1 Pedro 2 - Nuevo Testamento Tzeltal de Amatenango

¹ Jich yuꞌun, jilesaik spisil ta jkaj te tut ma lekuke: spisil loꞌlawanej, sok te ma tsaꞌamuk awoꞌtanike, sok te il-oꞌtane, sok spisil te jkaj te jontol kꞌop aꞌbiyeje.

² Jachikukex me te tutꞌil untik te ayinel toe, leaik me te lekil lech ta skuenta te Espiritue. Yuꞌun jich me ya xchꞌiex ta skuenta sok jich me ya ataik a te kolele,

³ teme batsꞌil anaꞌojikix te lom lek stukel te Kajwaltike.

Jaꞌ kuxul ton te Cristoe

⁴ Tijilajanik ta stojol te Kajwaltike yuꞌun jaꞌ kuxul ton stukel. Pꞌajot yuꞌun te genteetike, pero te Diose stsaoj stukel, jich tutꞌil ton te ben tulan skꞌoplale.

⁵ Jachikex euk, Dios ya yakꞌex tutꞌil kuxul tonetik, yipalex ta tejkꞌanel ta jun na ta skuenta te Espiritue. Lekil saserdoteukex me, yuꞌun ta skuenta te Jesucristoe, jaꞌ awaꞌtelik te ya awaꞌbeyik milbil smajtan ta skuenta te Espiritue te lek ya yil te Diose.

⁶ Jaꞌ yuꞌun te jich ya yal te Sjun Diose: “Joꞌon me ya kakꞌ ta Sion te jpꞌej ton te yiptajib te tsabil te ben tulan skꞌoplale. Te machꞌa ya xchꞌuune makꞌ ya xjil ta kꞌexlal yuꞌun.

⁷ Yuꞌun te jaꞌexe te achꞌuunejikixe, te ton abi jaꞌ te ben tulan skꞌoplal ta awoꞌtanike. Pero te machꞌatik ma xchꞌuunike, jaꞌ ya xkꞌot ta pasel te tut ya yal te Sjun Diose: “Te ton te la spꞌaj te jꞌalbañiletike, jaꞌ yiptajib chikin na kꞌotix stukel”, xchi me.

⁸ Y jich ay skꞌoplal xan ta Sjun Dios: “Jun mukꞌul ton, te jun ton te ya xkꞌojchin-okol te ya syaleswane”, te xchie. Yuꞌun ya xkꞌojchin yokik a te machꞌatik ma xyakꞌik ta jkuenta te tutꞌil ay skꞌoplal te Jesucristoe. Yuꞌun jich chapal skꞌoplalik a.

Te jtejklum yuꞌun te Diose

⁹ Pero te jaꞌexe tsabilex yuꞌun Dios sok te atsꞌumbalike. Saserdoteex te ayex ta abatinel yuꞌun te Reye. Te jaꞌexe jun lekil nasion, jun jtejklum te yuꞌunex te Diose. Y te jich ay to, yuꞌun ya awalbeyik te tut spasoj Dios te lom tsaꞌame, te la yikꞌex tal lokꞌel ta ijkꞌal kꞌinal yuꞌun ya xꞌochex bael te ba sakil kꞌinal yuꞌun te lom tsaꞌame.

¹⁰ Te nail to te jaꞌexe ni ma jtejklumukex; pero te ora to jtejklumexix yuꞌun te Diose. Te nail to maꞌyuk machꞌa xpichꞌukex yoꞌtan; pero te ora to pichꞌexix yoꞌtan te Diose.

Jich me ya xkuxuyinex jachik tutꞌil yaj-aꞌtel te Diose

¹¹ Kermanotak te kꞌuxex ta koꞌtane, awokolikuk, jachikex me te tutꞌil jyanlumetik te beomaletik nax liꞌ ba balmilale. Ma me akꞌayes abaik a te tutik ya skꞌan te atiꞌbalulike te jaꞌ skontra te achꞌulelike.

¹² Lekuk me ayex sok te akuxlejalik te ba ay te machꞌatik ma snaꞌbeyik sba te Diose. Aunke ma tsaꞌamuk akꞌoplalik ya yalbeyex te ora to, sok aunke jachik kꞌoeme ta yoꞌtanik te ma tsaꞌamuk awaꞌtelike, ya me yilik te lek te tut ya apasik te jaꞌexe, y ya me yalbeyik lek skꞌoplal te Dios te tut kꞌaalil ya yichꞌ kuenta ta spisile.

¹³ Te tutꞌil jich ya skꞌan te Kajwaltike, chꞌuunbeyaik me smantal spisil te machꞌatik ay yaꞌtele, jich tutꞌil te machꞌa mukꞌul reye te mas mukꞌ yaꞌtele,

¹⁴ sok jich euk te gobiernoetik te tikonbil yuꞌune, te jaꞌ ya yaꞌbe kastigo te machꞌatik ma tsaꞌamuk yaꞌtelike, y ya yakꞌ ta jkuenta te machꞌatik lek te tut ya spasike.

¹⁵ Porke Dios ya skꞌan te lek te tut ya apasik te jaꞌexe, yuꞌun te machꞌatik maꞌyuk tut ya snaꞌike y sok te machꞌatik maꞌyuk spꞌijilike ma xwejt tut ya yalbeyex te ya skontrainex te jaꞌexe.

¹⁶ Te tutꞌil libre ayexe, pasaik me te tut leke. Ma me yuꞌunuk jaꞌ libre ayex ta spasel te tut ma lekuke. Jachikukex me te tutꞌil yaj-aꞌtelex te Diose.

¹⁷ Akꞌaik me ta jkuenta spisil genteetik. Kꞌux me xꞌawil te hermanoetike. Xiꞌaik me te Diose. Akꞌaik me ta jkuenta te mukꞌul reye.

Ya yaꞌbotik kiltik te tutꞌil a kꞌax swokol te Cristoe

¹⁸ Aj-aꞌteliletik, chꞌuunbeyaik spisil smantal te awajwalike sok akꞌaik me ta jkuenta. Ma jaꞌuk nax te machꞌatik lek yoꞌtanik te toj ya xmantalaje, sino ke jich euk te machꞌatik ma lekuk yoꞌtanike.

¹⁹ Aunke maꞌyuk sluwaril te ya yaꞌbeyex awokolik te awajwalike, jaꞌ lek teme ya xkujch awuꞌunik ta skaj te achꞌuunejik te Diose.

²⁰ Yan teme ta skaj te la apasik te tut ma lekuke te ya yaꞌbelex awokolik, ¿tut ya xlok awuꞌunik a te jun awoꞌtan ya stsꞌijk awuꞌunike? Pero teme jaꞌ ay awokolik yuꞌun te tut lek ya apasike, y junuk awoꞌtanik xꞌatsꞌikik te wokole, jaꞌ to jaꞌ lek ya yil te Diose.

²¹ Yuꞌun jaꞌ la yikꞌex Dios yuꞌun te ya xkꞌax awokolike. Porke te kꞌalal Cristo kꞌax swokol ta akuentaik, la yaꞌbeyex awilik yuꞌun jich me ya atamik bael a.

²² Te Cristoe ni maꞌyuk a sle smul ni maꞌyuk machꞌa a sloꞌlay ni jtuluk.

²³ Te kꞌalal la yutik ta kꞌope, ni ma sjakꞌ ta utaw. Te kꞌalal la yaꞌbeyik swokole, ni ma tutiꞌ yal. Sino ke jaꞌ a yaꞌbe ta skuenta te Diose, te toj ya xchapawane.

²⁴ Te Cristoe jaꞌ a yichꞌ bael te jmultike ta stiꞌbalul te ba kruse. Yuꞌun jich me a laj jilel skꞌoplal a te mulile, sok ya xkuxuyinotik bael ta spasel te tut leke. Te Cristoe ejchentesot yuꞌun jich me a lekubex a te jaꞌexe.

²⁵ Yuꞌun te jaꞌexe te nail to jachikex tutꞌil karneraetik te chꞌayemik ta bayuk nax aylane. Pero te ora to, chaꞌsujtexix tal ta stojol te Cristoe, te ya skꞌanantayex jachik tutꞌil jtul jkanan te ma xway te ya skanantay te akuxlejalike.