1 Corintios 4 - Nuevo Testamento Tzeltal de Amatenango

Te yaꞌtel te apostoletike

¹ Te jaꞌexe ma me kuyotik ta mukꞌ yuꞌun jaꞌ ayotik ta tuuntesel yuꞌun te Cristoe. Jaꞌ ay ta jkuentatik yakꞌel ta naꞌel te tut mukul snopoj te Diose.

² Te machꞌa ya yichꞌ yaꞌtele, ya me skꞌan ya yakꞌ ta ilel te jun yoꞌtan ta spasele.

³ Te joꞌone ma jaꞌuk ay skꞌoplal ta koꞌtan te tut yilel ya awilikone, sok te tut kilel ya yilikon euk te jmeltsaanwanejetik ta balmilale. i ma xjuꞌ joꞌon ya kichꞌbey jba jkuenta jtukel.

⁴ Maꞌyuk tut kechel ta koꞌtan ya kaꞌiy, pero makꞌ me kal te yuꞌun maꞌyuk jmule. Yuꞌun jaꞌ ya yichꞌon jkuenta te Kajwaltike.

⁵ Jich yuꞌun, ma me awichꞌbe abaik jkuenta te jaꞌexe, te tutꞌil ma to sta skꞌaalele. Maliyaik te Kajwaltik te ya xtale. Jaꞌ me ya yakꞌ ta ilel ta sakil kꞌinal stukel te tut ay ta ijkꞌal kꞌinal te ora to, y jaꞌ me ya yakꞌ ta naꞌel te tut snopoj te oꞌtanil ta juju-tule. Jich te Diose lek me ya yalbotik jkꞌoplaltik te tutꞌil ya xꞌaꞌtejotik ta juju-tule.

⁶ Kermanotak, la kalbeyex awaꞌiyik te tutꞌil ayone y sok te Apolose, skuenta jich ya anaꞌik te tutik lek ya xkꞌoex yuꞌune. La kalbeyex yuꞌun jich ya anopik a te makꞌ xkꞌaxex ta mas a te tutik tsꞌibabil jilele, y yuꞌun jich ma ba ya mukꞌutesbeyik skꞌoplal a te jtule y sok te ya apꞌajik te yane.

⁷ ¿Machꞌa ya yakꞌ te jich ya apasike? ¿Me ay tut ay awuꞌunik te ma jaꞌuk yakꞌojbeyex te Diose? Y teme jaꞌ yakꞌojbeyex te Diose, ¿tuꞌun te ya atoy abaik yuꞌune? Ma jaꞌuk la aleik.

⁸ Jich akuyoj abaik te maꞌyukix falta ya awaꞌiyike y ayix awuꞌunik spisil te tut ya akꞌanike. Akuyoj abaikix ta reyetik, y ma xꞌakꞌanikix te ay tut ya kaltik ta atojolik. Te batsꞌi jichukexix tutꞌil te reyetike, yuꞌun jich me ya xjuꞌ ya joyintikex ta ajwalil euk te jichuke.

⁹ Yuꞌun jich ya kaꞌiy jbajtik te joꞌotik te apostoletike, te yakꞌojotik ta último luwar te Diose. Jich kꞌoemotikix te tutꞌil machꞌatik chapbilix skꞌoplal ta milele. Yuꞌun kichꞌojtikix kꞌeluyel ta komon sitil yuꞌun te machꞌatik ayik ta balmilal, jaꞌ te angeletike y sok te genteetike.

¹⁰ Te joꞌotike jaꞌ ta skaj te Cristo te kuybilotik ta ma pꞌijukotike. Yan te jaꞌexe, ben pꞌijex ta skuenta Cristo ta akꞌopik. Te joꞌotike maꞌyuk jpuersatik. Yan te jaꞌexe bayal apuersaik ta akꞌopik. Te joꞌotike pꞌajbilotikix. Yan te jaꞌexe aꞌbilex ta jkuenta.

¹¹ Asta te ora to ma jilemuk te jwokoltik ta wiꞌnale y sok te takin tiꞌile y te maꞌyuk lek jkꞌuꞌ-jpakꞌtike. Te gentee ya smajotik, sok maꞌyuk ba ay jnajtik.

¹² Y sok lubenotik ta aꞌtel sok jkꞌabtik. Te tut ma lek ya yalbelotike, lek ya jakꞌbetik te joꞌotike. Bayal jwokoltik ta ilbajinel, pero juꞌem kuꞌuntik.

¹³ Ya yixta-kꞌoptayelotik, pero sok slekil koꞌtantik ya jakꞌbetik. Asta te ora to jich ya skuyelotik tutꞌ skꞌaꞌpalel balmilal te ya yichꞌ chꞌayel baele.

¹⁴ Ma yuꞌunuk la jtsꞌibabeyex te ya kakꞌex ta kꞌexlal yuꞌune. Yuꞌun jich ya kakꞌ anaꞌik jich tutꞌil batsꞌi jnichꞌan, yuꞌun ben jkꞌanojex.

¹⁵ Yuꞌun te jaꞌexe manchuk me ay dies mil ta jtul maestro awuꞌunik te ya yaꞌbeyex anopik skꞌoplal te Cristoe, pero ma bayaluk te atatike. Atatonik kꞌoem te jaꞌexe te tutꞌil lijk achꞌuunik te Cristo Jesuse, yuꞌun joꞌon a kalbeyex te lek achꞌ kꞌop yuꞌune.

¹⁶ Jich yuꞌun ya kalbeyex te ya me anopik te tutꞌ ayone.

¹⁷ Jaꞌ sluwaril te la jtikonbeyex tal te jTimoteoe. Jich kꞌoem ta koꞌtan tutꞌi jnichꞌan te jun yoꞌtan ta skuenta te Kajwaltike. Jaꞌ me ya yaꞌbeyex xan anaꞌik te tutꞌil ya xꞌaꞌtejon sok te tutꞌ jchꞌuunej te Cristoe Jesuse. Yuꞌun yiloj spisil te tutꞌil la jnojpeslan te juju-tijkꞌ hermanotetik te ba kꞌaxone.

¹⁸ Ay jtul-chebex te jaꞌexe te atoyoj abaike. Yuꞌun akuyojik te makꞌ xtal kilexe.

¹⁹ Pero teme jich ya skꞌan te Kajwaltike, ya me xtal kilex ta ora. Jich me ya kil teme ay tut juꞌem awuꞌunik spasele o teme jaꞌ nax te ya akꞌupinik yalele.

²⁰ Porke te tutꞌil ya skꞌan kajwalintik te Diose, ma me jipuk a te ya kaltike. Jaꞌ ya skꞌan te ay tut ya xjuꞌ kuꞌuntik spasele.

²¹ ¿Tut ya akꞌanik te jaꞌexe: Me jaꞌ ya akꞌanik te tulan ya xtal jkꞌoponexe, o jaꞌ te ben jun koꞌtan sok te bayal slekil koꞌtan te ya xtalone?