1 Juan 3 - Nuevo Testamento Tzeltal de Amatenango

Te yuntikil Dios

¹ Ila awilik te lom bayal a kꞌuxutayotik te Jtatik Diose te ya yalbotik te xnichꞌanotik te Diose, y yuꞌun nanix jich ayotik a. Jaꞌ yuꞌun te machꞌatik ayik ta skuenta balmilale ma snaꞌbotik jbajtik, yuꞌun ma snaꞌbeyik sba te Diose.

² Kermanotak te kꞌuxex ta koꞌtane, yal-xnichꞌanotikix te Diose. Aunke ma to jnaꞌtik te tut kileltik ta patile, jnaꞌojtik te kꞌalal ya xchiknaj tal te Jesucristoe, pajal ya xkꞌootik jachik tutꞌil stukele, porke ya me kiltik ta steklejal te tut yilele.

³ Y spisil te machꞌa jich yipal ta smaliyele, ya me slekutesik te yoꞌtanike, jich tutꞌil te lek yoꞌtan stukel te Jesucristoe.

⁴ Pero spisil te machꞌa ya sle smule, jaꞌ ya skꞌaxintaybe smantal te Diose, yuꞌun te le-mulile jaꞌ te ya yichꞌ kꞌaxintayel te smantale.

⁵ Te jaꞌexe anaꞌojikix te Jesucristoe tal ta balmilal yuꞌun tal xchꞌay te muliletike. Sok anaꞌojik te maꞌyuk smul stukele.

⁶ Jich yuꞌun, spisil te machꞌa jun nax ay sok te Jesucristoe, makꞌ sleix smul. Pero spisil te machꞌa ya sle smule, yuꞌun ma yilojuk y ni ma snaꞌojbeyuk sba.

⁷ Kuntikil, ma me ayuk machꞌa ya sloꞌlayex. Toj ay te machꞌa ya yaꞌtelin te tut leke, jich tutꞌil te Jesucristo te toj stukele.

⁸ Pero te machꞌa ya yaꞌtelin sleel smule, jaꞌ yuꞌun te pukuje. Porke te pukuje la sle smul desde ta slijkibal to tal. Jaꞌ yuꞌun te puersa a tal te Xnichꞌan Diose yuꞌun tal sjimbey te tut ya spas te pukuje.

⁹ Ni jtuluk te machꞌa xnichꞌan Dios ya yaꞌtelin sleel smule, porke jaꞌ yichꞌoj te kuxlejal yuꞌun Dios te jaꞌ aꞌbil yuꞌune. Jich ma spas ya sle smul porke jaꞌ xnichꞌan te Diose.

¹⁰ Chikan ta ilel machꞌatik te yuntikil te Diose y te machꞌatik yuntikil te pukuje. Porke machꞌauk te ma jaꞌuk ya spas te tut leke o teme ma kꞌuxuk ta yoꞌtan te yermanoe, ma jaꞌuk yuꞌun Dios abi.

Kꞌux me ya kaꞌiy jbajtik ta juju-tul

¹¹ Jaꞌ to jaꞌ skꞌoplal te awaꞌiyejik te jaꞌex desde ta slijkibal to tale: jaꞌ te kꞌux me ya kaꞌiy jbajtik ta juju-tule.

¹² Ma me jachikukotik tutꞌil te jCaine, te jaꞌ yuꞌun te pukuje y la smil te yijtsꞌine. ¿Y tuꞌun te la smile? Porke ma lekuk te tut a te la spas te jCaine, y puru lek ay te tut la spas te yijtsꞌine.

¹³ Kermanotak, ma me tut xyal awoꞌtanik teme ya spꞌajex te machꞌatik ayik ta skuenta te balmilale.

¹⁴ Te joꞌotike kꞌaxemotikix a ba ay te lajele, sok ayotikix ta skuenta kuxlejal. Y jnaꞌotik porke kꞌux ya kaꞌitik te kermanotaktike. Te machꞌa ma kꞌuxuk ya yaꞌiy te yermanoe, chamen kꞌoem.

¹⁵ Spisil te machꞌa ya spꞌaj te yermanoe, jaꞌ jmilaw abi. Y te jaꞌexe anaꞌojik te ni jtuluk jmilaw ya xjuꞌ ya sta te kuxlejal sbajtel kꞌinal stukele.

¹⁶ Jnaꞌojtik tut a te slekil-oꞌtanile, porke te Jesucristoe la yakꞌ xkuxlejal ta jkuentatik. Jich euk te joꞌotike, ya skꞌan ya kakꞌ jkuxlejaltik yuꞌun te kermanotaktike.

¹⁷ Yuꞌun teme ay jtuluk te jkꞌuleje y ya yil te yermano te ay tut puersa ya skꞌan koltayele, pero teme makꞌ ya yaꞌbeye, ¿tutꞌil kꞌan ayuk skꞌuxul yoꞌtan Dios ta yoꞌtan?

¹⁸ Kuntikil, ma me jaꞌuk nax te ya kaltik te ay skꞌuxul koꞌtantike, sinoke ya skꞌan ya xchiknaj ta skuenta te tut ya jpastike.

Ay smukꞌul koꞌtantik ta stojol te Diose

¹⁹ Te jich aye, jnaꞌojtik te yuꞌunotik te tut batsꞌi jiche, y jich ya kaꞌitik ta koꞌtantik te seguro ayotik ta stojol te Diose.

²⁰ Yuꞌun teme ya yalbotik te koꞌtantike te ay palta kuꞌuntike, te Diose lom mukꞌ ke te koꞌtantike, sok snaꞌoj ta spisil.

²¹ Kermanotak te kꞌuxex ta koꞌtane, teme maꞌyuk tut ya yalbotik te koꞌtantike, ay smukꞌul koꞌtantik ta stojol te Diose.

²² Sok jich me ya yaꞌbotik spisil te tut ya jkꞌanbetike, porke jchꞌuunejbetik te mantaliletik yuꞌune y ya jpastik te tut lek ya yile.

²³ Y te smantale, jaꞌ te ya jchꞌuuntik te Xnichꞌane, jaꞌ te Jesucristoe. Y te kꞌux ya kaꞌiy jbajtik ta juju-tule, jachik tutꞌil te la yalbotik mantale.

²⁴ Te machꞌatik ya xchꞌuunbe te smantal Diose, kuxulik ta stojol, sok Dios ayix ta yoꞌtanik ekꞌa. Y jich jnaꞌojtik te ayix ta koꞌtantik: ta skuenta te Espíritu te la yaꞌbotike.