1 Juan 4 - Nuevo Testamento Tzeltal de Amatenango

Te Espíritu yuꞌun Dios sok te machꞌa jloꞌlawanej

¹ Kermanotak te kꞌuxex ta koꞌtane, ma me achꞌuunik ta spisil te machꞌatik ya yalik te yikꞌojik te Espíritu yuꞌun te Diose. Aꞌiya awaꞌiyik nailuk teme jaꞌ te Espíritu yuꞌun Dios te ay ta stojolike o ma jaꞌuk. Porke nojel te balmilale te jloꞌlawanejetik te ya yalik te jaꞌ ta skuenta Dios te tut ya yalike.

² Jich ya xjuꞌ ya anaꞌik a te machꞌa yikꞌoj te Espíritu yuꞌun te Diose: Spisil te machꞌa ya yal ta jamal te la yichꞌ stiꞌbalul te Jesucristo jich tutꞌil winik, jaꞌ yikꞌoj te Espíritu yuꞌun te Diose.

³ Yan te machꞌa ma jichuk ya yal ta jamal te Jesuse, ma jaꞌuk yikꞌoj te Espíritu yuꞌun Diose, yuꞌun jaꞌ yikꞌoj te espíritu te skontrainej te Cristoe. Te jaꞌexe awaꞌiyejik te ya xtal te espíritu to, y te ora to ayix ta balmilal.

⁴ Kuntikil, te jaꞌexe jaꞌ yuꞌunex te Diose, y la atsalikix te jloꞌlawanejetik abi. Porke te machꞌa ay ta atojolike, jaꞌ mas bayal spoder ke ta machꞌatik ayik ta skuenta te balmilale.

⁵ Te stukelike skuentaik nax balmilal; jaꞌ yuꞌun te ya yalbeyik te tutik nax skuenta te balmilale. Y te machꞌatik ayik ta skuenta te balmilale, ya yaꞌibeyik te tut ya yalike.

⁶ Yan te joꞌotike, jaꞌ yuꞌunotik te Diose. Te machꞌa ya snaꞌbe sba te Diose ya me yaꞌibotik te tut ya kaltike, pero te machꞌa ma jaꞌuk yuꞌun te Diose ma xyaꞌibotik te tut ya kaltike. Jich ya xjuꞌ te ya jnaꞌtik te machꞌa yikꞌoj te Espíritu yuꞌun te tut batsꞌi jiche, y te machꞌa yikꞌoj te espíritu yuꞌun te jloꞌlawaneje.

Ay xkꞌuxul yoꞌtan te Diose

⁷ Kermanotak te kꞌuxex ta koꞌtane, ya skꞌan te talel bael te kꞌux ya kaꞌiy jbajtike, porke te xkꞌuxul-oꞌtanile ya xtal ta stojol Dios. Spisil te machꞌa ya xkꞌuxutaywane, jaꞌ xnichꞌan Dios y snaꞌojbe sba te Diose.

⁸ Te machꞌa ma xkꞌuxutaywane, ma snaꞌojbeyuk sba te Diose, porke te Diose ay xkꞌuxul yoꞌtan.

⁹ Dios a yakꞌ ta ilel te xkꞌuxul yoꞌtan ta jkuentatik te la stikonbotik tal ta balmilal te úniko Xnichꞌane, yuꞌun jich me ay jkuxlejaltik ta skuenta stukel.

¹⁰ Jich ya xchiknaj te kꞌuxul-oꞌtanile: Jaꞌ te ma joꞌukotik kꞌux a kaꞌitik te Diose, sino ke kꞌux a yaꞌiyotik stukel. Sok la stikon tal te Xnichꞌan yuꞌun la yakꞌ ta milbil majtanil, yuꞌun jich perdonado ya xjil te jmultike.

¹¹ Kermanotak te kꞌuxex ta koꞌtane, teme jich a xkꞌuxutayotik te Diose, jich ya skꞌan te talel bael ya jkꞌuxutay jbajtik te joꞌotike.

¹² Yuꞌun ni jtuluk machꞌa yiloj te Diose. Pero teme talel bael ya jkꞌuxutay jbajtike, Dios me jmel nax ay ta koꞌtantik, sok jich me ay xkꞌuxul koꞌtantik jich tutꞌil te xkꞌuxul yoꞌtane.

¹³ Jich ya jnaꞌtik a te ayotik ta stojol te Diose sok te ay ta jtojoltik stukele, yuꞌun jaꞌ yakꞌojbotik te Espíritu yuꞌune.

¹⁴ Te joꞌotike kilojtik te Jesucristoe, y ya kaltik ta jamal te Tatile la stikon tal te Xnichꞌan yuꞌun tal skoltay te machꞌatik ayik ta balmilale.

¹⁵ Machꞌauk a te ya yal ta jamal te jaꞌ Xnichꞌan Dios te Jesuse, kuxulix ta stojol Dios y Dios ayix ta yoꞌtan.

¹⁶ Jich a jnaꞌtikix sok jchꞌuunejtik te kꞌuxotik ta yoꞌtan te Diose. Ay xkꞌuxul yoꞌtan te Diose, y te machꞌa batsꞌi ay skꞌuxul yoꞌtane kuxulix ta stojol Dios y Dios ay ta yoꞌtane.

¹⁷ Jaꞌ yuꞌun te batsꞌi jich ay te xkꞌuxul koꞌtantike yuꞌun ay me smukꞌul koꞌtantik te tut kaalil te ya yichꞌelotik ta jkuentae. Porke te joꞌotike yipalotik ta aꞌtel ta balmilal jich tutꞌil aꞌtej te Jesucristoe.

¹⁸ Te ba ay te xkꞌuxul-oꞌtanile, maꞌyuk xiꞌel. Te xkꞌuxul-oꞌtanil te toj aye, ya xchoj lokꞌel ta fuera te xiꞌele. Yuꞌun te xiꞌele jaꞌ ya xꞌakꞌawan ta wokol. Jaꞌ yuꞌun teme ay machꞌa ya xiꞌe, yuꞌun ma to ayuk lek a te xkꞌuxul yoꞌtane.

¹⁹ Te joꞌotike kꞌux ya kaꞌiy jbajtik, porke nail a xkꞌuxutayotik te Diose.

²⁰ Teme ay machꞌa ya yal: “Te joꞌone kꞌux ya kaꞌiy te Diose”, teme xchie, y mismo tiempo a ya spꞌaj te yermanoe, jaꞌ jun jle-lot abi. Yuꞌun teme ay jtuluk te ma kꞌuxuk ya yaꞌiy te yermano te ya yile, ni ma xjuꞌ yuꞌun te kꞌux ya yaꞌiy te Dios te ma sta ta ilele.

²¹ Te Jesucristoe la yaꞌbotik te mantaliletik to: “Te machꞌa kꞌux ya yaꞌiy te Diose, kꞌux me ya yaꞌiy ekꞌa te yermanoe”, te xchie.