1 Corintios 8 - Nuevo Testamento Tzeltal de Amatenango

Te weꞌelil te aꞌbil ta smajtan te lotil diosetike

¹ Te ora to jaꞌ ya kalbeyex te tutꞌil ay skꞌoplal te weꞌeliletik te ya xꞌakꞌot ta skuenta te lotil diosetike. Batsꞌi jich te tut ya xꞌalote te jpisiltik pꞌijubenotik. Pero ay ya jtoy jbajtik yuꞌun te pꞌijiltike. Yan teme ay slekil koꞌtantike jaꞌ ya yakꞌ lekubotik ta skuenta Espíritu.

² Teme ay machꞌa ya skuy te ayix tut ya snaꞌe, pero ma to snaꞌojuk lek, jich tutꞌil ya skꞌan ya snaꞌe.

³ Pero teme ay machꞌa kꞌux ya yaꞌiy ta yoꞌtan te Diose, Dios ya xnaꞌbot sba yuꞌun.

⁴ Te ora to te tutꞌil ay te weꞌelil ya xꞌakꞌot ta smajtan te lotil diosetike, jnaꞌojtikix ta lek ni maꞌyuk tut ya xjuꞌ yuꞌun ta balmilal te jun lotil diose. Sok jnaꞌotik te úniko jtul Dios ay.

⁵ Manchuk me ay machꞌa ya yal te ay diosetik ta chꞌulchan sok ta balmilal, yuꞌun ay bayal te kuybilik ta diose te ya yichꞌ ajwalinel yuꞌunike.

⁶ Yan te joꞌotike, jtul nax te Diose kuꞌuntike, jaꞌ te jTatike. Jaꞌ te spasoj spisil te tutik aye y jaꞌ stukel te ya yakꞌ xkuxuyinotike. Y ay jtul nax te Kajwaltike, jaꞌ te Jesucristoe. Stukel ta skuenta spisil te tutik kuxajtike, jich euk te joꞌotike jaꞌ kuxulotik ta skuenta.

⁷ Pero ma spisiluk te jich snaꞌojik to. Ay jtul-cheb te jich kꞌayemik ta xchꞌuunel te lotil diosetike. Jaꞌ yuꞌun teme ya sweꞌ te weꞌeliletike, ya to snaꞌ te jaꞌ aꞌbil ta smajtan te lotil diosetike. Skaj te ma to ayuk spuersa yoꞌtanike, jaꞌ ya yalik te teꞌ ya xmulawik a te ya sweꞌelinik te sobrail weꞌelil yuꞌun te lotil diose.

⁸ Ma jaꞌuk te ma lekukotik ta stojol Dios yuꞌun te tutꞌ ya jweꞌtike. Yuꞌun ma jaꞌuk lek ya xkꞌootik yuꞌun te tutꞌ ya jweꞌtike o te tutꞌ makꞌ jweꞌtike.

⁹ Pero koma me abaik te tutꞌil ayex ta libree yuꞌun te tutꞌ ya xweꞌexe. Ma me teyuk ya sta smul a te machꞌatik ma to ayuk spuersa sok te xchꞌuunel yoꞌtane.

¹⁰ Porke te jaꞌate, te ya anaꞌbeyix te jich ay sluware, teme ba anajkan aba ta weꞌel, te baꞌ ay sna te lotil diosetike, pero teme la yilat jtul hermano te ma to ayuk spuersa yoꞌtane, ay me jich ya xkꞌot ta pasel ekꞌa te ya xba sweꞌbey te tut aꞌbil smajtanin te jtul lotil diose.

¹¹ Jich te jaꞌate, yuꞌun te anaꞌojbeyix sluware, jich ya awakꞌ bael te chꞌayel te awermano te ma to ayuk spuersa yoꞌtane, te jaꞌ chamen Cristo yuꞌune.

¹² Te tutꞌil ya awakꞌ ejchꞌenajuk yoꞌtanik te hermanoetik te maꞌ to ayuk spuersa yoꞌtanik ta xchꞌuunel te Diose, jich mismo la ata amulik ta stojol te Cristoe.

¹³ Jaꞌ yuꞌun, teme ta skaj jweꞌel te ya kakꞌ yaluk ta mulil te kermanoe, jaꞌ lek te makꞌ jweꞌ te weꞌele, yuꞌun jich makꞌ xyal ta mulil ta jkuenta a.