1 Juan 5 - Nuevo Testamento Tzeltal de Amatenango

Te tut ya xjuꞌ kuꞌuntik stsalel a te balmilale

¹ Spisil te machꞌa xchꞌuunej ta yoꞌtan te jaꞌ Cristo te Jesuse, jaꞌ yal-xnichꞌan Dios abi. Y te machꞌa kꞌux ya yaꞌiy te jtul tatile, jich kꞌux me ya yaꞌiy ekꞌa te yuntikil te tatil abi.

² Teme kꞌux ya kaꞌitik te Diose sok teme ya jpastik te tut ya yal ta mantal stukele, jnaꞌojtik te ya skꞌan ya jkꞌuxutaytik ekꞌa te machꞌatik yuntikil te Diose.

³ Te xkꞌuxutayel te Diose jaꞌ teme ya jchꞌuunbetik te mantaliletik yuꞌune. Y te mantaliletik yuꞌune ma aluk ta aꞌiyel.

⁴ Porke spisil te machꞌa yuntikil te Diose ya me stsalik te balmilale. Te xchꞌuunel koꞌtantike jaꞌ ya yaꞌbotik jtsaltik te tut skuenta balmilale.

⁵ Te machꞌa ya xchꞌuun te jaꞌ Xnichꞌan Dios te Jesuse, ya me stsal te balmilale.

Te testigo-kꞌop ay ta skuenta te Xnichꞌan Diose

⁶ Kꞌalal tal te Jesucristoe la yichꞌ jaꞌ sok la smal te xchꞌichꞌele. Ma jaꞌuk nax la yichꞌ te jaꞌe, la smal uuk te xchꞌichꞌele. Te Espiritue jaꞌ testigo yuꞌun to, y te Espiritue batsꞌi jich te tut ya yale.

⁷ Oxeb te testigoetik ta chꞌulchane: jaꞌ te Tatile, sok te machꞌa Skꞌop Diose, y sok te Chꞌul Espiritue. Y te yoxebal to jun nax te tut ya yalike.

⁸ Sok ay oxeb testigoetik ta balmilal: jaꞌ te Espiritue, sok te jaꞌe, y sok te chꞌichꞌe. Y ta yoxebalik, jun nax te tut ya yalike.

⁹ Teme ya kichꞌtik te testigo-kꞌop yuꞌun te genteetike, mas to ya kichꞌtik te testigo-kꞌop yuꞌun te Diose te mas bale stukel. Porke te testigo-kꞌop yuꞌun te Diose, jaꞌ a yalbe skꞌoplal te Xnichꞌane.

¹⁰ Te machꞌa ya xchꞌuun te Xnichꞌan Dios, ay ta yoꞌtan te testigo-kꞌope. Te machꞌa ma xchꞌuune, jaꞌ skuyoj ta jle-lot te Diose, porke ma xchꞌuun te testigo-kꞌop te Dios a yalbe ta skuenta te Xnichꞌane.

¹¹ Jaꞌ te testigo-kꞌop yuꞌun te Diose: Jaꞌ te la yaꞌbotikix te kuxlejaltik sbajtel kꞌinal, y te kuxlejal to ay ta skuenta te Xnichꞌane.

¹² Te machꞌa xchꞌuunej te Xnichꞌan Diose jich ay yuꞌun te kuxlejal to. Pero te machꞌa ma xchꞌuun te Xnichꞌan Diose, maꞌyuk yuꞌun te kuxlejale.

Tsitsel ta slajibal

¹³ La jtsꞌibabeyex to jaꞌex te achꞌuunejik te Xnichꞌan Diose, yuꞌun jich me ya anaꞌik te ay akuxlejalik sbajtel kꞌinale.

¹⁴ Jun koꞌtantik ta stojol te Diose, porke jnaꞌojtik teme ay tut ya jkꞌanbetik jich tutꞌil te ya skꞌan yoꞌtane, ya yaꞌibotik.

¹⁵ Y jich tutꞌil jnaꞌojtik te Dios ya yaꞌiy te ya jkꞌopontike, jich jnaꞌojtik te ya yaꞌbotik te tut ya jkꞌanbetike.

¹⁶ Teme ay machꞌa ya yil te yermano te yipal ta sleel smule, teme ma jaꞌuk ta skuenta te lajele, kꞌoponbeya Dios. Jich Dios ya xꞌaꞌbot xkuxlejal yuꞌun te hermanoe, teme ma jaꞌuk te mulil skuenta te lajele. Ay mulil te ya xꞌakꞌawan bael ta lajele, y te mulil abi makꞌ ya kal te ya skꞌan kꞌoponbeyel Diose.

¹⁷ Spisil te tut ma lekuke, jaꞌ mulil abi. Pero ay mulil te makꞌ ya xꞌakꞌawan bael ta lajele.

¹⁸ Jnaꞌojtik te machꞌa yal-xnichꞌan te Diose, makꞌ ya sleix smul. Porke ya me xkanantayot yuꞌun te Xnichꞌan Diose, y te pukuje ma xjuꞌ ya xpikot yuꞌun.

¹⁹ Jnaꞌojtik te jaꞌ yuꞌunotik te Diose. Yan te balmilale spisil ay ta skꞌab te pukuje.

²⁰ Jnaꞌojtik euk te Xnichꞌan Dios tal ta balmilal, y la yaꞌbotik jnaꞌbetik sba te Dios te batsꞌi jiche. Jun nax kuxulotik sok te batsꞌi Diose, jaꞌ bi jaꞌ te Xnichꞌane, te Jesucristoe. Jaꞌ to jaꞌ batsꞌi Dios stukel y jaꞌ kuxlejal sbajtel kꞌinal.

²¹ Kuntikil, ila me abaik yuꞌun te lotil diosetike.