1 Corintios 7 - Nuevo Testamento Tzeltal de Amatenango

Tsitsel yuꞌun te nujpunele

¹ Te ora to ya me kaꞌbeyex tal sujtib te tut la ajojkꞌobonik ta karta la apasik tale. Lek teme makꞌ sle yinam te winike.

² Pero ta skaj te ay antsiwejele, ta juju-tul ya skꞌan te ayuk batsꞌi yiname y ta juju-tul te antse ya skꞌan te ayuk batsꞌi smamlale.

³ Y jich te winike sok te antse ya skꞌan te ya xchꞌuun spasel te tutꞌil ay te nujpuneme.

⁴ Te antse ma yuꞌuninejuk te stiꞌbalule. Jaꞌ japubil yuꞌun te smamlale. Jich ekꞌa te mamlalile ma yuꞌuninejuk te stiꞌbalule. Jaꞌ japubil yuꞌun euk te yiname.

⁵ Jaꞌ yuꞌun ma me talel-baeluk te maꞌ ba ya akꞌopon abaike. Jaꞌ nax teme ya achap akꞌopik te makꞌ ata abaik ipal kꞌaal, yuꞌun te ya akꞌoponik Diose. Ta patil ya xjuꞌ ya sujt ata abaik. Yuꞌun ma me teyuk ya sloꞌlayelex yuꞌun a te pukuje te ya yaꞌbelex ale amul yuꞌune.

⁶ Spisil to te la kalbeyexe ma yuꞌunuk ya kal mantal. Jaꞌ nax ya kꞌakꞌ ta naꞌel teme ay jichuk ya skꞌan awoꞌtanike.

⁷ Te ya kal joꞌone, jaꞌ lek te jichuk ay spisil winketik te tutꞌilone. Pero Dios jich a yakꞌ ta juju-tul skajal-skaj tutꞌ ay smajtan. Te yane ya xjuꞌ yuꞌun, y ay yan ma xjuꞌ yuꞌun.

⁸ Te solteroetike y sok te biudaetike ya kaltalanbe te jaꞌ lek te jichuk makꞌ xnujpun jich tutꞌilone.

⁹ Pero teme ma xjuꞌ yuꞌun sok te stiꞌbalule, a me nujpunikuk. Yuꞌun jaꞌ mas lek te nujpuneme; jaꞌ ma tsaꞌamuk teme ay ta wokol yuꞌune.

¹⁰ Pero te machꞌatik nujpunemikixe, ya kaltalanbe te mantal o te ma joꞌukon kuꞌune, jaꞌ smantal te Kajwaltike: Te antse ma me wakꞌ xchꞌoj jilel te smamlale.

¹¹ Teme ay ants te ya xchꞌoj sba sok te smamlale, jich me a tekꞌluk, o ya xpajt yoꞌtan sok ta patil te smamlale. Jaꞌ nax jich mismo euk te mamlalile, ma me wakꞌ xchꞌoj te yiname.

¹² Yan te yane, ay tut ya kalbe, joꞌon te jich ya kale y ma jaꞌuk jich yaloj te Kajwaltike: Teme ay jtul hermano teme ma xchꞌuunejuk Dios te yiname, ma me wakꞌ xchꞌoj sba sok teme jun yoꞌtan ya xkuxuyin soke.

¹³ Y teme ay jtul hermano ants teme ma xchꞌuunejuk Dios te smamlale, ma me wakꞌ xchꞌoj sba sok teme jun yoꞌtan ya xkuxuyin soke.

¹⁴ Yuꞌun te mamlalil teme ma xchꞌuunejuk Diose, lekutesbilix kꞌoem ekꞌa ta skꞌaj te jun nax ay sok yinam te xchꞌuunej Diose. Y jich euk te ants teme ma xchꞌuunejuk Diose, lekutesbilix kꞌoem ekꞌa ta skaj te jun nax ay sok smamlal te xchꞌuunej Diose. Te manchuk jichuke, te awuntikilik te jaꞌexe, jich aylan te tutꞌil ma xchꞌuunejuk Diose. Pero to uꞌuninbilikix yuꞌun te Diose.

¹⁵ Yan teme winik o ants te ma xchꞌuunejuk Diose ya skꞌan xchꞌoj sba, a me spasik. Teme jich ya xkꞌote, libre me ya xjil stukel te machꞌa xchꞌuunej Diose. Porke Dios la yikꞌex te jaꞌexe yuꞌun me bujtsꞌan kꞌinal ya xkuxuyinex.

¹⁶ ¿Tutꞌil ya anaꞌ jaꞌex antstik teme ya xjuꞌ xkol awuꞌun te amamlale? Jichex euk winketik, ¿tutꞌil ya anaꞌ teme ya xkol awuꞌun te awiname?

¹⁷ Pero chikan tutꞌil ayotik ta juju-tul te tut majtanil yakꞌojbotik te Kajwaltike. Y jich ya skꞌan xꞌanotik te tutꞌil ayotik kꞌalal la yikꞌotik te Diose. Jaꞌ to jaꞌ mantal te jich a kalbey ta spisil te juju-tijkꞌ hermanoetike.

¹⁸ Teme ma machꞌa ya xꞌikꞌot yuꞌun Dios te yichꞌoj sirkunsisione, jich me a anuk abi. O teme jaꞌ ya xꞌikꞌot te machꞌa ma yichꞌojuk sirkunsisione, ma me spasix ya yichꞌ sirkunsision.

¹⁹ Porke ma tulanuk skꞌoplal teme kichꞌojtik o ma kichꞌojtikuk sirkunsisione. Yan te tut ben tulan skꞌoplale jaꞌ te ya jchꞌuunbetik te mantaletik yuꞌun te Diose.

²⁰ Ta juju-tul jich ya skꞌan xꞌanotik te tutꞌil ayotik a te kꞌalal la yikꞌotik te Diose.

²¹ Teme la yikꞌelat te ayat ta jmosoil aye, maꞌ me awakꞌ yajtal awoꞌtan yuꞌun. Teme ya ata te tutꞌil ya xjuꞌ ya xjilat ta libree, akꞌa me aba ta libre abi.

²² Yuꞌun teme ay machꞌa ay ta mosoil a te kꞌalal ikꞌot ta xchꞌuunel te Kajwaltike, te ora to libre ayix ta winikil te ya xtuuntesot yuꞌun te Kajwaltike. Y jaꞌ nax jich te machꞌa libre ay ta winikil a te kꞌalal ikꞌote, te ora to jaꞌ mosoix yuꞌun te Cristoe.

²³ Dios la smanex te jaꞌex te lom toyol a stojexe. Ma me awakꞌ abaik ta mosoil yuꞌun jtul xan winik.

²⁴ Jich yuꞌun, kermanotak, ta juju-tul jich me xꞌawakꞌ abaik ta stojol Dios jich tutꞌil ayex te kꞌalal la yikꞌexe.

²⁵ Te ora to ya kalbeyex te tutꞌil ayik te machꞌatik ma to nujpunemuke. Maꞌyuk ba kaꞌiyojbe smantal ya yal te Kajwaltike, pero ya kal te tut jnopoje, sok ya xjuꞌ ya achꞌuunik te tutꞌil kichꞌoj kꞌuxutayel yuꞌun te Kajwaltike.

²⁶ Te joꞌone lek ya kaꞌiy te jichuk ya xjil te winik te tutꞌil aye. Pero ta skaj te tiempo te wokolix ya xkuxuyinotike,

²⁷ teme ay awiname, ma me achꞌoj jilel. Y teme maꞌyuk awiname, ma me ale awinam.

²⁸ Teme nujpunate, ma me ayukat ta mulil yuꞌun. Y teme ay jtul soltera te ya xnujpune, ma me ayuk ta mulil. Pero te machꞌatik ya xnujpune, ya me sta swokol te xkuxlejalike. Te joꞌone jaꞌ ya jkꞌan te maꞌyuk machꞌa ya sta swokole.

²⁹ Kermanotak, te tut ya jkꞌan kalbeyexe, jaꞌ te maꞌyukix ipal kꞌaal. Jaꞌ yuꞌun, te jayebex te nujpunemex jich me awakꞌ anukex te tutꞌil maꞌyuk awinamike.

³⁰ Te jayebex te ayex ta okꞌele, jich me xꞌanex te tutꞌil maꞌyukex ta okꞌele. Y te jayebex te jun awoꞌtanike, jich me skꞌan xꞌanex te tutꞌil ay machꞌa ma junuk yoꞌtane. Te jayebex te ay tut ya amanike, jich me skꞌan xꞌanex te maꞌyuk tut amanojike.

³¹ Y te jayebex ay tut ya atuuntesik tut ay liꞌ ba balmilale, jich me skꞌan xꞌanex te tutꞌil maꞌyuk tut ya atuuntesike. Porke te balmilal to te ya kiltike ya me xlaj jilel stukel.

³² Ya jkꞌan te libreuk ayex te jaꞌexe yuꞌun te ajtal-oꞌtanile. Te machꞌa soltero aye, jaꞌuk baem ta yoꞌtan te tutik skuenta te Kajwaltike, sok jaꞌ nax ya xbajt ta yoꞌtan spasel te tutꞌ lek yoꞌtan yuꞌun.

³³ Pero te machꞌa nujpuneme jaꞌ ya xbajt ta yoꞌtan te tutik skuenta te balmilale y sok te tutꞌ lek yoꞌtan yuꞌun te yiname.

³⁴ Jich cheb te tut ya xnitot yuꞌune. Jaꞌ nax jich te ants te ma nujpunemuke y sok te soltera aꞌchetike, jaꞌ baem ta yoꞌtanik te tutik skuenta te Kajwaltike, yuꞌun jich yuꞌun Dios ya xkꞌot te stiꞌbalule y sok te xchꞌulele. Pero te ants nujpuneme, jaꞌ nax baem ta yoꞌtan te tutik skuenta te balmilale sok te tut lek yoꞌtan yuꞌune te smamlale.

³⁵ Te tutꞌil jich a kalbeyex to, yuꞌun alekilik a te jaꞌexe, ma yuꞌunuk ay tut wokol ya kakꞌ ta akuentaik. Yuꞌun ya jkꞌan te lek ya xkuxuyinex a, sok te jun awoꞌtanik ya awakꞌ abaik ta abatinel ta stojol te Kajwaltike.

³⁶ Teme ay machꞌa ya snop te ya yakꞌ nujpunukix te yachꞌix te kꞌanbilixe, yuꞌun la staix yaꞌbilal te ya xnujpune, a me spas teme jich ya skꞌane. Nujpunanik me, yuꞌun ma muliluk te nujpunele.

³⁷ Y teme ay yan, teme ma puersauk ya yaꞌiye sok teme jich snopoj ta yoꞌtan te makꞌ xnujpun te yachꞌixe, ay ta libre yuꞌun te tutꞌ snopoje. Lek te makꞌ xnujpun stukel.

³⁸ Jich yuꞌun, te machꞌa ya yakꞌ nujpunuk te yantsil-nichꞌan teme kꞌanbilixe, lek te tut ya spas. Pero teme ma to xyakꞌ nujpunuke, jakꞌax lek te tut ya spas stukel.

³⁹ Te ants te nujpunemixe chukul kꞌoem sok te smamlal te jayeb kꞌaal kuxulike. Pero teme cham te winike, te antse libre ya xjil yuꞌun. Chikan yoꞌtan stukel teme ya to xnujpun xan, teme pajal xchꞌuunejik te Diose.

⁴⁰ Pero te ya kale, jaꞌ ben jun yoꞌtan te jichuk te makꞌ xnujpunixe. Jaꞌ ito joꞌon te jich ya kale, y jchꞌuunej te ay ta koꞌtan te Espíritu yuꞌun te Diose.