1 Corintios 9 - Nuevo Testamento Tzeltal de Amatenango

Te tut ya xjuꞌ ya yichꞌ te jtul apostole

¹ ¿Me yuꞌun ma apostolukon? ¿Me yuꞌun ma libreuk ayon? ¿Me yuꞌun ma kilojuk te Kajwaltik Jesuse? Y te jaꞌexe, ¿meꞌn ma kaꞌtelukex ta skuenta te Kajwaltike?

² Ay ni machꞌa ma snaꞌ te apostolone. Pero te jaꞌexe anaojbeyik sluwar te apostolone, porke jaꞌ señaex te tutꞌil la achꞌuunik te Kajwaltike ta jkuentae.

³ Jaꞌ sujtib jkꞌop yuꞌun te machꞌatik ya yalik te ma jichuk te tutik ya jpase.

⁴ Ya xjuꞌ ya kichꞌ spisil te tut ya jweꞌ-kuchꞌe,

⁵ y sok ya xjuꞌ ya kikꞌ ta beel kinam te jchꞌuunej Dios sok te ayuke. Jich tutꞌil ya spas te yanetik apostoletike, y sok te yijtsꞌinab Kajwaltike y sok euk te jPedroe.

⁶ ¿Me yuꞌun akuyojik te joꞌon nax sok te jBernabe te ma xjuꞌ te ya kichꞌtik makꞌlinel te ba ay ya xkꞌaxotik ta aꞌtele?

⁷ Jich tutꞌil te machꞌa ay ta soltaroile, ¿me yuꞌun stukel ya sman te tut ya xtuun yuꞌune? Sok te machꞌa ya stsꞌun yubae, ¿meꞌn ma teyuk ya sta sweꞌel a? Sok te machꞌa ya smakꞌlin te skarneraetike, ¿me ma jaꞌuk ya xtuun yuꞌun te xlech ya yakꞌe?

⁸ Ma me xꞌawalik te jaꞌ nax jich snopoj te gentee, porke jich ya yal euk te mantaliletik yuꞌun te jMoisese.

⁹ Yuꞌun jich tsꞌibabil jil yuꞌun ta sjunal te mantaliletike: “Ma me awaꞌbe sbosal te wakax te ya stekꞌ triwue”, xchi me. ¿Me yuꞌun jaꞌ nax bayal yajtal yoꞌtan Dios yuꞌun te wakaxetike?

¹⁰ Yuꞌun joꞌotik jkꞌoplaltik euk. Porke te mantaliletike la stsꞌibay yuꞌun joꞌotik ta jkajtik. Yuꞌun te machꞌa ya sjokꞌbe slumile y sok te machꞌa ya stekꞌbe sit te triwue ya me skꞌan junuk yoꞌtan ya smaliy te ya yichꞌbe sit te yaꞌtele.

¹¹ Jich te joꞌotike la jtsꞌuntik ta akuentaik te jun tsꞌunubil skuenta te achꞌulelike. ¿Me ma lekuk ya awaꞌiyik te yauk jkꞌanbetikex te tut ya xtuun kuꞌuntik sok te jtiꞌbalultike?

¹² Teme ay yanetik te ya awaꞌbeyike, mas to ay rason te ya awaꞌbotike. Pero maꞌyuk a jkꞌantik te jich ya kichꞌtik pasbeyel awuꞌunike, y jich kujchem tal kuꞌuntik spisil te jwokoltike, yuꞌun jich maꞌyuk tut ya smak a te ya kaltik te lek achꞌ kꞌop yuꞌun te Cristoe.

¹³ Te jaꞌexe anaꞌojik te machꞌatik ya xꞌaꞌtejik ta xchapel tutik ta temploe, jaꞌ ya sweꞌik te tut ay ta temploe. Jaꞌ xyal, te machꞌatik ya xchapik te altar te ba ya xꞌaꞌbot smajtan Diose, ya sweꞌbeyik te stiꞌbalul chambalam te teꞌ ya smilik aye.

¹⁴ Jaꞌ nax jich euk te Kajwaltike la yal mantal te machꞌatik ya yalik te lek yachꞌil kꞌop yuꞌun te kolele, teꞌ me ya sta a te tut ya xtuun yuꞌunike.

¹⁵ Pero te joꞌone maꞌyuk ba jich a jkꞌan a kichꞌ te tut ay ta ichꞌele. Ni te jich a jtsꞌibabeyexe yuꞌun ay tut ya jkꞌanbeyex chꞌinuk. Jaꞌ lek chamukon nail yuꞌun ma jkꞌan ya xchꞌay te tut lom bujtsꞌan kꞌinal ya kaꞌiy yuꞌune.

¹⁶ Te joꞌone ma sluwaruk te mukꞌ ya kakꞌ jba te ayon ta yalel te lek achꞌ kꞌop yuꞌun te kolele, porke jaꞌ nax yipalon ta spasel te tut albilon ta spasele. ¡Oꞌol me jba teme makꞌ ya kal te lek achꞌ kꞌope!

¹⁷ Jaꞌ yuꞌun, teme jaꞌ nax ya jpas te tut ya skꞌan koꞌtane, ya xjuꞌ ya jkꞌan jtojol a te jichuke. Pero te tutꞌil albilon mantal te jich ya skꞌan jpase, junuk me koꞌtan ya jpas te tut ya yalbon te Diose.

¹⁸ Jich yuꞌun te jtojole jaꞌ te bujtsꞌan kꞌinal ya kaꞌi yuꞌun te ma tojbilukon ya kal te lek achꞌ kꞌop yuꞌun te kolele. Manchuk teme ya xjuꞌ ya yichꞌ kꞌanel te tut ya xtuun kuꞌun te tutꞌil ayon ta yalel te skꞌop Diose, maꞌyuk tutꞌ yakon ta skꞌanel.

¹⁹ Aunke maꞌyuk machꞌa smosoinejon, pero kakꞌoj jba ta mosoil yuꞌun spisil, yuꞌun jich me ya jpas ganar bayal ta jtul te ya xchꞌuunik Cristo ta jkuentae.

²⁰ Te kꞌalal ayon ta yolilik te juriyoetike, jich ya kakꞌ jba tutꞌ juriyo, yuꞌun jich me ya jpasbe ganar a. Jaꞌ bi, skuenta ya jpas ganar te machꞌatik aylan ta skuenta te mantaliletik yuꞌun te jMoisese, jich mismo ya kakꞌ jba euk ta skuenta te mantaliletike, aunke maꞌyukonix ta skuenta te mantaliletike.

²¹ Sok ay yan te tutꞌ ya jpasbe ganar te machꞌatik maꞌyuk ta skuenta te mantaliletik yuꞌun te jMoisese, jich me ya kakꞌ jba te tutꞌ ayike. Aunke jchꞌuunej te mantaliletik yuꞌun Diose, yuꞌun jaꞌ jchꞌuunejix te smantal Cristoe.

²² Te kꞌalal ayon te ba ay te machꞌatik maꞌyuk spuersa xchꞌuunel yoꞌtanike, jich ya kakꞌ jba euk te tutꞌil maꞌyuk jpuersa, yuꞌun jich ya jpasbe ganar ekꞌa. Jich pajal nax a kakꞌ jba ta spisil yuꞌun jich me ya xjuꞌ te ay machꞌa ya xkol a.

²³ Jich ya jpas ta spisil to ta skaj te lek achꞌ kꞌop yuꞌun te kolele, yuꞌun jich mismo pajal ya xkolon sok a.

²⁴ Te jaꞌexe anaꞌojik teme ay jun jꞌalawe spisilik ya xꞌanimajik. Pero úniko jtul nax te ya yichꞌ smajtan yuꞌun ya yaꞌiy tsalawe. Lek ay, animajanik me ta apisilik, jich me ya xkꞌo ata te amajtanike.

²⁵ Te machꞌatik ya xchap sbaik ta tajmale, ya skom spisil te tut a te ya xꞌixlanot yuꞌune. Y jich ya spasik to yuꞌun jich me ya staik smajtan koronaik te pasbil ta yanimal teꞌ te ma xjalaje. Yan te joꞌotike, ya jpastik puersa yuꞌun jich ya jtajtik te jun majtanil te ma xlaje.

²⁶ Te joꞌone, ma jichuk ya xꞌanimajon tutꞌil te machꞌa ma xyil ba ya xbajte. Ni ma jichukon te tutꞌil machꞌa ya stsalawan ta tajmal te jowil nax ya yakꞌ te skꞌabe.

²⁷ Ma jichuk, ya kaꞌbe swokol te jtiꞌbalule y ya jsuj te ya xchꞌuunbone. Yuꞌun ma me joꞌukon mismo ya xchꞌayon jilel ta patil te tutꞌil la jnojpeslan te yane.