1 Juan 2 - Nuevo Testamento Tzeltal de Amatenango

Te Cristoe jaꞌ ya xkꞌopoj kuꞌuntik

¹ Kuntikil, ya jtsꞌibabeyex te tutik to yuꞌun jich me makꞌ ya xmulawex a. Aunke teme ay machꞌa ya sle smul, ay jtul Machꞌa ya xkꞌopoj kuꞌuntik ta sit te Tatile, jaꞌ te Jesucristoe, te toj ay stukele.

² Te Jesucristoe la yakꞌ sba ta smajtan Dios yuꞌun jich la spasbelotikix perdon yuꞌun te jmultike. Y ma joꞌukotik nax, sino ke ta spisil te machꞌatik ayik ta balmilal.

³ Teme ya jchꞌuunbetik te mantaliletik yuꞌun te Diose, ya xjuꞌ seguro ayotik te jnaꞌojbetikix sbae.

⁴ Pero teme ay machꞌa ya yal: “Te joꞌone jnaꞌojbe sba”, te xchie, y ma xchꞌuunbe te mantaliletik yuꞌune, jaꞌ jtul jloꞌlawanej y maꞌyuk ta stojol te tut batsꞌi jiche.

⁵ Yan te machꞌa ya yakꞌ ta jkuenta te skꞌope, yuꞌun nanix kꞌuxix ta yoꞌtan abi. Y teme jich aye, jnaꞌojtik te jun nax ayotik sok te Diose.

⁶ Te machꞌa ya yal te jun nax ayix sok te Diose, jich ya skꞌan xkuxuyin jachik tutꞌil kuxuyin te Jesucristoe.

Te achꞌ mantale

⁷ Kermanotak, ma achꞌ mantaluk te ya jtsꞌibabeyexe; jaꞌ mismo te la awichꞌik ta slijkibal to tale. Te namey mantal to, jaꞌ te awaꞌiyejbeyik skꞌoplale.

⁸ Pero, jaꞌ to te ya jtsꞌibabeyexe, jaꞌ te jun mantal te yachꞌile, te batsꞌi jich a kꞌot yuꞌun te Cristo sok jachik tutꞌil te jaꞌexe. Porke te ijkꞌal kꞌinale ya xkꞌaxix bael, y ya xtilix te sakil kꞌinal te batsꞌi jiche.

⁹ Teme ay machꞌa ya yal te ayix ta sakil kꞌinale, pero teme ya spꞌaj te yermanoe, yuꞌun nanix ay to ta ijkꞌal kꞌinal a.

¹⁰ Te machꞌa kꞌux ya yaꞌiy te yermanoe, ayix ta sakil kꞌinal, y ni maꞌyukix te tut ya syalesot ta mulil yuꞌune.

¹¹ Pero te machꞌa ya spꞌaj te yermanoe, ay ta ijkꞌal kꞌinal sok teꞌ ya xbeen a. Y ma snaꞌ te ba ya xbajte, porke te site makbil yuꞌun te ijkꞌal kꞌinale.

¹² Kuntikil, la jtsibabeyex ta akuentaik to porke te Dios la spasbelexix perdon te amulike ta skuenta te Jesucristoe.

¹³ Meꞌil-tatiletik, la jtsꞌibabeyex ta akuentaik porke la anaꞌbeyikix sba te Machꞌa ayix a desde ta slijkibale. Bikꞌtal kermetik, la jtsꞌibabeyex ta akuentaik porke la atsalikix te pukuje. La jtsꞌibabeyex ta akuentaik, kuntikil, porke la anaꞌbeyikix sba te Tatile.

¹⁴ La jtsꞌibabeyex ta akuentaik, meꞌil-tatiletik, porke la anaꞌbeyikix sba te Machꞌa ayix a desde ta slijkibale. La jtsibabeyex euk te jaꞌexe, biktal kermetik, porke ay yip awoꞌtanik y la achꞌuunikix te skꞌop Dios ta awoꞌtanike, sok la atsalikix te pukuje.

¹⁵ Ma me jaꞌuk kꞌux ya awaꞌiy ta awoꞌtanik te balmilale ni te tutik ay ta balmilale. Teme ay machꞌa kꞌux ya yaꞌiy ta yoꞌtan te balmilale, ma jaꞌuk kꞌux ta yoꞌtan te Jtatik Diose.

¹⁶ Porke te tut ya yakꞌ te balmilale, ma jaꞌuk ya xtal ta stojol te Jtatik Diose. Jaꞌ ya yakꞌ te balmilale te tutik ma lekuk ya skꞌan te stiꞌbalul gentee, sok te sbikꞌtal yoꞌtan te sitike, y sok te toybajel yuꞌun te kꞌulejalile.

¹⁷ Pero te balmilale yipal bael ta lajel, y sok spisil te tut ma lekuk ta kꞌanele. Yan te machꞌa jaꞌ ya spasbe te tut ya skꞌan yoꞌtan te Diose, ya xkuxuyin sbajtel kꞌinal stukel.

Te tut batsꞌi jiche y te le-lote

¹⁸ Kuntikil, jaꞌ to jaꞌ slajibalix kꞌaal. Te jaꞌexe awaꞌiyejikix te ay jtul ya xtal te jaꞌ skontrainej te Cristoe. Te ora to ayix bayal machꞌa skontrainej te Cristoe. Jaꞌ yuꞌun jnaꞌojtik te jaꞌ slajibalix kꞌaale.

¹⁹ Te stukelike lokꞌik tal ta koliltik. Pero yuꞌun nanix ma joytikuk a. Te yuꞌunuk joytikuke, maꞌ lokꞌ bael ta koliltik te jichuke. Pero jicha kꞌot ta pasel yuꞌun te ya xchiknaj ta jamal a te ma joy jbajtikuke.

²⁰ Te Cristoe jaꞌ a yaꞌbeyex te Chꞌul Espiritue, y ta apisilik te jaꞌexe jich ay ta awoꞌtanik te tut batsꞌi jiche.

²¹ La jtsꞌibabeyex ito, ma yuꞌunuk maꞌ anaꞌojikuk te tut batsꞌi jiche, sino ke anaꞌojikix. Y te jaꞌexe anaꞌojikix te ni junuk te lot ya xjuꞌ xtal yuꞌun te tut batsꞌi jiche.

²² ¿Machꞌa a te jloꞌlawaneje? Jaꞌ te machꞌa ya yal te ma jaꞌuk Cristo te Jesuse. Jaꞌ bi, jaꞌ skontra te Cristoe, yuꞌun ma xyakꞌ ta akꞌel ta jkuenta te Tatile sok te Nichꞌanile.

²³ Machꞌauk a te ma xyakꞌ ta jkuenta te Nichꞌanile jich ma xyakꞌ ta jkuenta ekꞌa te Tatile. Pero te machꞌa ya yal ta jamal te Nichꞌanile, jich ya yal ta jamal euk te Tatile.

²⁴ Jaꞌ yuꞌun, te jaꞌexe kꞌeja ta awoꞌtanik te skꞌoplal la awaꞌiyik desde ta slijkibal to tale. Teme ayix jilel ta awoꞌtanik te tut la awaꞌiyik desde ta slijkibal to tale, jun nax ayex sok te Nichꞌanile y sok te Tatile ta jmel nax.

²⁵ Jaꞌ to jaꞌ yalojbotikix te Jesucristoe te ya yakꞌ te kuxlejal sbajtel kꞌinale.

²⁶ Jaꞌ a jtsꞌibabeyex te tutꞌil ay skꞌoplal te machꞌatik snopoj te ya sloꞌlayexe.

²⁷ Pero te jaꞌexe awikꞌojik te Chꞌul Espiritue te jaꞌ yakꞌojbeyex te Jesucristoe, y ma puersauk te ay machꞌa ya snopesexe. Porke jaꞌ mismo te Espíritu te ya snojpesex ta spisil te tutik aye. Y te ya snojpeswane, batsꞌi jich y ma lotuk. Jun nax me xꞌanex sok te Cristo ta jmel nax, jich tutꞌil la snojpesex te Espiritue.

²⁸ Te ora to, kuntikil, jun nax xꞌanex sok te Cristo ta jmel nax. Yuꞌun me jun koꞌtantik a te kꞌalal ya xchiknaj tale, y jich makꞌ jtajtik kꞌexlal ta sit stukel te kꞌalal ya xtale.

²⁹ Te jaꞌexe anaꞌojikix te Jesucristoe toj stukel, sok ya skꞌan ya anaꞌik euk te jaꞌ yal-xnichꞌan Dios spisil te machꞌatik toj te tutꞌ ya spasike.