pajal ay awokolik te tutꞌil a kꞌax swokol te Cristoe. Yuꞌun jich me ya ata bayal sbujtsꞌ awoꞌtanik a te kꞌalal ya xchiknaj tal te slekilale.

¹⁴ Ben tsaꞌam alekilik teme ay machꞌa ya yixta-kꞌoptayex teme jaꞌ ta skꞌaj te Cristoe. Porke te slekilal te Espíritu yuꞌun Diose ay me ta atojolik te jaꞌexe.

¹⁵ Teme ay machꞌaex te ya ata awokolike, ma me jaꞌuk ta skaj milawe o elekꞌe o tulan mulile, sok ma me yuꞌunuk ya achꞌik abaik a te tut maꞌyuk awochelik aye.

¹⁶ Pero teme jaꞌ ay awokolik yuꞌun te achꞌuunej te Diose, ma me kꞌexawanik yuꞌun. Yuꞌun jich me ya awakꞌik xan ta albeyel mukꞌ skꞌoplal a te Diose.

¹⁷ Yuꞌun la staix yorail te ya xlijkix ta chapel te machꞌatik batsꞌi yuꞌun te Diose. Y teme nail ya xlijk te ba ayotik te joꞌotike, ¿tutꞌil ay slajibal te machꞌatik maꞌ xchꞌuunik te achꞌ kꞌop yuꞌun Diose?

¹⁸ Teme wokol ya xkolik te machꞌatik toj ayike, ¿tut ya xkꞌot ta skuentaik te machꞌatik ma lekikuke y sok te jmulawiletike?

¹⁹ Jich yuꞌun te machꞌatik ya xkꞌax swokolike, jich tutꞌil ya skꞌan yoꞌtan te Diose, ya skꞌan sigue jaꞌ ya spasik te tut leke y te ya yaꞌbeyik xchꞌulelik ta skuenta Dios te jaꞌ la spasotike, yuꞌun jun yoꞌtan stukel ta jtojoltik.