1 Corintios 6 - Nuevo Testamento Tzeltal de Amatenango

Ya yakꞌ sbaik ta meltsaanel ta stojol alkal te ma xchꞌuunejuk Diose

¹ Teme ay akontrainej abaik sok teme ay jtulukex ya akꞌanik parte, ¿tuꞌun te ya xba akꞌanik meltsaanel ta stojol alkal te ma xchꞌuunejuk Diose? ¿Tuꞌun te ma teyuk xba akꞌanik meltsaanel te ba ay te pajal achꞌuunej sok Diose?

² ¿Me yuꞌun maꞌ anaꞌojikuk te jaꞌex yuꞌunex te Diose te ya to xchapawanex ta patil ta balmilale? Te jaꞌexe ya me smeltsaanwanex ta balmilal ta patil, ¿me yuꞌun ma xjuꞌ awuꞌunik xchapel te tut ma tulanuk skꞌoplal ta ora to?

³ ¿Meꞌn ma xꞌanaꞌik te joꞌotik ya xchapawanotik ta stojol euk te chꞌul angeletike? Yuꞌun teme jiche, ¿jaꞌukix ma xjuꞌ awuꞌunik xchapel a te tutꞌ kuxulotik to ta balmilale?

⁴ Jich yuꞌun, teme jaꞌex te ay akꞌopik ta skuenta nax te akuxlejalik ta balmilale, ¿tuꞌun te ya xba akꞌanik meltsaanel ta stojol alkal te ni ma snaꞌbeyik sluwar te tutꞌil jchꞌuunejtik te Diose?

⁵ Jicha kalbeyex to yuꞌun jich ya xkꞌexawex a. ¿Me yuꞌun maꞌyuk ta awolilik ni tuluk te ay spꞌijil yoꞌtan ta xchapel te tutik ay ta stojol te yermanotake?

⁶ Ma me jaꞌuk te talel bael ya xlijk kꞌop awuꞌunik te pajal achꞌuunejik Diose. Ya awakꞌik ta chapel, pero jaꞌ ya xba awaꞌbeyik xchap te machꞌa ma xchꞌuunejuk te Diose.

⁷ Te tutꞌil jich ya xlijk kꞌop awuꞌunike, teꞌ ya xchiknaj a te ataojik tsalele. ¿Me ma jaꞌuk lek te yauk xkujch awuꞌunik te kꞌope? ¿Sok me ma jaꞌuk lek te ay tut ya yelkꞌanbeyex baele?

⁸ Pero te jaꞌexe ma jichuk ya apasik. Ya atij abaik ta kꞌop y ya awelkꞌan abaik te awermano abaike.

^9-10 ¿Meꞌn ma anaꞌojikuk te machꞌatik ma lekuk yoꞌtanik te ma xjuꞌ ya xꞌoch te ba ay ta ajwalinel te Diose? Ma me awakꞌ abaik ta loꞌlayel. Yuꞌun te ba ay ta ajwalinel te Diose, ma xjuꞌ ya xꞌoch teꞌa te machꞌatik ya xꞌantsiweje, ni te machꞌatik ya xchꞌuun lotil diose, sok te machꞌatik ya sle skremike, ni te winketik te ma tsaꞌamuk tut ya spas sok mismo winike, ni te jꞌelekꞌetike, ni te jbikꞌtal-oꞌtanetike, ni te jyakubeletike, ni te jle-kꞌopetike, ni te machꞌatik kꞌayemik ta spojel tutike. Spisil to ma xjuꞌ ya xlaj kꞌot te ba ay ta ajwalinel te Diose.

¹¹ Y jich la apasik ta nail to euk te jaꞌexe. Pero te ora to la awichꞌikix sakutesel y lekutesbilix awoꞌtanik yuꞌun amulik ta skuenta te Kajwaltik Jesucristoe y sok ta skuenta te Chꞌul Espíritu yuꞌun te Dios kuꞌuntike.

Ma me sle smul te jtiꞌbalultike

¹² Ya awalik: “jTe joꞌone libreix ayon ta spasel te tutik ya jkꞌan jpase”, xchiat. Batsꞌi jich. Pero ma spisiluk ya xlokꞌ jkuenta a. Jich, libre ayon ta spasel te tut ya jkꞌan jpase. Pero ma xjuꞌ te ay tut ya stsalone.

¹³ Ya awalik xan: “Te weꞌelile jaꞌ yuꞌun te jchꞌujtike y te jchꞌujtike jaꞌ yuꞌun te weꞌelile. Batsꞌi jich. Pero te Diose ya slajinbe jilel skꞌoplal ta xchebal. Pero ma me xkakꞌtik te ya xꞌantsiwe te jtiꞌbalultike. Te jtiꞌbalultike jaꞌ yuꞌun te Kajwaltike, y te Kajwaltike jaꞌ yuꞌun te jtiꞌbalultike.

¹⁴ Y jich tutꞌil te Diose te la xchaꞌkuses tal te Kajwaltike, jich ya xba xchꞌakusesotik tal ta spoder ekꞌa te joꞌotike.

¹⁵ ¿Me yuꞌun ma anaꞌojikuk te jaꞌexe te atiꞌbalulik te jaꞌ yok skꞌabinej te Cristoe? ¿Y me ya spas te ya kichꞌbey te yok skꞌabinej Cristo, y ya xba kaꞌbe sta te stiꞌbalul jtul jmulawil antse? Ma lekuk.

¹⁶ ¿Meꞌn ma xꞌanaꞌik te jaꞌexe te kꞌalal ay jtul winik te ya sta sba sok jtul jmulawil antse te jun nax ya xkꞌot te stiꞌbalulike? Yuꞌun jich ya yal te Sjun Diose: “Ta xchebalik jich kꞌoem te jtul nax gente ya xkꞌote”, xchi me.

¹⁷ Pero te kꞌalal ay machꞌa jun nax ya yakꞌ sba ta skuenta te Kajwaltike, jich jun nax ya xkꞌot ta skuenta te Espiritue.

¹⁸ Jaꞌ yuꞌun, kꞌeja abaik me yuꞌun te antsiwejele. Tutikuk xan yan mulil te ya spas te jtul gentee makꞌ ya xkuch te stiꞌbalule. Pero te machꞌa ya spas te antsiwejele, ya xmulaw sok te stiꞌbalule.

¹⁹ ¿Meꞌn ma xꞌanaꞌik te jaꞌexe te jaꞌ templo yuꞌun te Chꞌul Espíritu te atiꞌbalulike? Te Chꞌul Espiritue ay ta atojolik, yuꞌun te Dios a yaꞌbeyexe. Te jaꞌexe maꞌ awuꞌuninej abaikuk,

²⁰ porke Dios toyol a stojtalan. Jaꞌ yuꞌun ya skꞌan ya awakꞌik ta jkuenta a te Dios sok te atiꞌbalulike.