1 Pedro 3 - Nuevo Testamento Tzeltal de Amatenango

Tutꞌil ya skꞌan xkuxuyinik te machꞌatik nujpunemike

¹ Jich te jaꞌexe antstik, chꞌuunbeyaik me smantal te amamlalike, yuꞌun teme ay amamlalik te ma xchꞌuunik te skꞌop Diose, tikꞌ ya me xchꞌuunik a teme ya yilik te spisil te tut ya apasike. Ma puersauk ya yichꞌ albeyel te skꞌop Diose,

² teme ya yilik te lekix ay bael te akuxlejalike y te ya xꞌakꞌawanex ta jkuentae.

³ Te tutꞌil ya achap abaik te jaꞌexe, ma jaꞌuk alekilik a te ya awakꞌ abaik ta ilele. Ma me lom kꞌaxemuk ya apechꞌ ajolik, sok te tsaꞌamik oro ya awichꞌike, o te kꞌuꞌul-pakꞌal te beno stsaꞌamule.

⁴ Jaꞌ me xꞌachap te yutil awoꞌtanike, te ben tsaꞌam te ma xkꞌaꞌe, sok te ben jun awoꞌtanike. Jaꞌ me te chapel te ben bale ta sit te Diose.

⁵ Yuꞌun jich a xchap sbaik ekꞌa te namey tal te antstik te jun yoꞌtan xchꞌuunejik te Diose. Sok jaꞌik la xchꞌuunbeyik smantal te smamlalike.

⁶ Jich tutꞌil te Sarae, la xchꞌuunbe te jꞌAbrahame y la yalbe: “Kajwal”, xchi ta stojol. Y te jaꞌexe jaꞌ yantsil-alex Sara ya xkꞌoex teme ya apasik te tut leke y ni maꞌyuk tut ya axiꞌik.

⁷ Jich euk te jaꞌexe, mamlaliletik, naꞌaik me tutꞌ kuxulex sok te awinamike. Akꞌaik me ta jkuenta te tutꞌil ya skꞌane. Naꞌaik me te antse chꞌin nax me staelik. Sok naꞌaik me euk te ta skuenta slekil yoꞌtan te Diose te jich altalanbil jilel euk te jich ya xꞌaꞌbot xkuxlejal te antstik jich mismo tutꞌil jaꞌexe. Jich me xꞌapasik yuꞌun ma me ayuk tut ya smakex a te ya akꞌoponik te Diose.

Te machꞌatik ya xkꞌax swokol ta spasel te tut leke

⁸ Ta slajibal ya kalbeyex: Junuk me awoꞌtan abaik ta apisilik, sok junuk nax me te tut ya anopike. Kꞌuxuk me ya awaꞌiy abaik te tutꞌil te awermano abaike. Ayuk me slekil awoꞌtanik y benuk me chꞌunulex.

⁹ Ma me apakbeyik te tut ma lekuk ya spasbeyexe, sok ma me xꞌawutik te machꞌa ya yutexe. Jaꞌ lek kꞌanbeyaik bendision. Yuꞌun anaꞌojik te la yikꞌex Dios yuꞌun ya awichꞌik bendision euk te jaꞌexe.

¹⁰ Porke ya yal te Sjun Dios: “Te machꞌa ya skꞌan te lek xkuxlejale, y te jun yoꞌtan ya xkꞌax te jujun kꞌaale, a me snaꞌ tutꞌil ya xkꞌopoj. Ma me wak yal te tut ma lekuke, sok ya me skom stiꞌ ta yalel te loꞌlawaneje.

¹¹ Jilesaik te tut ma lekuke, y pasaik te tut leke. Ja xꞌaleik te bujtsꞌan kꞌinale, y jich xꞌapasik bael.

¹² Porke te Kajwaltike ya skanantay te machꞌatik toj aye. Y yakꞌoj xchikin ta yaꞌiyel te ya skꞌoponike. Pero ta sit te Kajwaltike kontra ya yil te machꞌatik ya spasik te tut ma lekuke”, te xchie.

¹³ ¿Machꞌa kꞌan juꞌuk yuꞌun te ay tut ma tsaꞌamuk spasbelex teme jaꞌex sil tiempo jaꞌ ya apasik te tut leke?

¹⁴ Pero teme jaꞌ ya xkꞌax awokolik yuꞌun te tut stojil ya apasike, ben me tsaꞌam alekilik yuꞌun. Ma me machꞌa axiꞌik, ni ma me tut xyal awoꞌtanik.

¹⁵ Sino ke jaꞌ xꞌawakꞌik ta jkuenta te Cristoe, sok jaꞌ me xꞌawajwalinik ta awoꞌtanik. Siluk me tiempo chapalex ta sjakꞌbeyel skꞌopik spisil te machꞌatik ya xchꞌamik razon te ay smukꞌul awoꞌtanik te jaꞌexe.

¹⁶ Pero lekuk me xꞌawalbey yaꞌiyik y akꞌaik me ta jkuenta. Lekuk me spisil te tut ya apasike. Jich me jun awoꞌtanik ya awaꞌiyik yuꞌun. Yuꞌun te machꞌatik ma lekuk tut ya yalbeyex, aunke lek ayex yuꞌun achꞌuunejik te Cristoe, ya me xkꞌexawik yuꞌun te skꞌopike.

¹⁷ Teme jich ya skꞌan te Diose, jaꞌ lek te ay ya xkꞌax awokolik yuꞌun spasel te tut leke. Jaꞌ ma lek teme ya xkꞌax awokolik yuꞌun spasel te tut ma lekuke.

¹⁸ Porke te Cristoe kꞌax swokol ta milel yuꞌun te jmultik te jun nax buelta ta sbajtel kꞌinale. Lek yoꞌtan stukel, pero kꞌax swokol yuꞌun te machꞌatik ma lekuke, yuꞌun ya yikꞌex bael ta stojol Dios te jaꞌexe. Jich tutꞌil winik cham te stiꞌbalule; pero chaꞌkux sok te xchꞌulele.

¹⁹ Y jich tutꞌil chꞌulelal xanix aye, ba yalbe te chꞌulelaletik te aylan ta prexoe.

²⁰ Ja te maꞌ xchꞌuunik mantal te nameye te kꞌalal ay ta balmilal a te jNoee. Ja te kꞌalal jun yoꞌtan a maliyot yuꞌun Dios te yipal ta spasel a te barkoe. Ma ba yalikuk, waxaktulik nax te kolik te maꞌ lajik ta jaꞌe.

²¹ Y te skꞌoplal jaꞌ abi, ja xyal te ichꞌjaꞌe, te jaꞌ ta skuenta te kolemotikix te ora to. Ma yuꞌunuk ya spokbotik lokꞌel te yijkꞌal jtiꞌbalultike, sino ke jaꞌ kꞌanbeyel te Diose te ya slekutes te koꞌtantike. Jich ya skoltayotik te tutꞌil chaꞌkux tal te Jesucristoe.

²² Jaꞌ te machꞌa mo bael ta chꞌulchane, y te ayix ta sbatsꞌil te Diose, sok te jaꞌ ya xchꞌuunbot smantal yuꞌun te angeletike y sok te yanetik te ay yaꞌtelik y ay spoderike.