1 Pedro 1 - Nuevo Testamento Tzeltal de Amatenango

Spajtil-oꞌtanil

¹ Joꞌon jPedroon, apostolon yuꞌun te Jesucristoe, ya jtsꞌibay te karta to te jaꞌ yuꞌun te machꞌatik te pujkejemik bael te ba slumalike, te ayik ta estadoetik yuꞌun Ponto sok Galacia sok Capadocia sok Asia y sok Bitinia.

² Jaꞌex te tsabilex yuꞌun te Jtatik Diose te nameyix jich snopoj ta yoꞌtane, sok te chꞌulutesbilexix ta skuenta te Espiritue. Yuꞌun me ya achꞌuunik y ya me awichꞌik sakutesel ta skuenta xchꞌichꞌel te Jesucristoe. Ichꞌaik te bayal slekil yoꞌtan te Jesucristoe y sok te bujtsꞌan kꞌinal yuꞌune.

Ay smukꞌul koꞌtantik te jayeb kꞌaal kuxulotike

³ Ben tsaꞌam slekil te Dios, jaꞌ te Stat te Kajwaltik Jesucristoe. Ta skuenta te lom bayal slekil yoꞌtane la yakꞌ chaꞌayinukotik ta achꞌ ta skuenta te chaꞌkux tal te Jesucristoe. Jaꞌ to jaꞌ te yipalotik ta smaliyele.

⁴ Jich me ya awichꞌik te majtanil yuꞌun Dios te skꞌejojbeyex ta chꞌulchane te ma snaꞌ xlaje, ni ma xꞌijkꞌub, ni ma xlaj te stsaꞌamule.

⁵ Ta skuenta te achꞌuunejik te Diose, ya me skanantayex ta spoder, yuꞌun jich me ya ataik a te kolel te chapal yuꞌune, te ya xba yakꞌ ta ilel ta slajibal kꞌaale.

⁶ Jaꞌ sluwar te jaꞌexe te lom jun awoꞌtanike, manchuk me puersa ay jwokoltik te jayeb nax kꞌaal ya xkꞌaxotik te bayal prewae.

⁷ Porke te xchꞌuunel awoꞌtanik te jaꞌexe jachik kꞌoem tutꞌil oro, puersa ya yichꞌ ilel ta kꞌajkꞌ te tutꞌil aye. Te xchꞌuunel-oꞌtanil te ya xkꞌax yuꞌun te prewae, mas vale ke te oroe te ya xjuꞌ ya xlaje. Te tutꞌil ay te xchꞌuunel awoꞌtanik te jaꞌexe, teme jich a pasot prewae, jich me lek ya xlokꞌotik y ben me tsaꞌam jlekiltik yuꞌun a, sok ayotik me ta jkuenta te kꞌalal ya xchiknaj tal te Jesucristoe.

⁸ Te jaꞌexe kꞌux ya awaꞌiyik ta awoꞌtanik te Jesucristoe aunke ma to awilojikuk; y te ora to, achꞌuunejik te Jesucristoe aunke ma to awilojikuk. Lom kontento ayex sok sbujtsꞌ awoꞌtanik te lom mukꞌe, y te ben tsaꞌam slekil te ma xjuꞌ xlaj ta alel skꞌoplale,

⁹ yuꞌun la ataikix te skolel achꞌulelike. Jaꞌ yuꞌun te tutꞌil jun awoꞌtanik sok te xchꞌuunel awoꞌtanike.

¹⁰ Te namey antibo jꞌalwanejetike la snopik ta lek sok la sbeleltesik te tutꞌil ay te kolele, y la yalik te tutꞌil ay slekil yoꞌtan te Dios te ay tut ya xba yaꞌbeyexe.

¹¹ Te Espíritu yuꞌun te Cristoe la yaꞌbe snaꞌ ta nail te jꞌalwanejetik te ya xkꞌax swokol te Cristoe, y te ya xtal te lekilal ta patile. Yoꞌtanuk kꞌan snaꞌbeyik sluwar machꞌa genteil a y tut kꞌaalil ya xkꞌot ta pasel te tut albot ta yoꞌtanik yuꞌun te Espíritu te ay ta stojolike.

¹² Pero akꞌtalanbot snaꞌ yuꞌun Dios te ma stukelikuk yuꞌunik te tut ya yaltalanike. Sino ke jaꞌ ya xkꞌot ta akuentaik te jaꞌexe. Jaꞌix te skꞌoplal kolel te la yalbeyex awaꞌiyik te machꞌatik la yalik te lekil achꞌ kꞌop ta skuenta spoder te Chꞌul Espiritue te tikonbil tal ta chꞌulchane. Spisil to yoꞌtanik euk te chꞌul angeletik te ya skꞌan xꞌaꞌbot yilik ekꞌae.

Dios ya yikꞌotik ta jun lekil kuxlejal

¹³ Jaꞌ yuꞌun chapalukex me sok kuxuluk me awoꞌtanik. Spꞌejeluk me awoꞌtanik ya amaliyik te tut ya xba yaꞌbeyex Dios ta slekil yoꞌtan te kꞌalal ya xchiknaj tal te Jesucristoe.

¹⁴ Jachik tutꞌil alnichꞌaniletik te chꞌuunej mantale, ma me jichuk ya xkuxuyinex te tutik ya skꞌan awoꞌtanik te ay la apasik te nail to te ma to xꞌanaꞌbeyik sba a te Diose.

¹⁵ Jachik ya skꞌanex te tutꞌil lek sok toj ya xꞌainexe. Porke te Dios te la yikꞌexe, lek ay y toj stukel.

¹⁶ Yuꞌun jich ya yal te Sjun Diose: “Jachikukex me te jaꞌexe te lek y toj ayexe, porke te joꞌone lek ayon y toj ayon.

¹⁷ Teme ya awalik te jaꞌexe: “Jaꞌ Jtatik te Diose”, te ya awutike, sok teme ya anaꞌik te jaꞌ ya yichꞌ jkuenta ta juju-tul chikan te tut spasoje, y ma yauk nax ya stsa te genteetike, ya skꞌan ya awakꞌik ta ilel te ya awakꞌik ta jkuenta te Diose sil tiempo te jayeb kꞌaal kuxulex liꞌ ba balmilal to.

¹⁸ Yuꞌun Dios la skoltayex te jaꞌexe yuꞌun te akuxlejalik te jowil nax te la yaꞌbeyex jilel te antibo ameꞌ atatike. Te jaꞌexe lom lek anaꞌojik te stojol te kolel to maꞌ yichꞌ tojel ta tutik te ya xkꞌaꞌe, jich tutꞌil te oro o te platae,

¹⁹ sino ke jaꞌ te stsaꞌamul xchꞌichꞌel te Cristoe te la yichꞌ akꞌel ta milbil majtanil, jachik tutꞌil jkꞌojt karnera te limpio aye.

²⁰ Jich chapalix a te kꞌalal ma to spas a te balmilale te ya xkꞌax swokol te Cristoe. Pero te tiempo to te slajibalixe, jicha chiknajix yuꞌun alekilik a te jaꞌexe.

²¹ Ta skuenta te Cristoe te ya achꞌuunik Dios te jaꞌexe. Jaꞌ te la yichꞌ chaꞌkuxesel te ba ay te animaetike, sok akꞌot ta akꞌel ta jkuenta. Jich yuꞌun te jaꞌexe awakꞌoj xchꞌuunel awoꞌtanik sok yipalex ta smaliyel te tut ya yaꞌbeyex te Diose.

²² Te ora to te jaꞌexe, te la achꞌuunik te skꞌoplal te tut batsꞌi jiche, la alekutesikix te awoꞌtanike yuꞌun ben jun awoꞌtan ya akꞌuxutayik a te hermanoetike. Jich ya skꞌan te kꞌux ya awaꞌiy abaik ta juju-tul sok spꞌejel awoꞌtanik sok spisil apuersaik.

²³ Yuꞌun te jaꞌexe chaꞌayinexix, y ma jaꞌuk ta skuenta te jtul winik te ya xlaje, sino ke ta skuenta te skꞌop Dios te stalel kuxul ay ta sbajtel kꞌinal stukele.

²⁴ Porke te Sjun Diose ya yal: “Spisil gente jachik tutꞌil wamal, y te stsaꞌamule jachik tutꞌil xnich wamal. Te wamale ya xtakej, y te xniche ya xlilaj koel.

²⁵ Pero te skꞌop te Kajwaltike, jmel nax a y sbajtel kꞌinal”, te xchie. Y te kꞌop to jaꞌ te skꞌoplal kolel te la yalbelex te jaꞌexe.