1 Corintios 3 - Nuevo Testamento Tzeltal de Amatenango

Ma lekuk te xatꞌoj sbaike

¹ Te joꞌone, kermanotak, ma juꞌ kuꞌun jkꞌoponex jich tutꞌil gente te tojutesbil yuꞌun te Espiritue, yuꞌun ya kil te jich to ayex ta skuenta atiꞌbalulik. Jich tutꞌil untik ayex ta stojol te Cristoe.

² Ja yuꞌun la jnojpesex sok te tutꞌil ma tulanuk, pajal sok jtul alal te ya to xchuꞌune, te lech ya xꞌaꞌbote. Porke te jaꞌexe ma to xjuꞌ awuꞌunik sweꞌel te jich kꞌoem tutꞌil tulan weꞌelile. Jaꞌ nax jich ma xjuꞌ awuꞌunik te ora to,

³ yuꞌun skuentainejex to te atiꞌbalulile. Yuꞌun chikan te tutꞌ ayexe te ya to awilbey aba awoꞌtanik sok te ya ajapuy abaik ta kꞌope, sok te ya apitpit abaike. Yuꞌun sigue ya atamojik te tut skuenta atiꞌbalulike. Jich yipalex ta spasel te tut ya spas spisil te gente ta balmilale.

⁴ Porke te kꞌalal ay jtul te jich ya yale: “Joꞌon ayon ta skuenta jPablo”, y yan ya yal: “Ayon ta skuenta Apolos”, ja sjapuyejex te tut skuenta atiꞌbalulike.

⁵ Ya skꞌan ya anaꞌik: ¿Machꞌa a te jPabloe? ¿Y machꞌa a te Apolose? Kꞌouk ta awoꞌtanik te abat nax ayotik yuꞌun Dios te la kaꞌbeyex achꞌuunikix te Kajwaltike. Yuꞌun ta juju-tul te joꞌotike jaꞌ la jpastik te aꞌtel a yaꞌbotik te Kajwaltike.

⁶ Te joꞌone la kaw, y te Apolose la yaꞌbe yaꞌlel. Pero Dios jaꞌ a yakꞌ chꞌiuk tal te tutiꞌ yichꞌ tsꞌunele.

⁷ Maꞌyukik ta kuenta te machꞌa la yawe sok te machꞌa la yaꞌbe yaꞌlele. Jaꞌ nax ay ta kuenta te Dios te ya stsꞌijtes te tutꞌ tsꞌunbile.

⁸ Te machꞌatik ya yawe y sok machꞌatik ya yaꞌbe yaꞌlele, pajalik nax. Dios ya xtojtalanot yuꞌun ta juju-tul chikan te yaꞌtele.

⁹ Te joꞌotike, joy jbajtik ta aꞌtel ta abatinel yuꞌun te Diose, y te jaꞌexe jaꞌex kꞌaltikex kꞌoem yuꞌun Dios. Y jichex euk tutꞌil na te yipal ta stejkꞌanel te Diose.

¹⁰ Te joꞌone jich kꞌoemon yuꞌun Dios tutꞌil statal alwanil te la yaꞌbon ta jkuenta te ya jlijkes te yiptajib nae, y yan machꞌa ya stsꞌak moel. Pero ta juju-tul a me yil tut yilel ya stsꞌak moel.

¹¹ Yuꞌun maꞌyuk yan machꞌa yiptajib kꞌoem, jaꞌ úniko te Jesucristoe.

¹² Te tutik ya yichꞌ tsꞌakel moel ae, ay jtul ya xlijk spas ta oro, ta plata y ta ben tsaꞌam ton, o ta teꞌ, o ta ak, o ta kꞌajben.

¹³ Pero te yaꞌtel ta juju-tule ya xkꞌo chiknajuk ta jamal te tut kꞌaalil ya xꞌichꞌot jkuentae. Porke te kꞌaal abi ya xtal sok kꞌajkꞌ. Y te kꞌajkꞌe jaꞌ ya spasot prewa a te tut aꞌtelil a spas te juju-tule.

¹⁴ Teme ay machꞌa la stejkꞌan jun na, teme maꞌ stsak kꞌajkꞌe, ya me yichꞌ stojol.

¹⁵ Pero teme ay machꞌa la stejkꞌan yaꞌtel y la stsak kꞌajkꞌe, ya me xchꞌay spisil abi. Aunke stukel xanix ya xkol, jich tutꞌil te ay machꞌa ya xkol tal lokꞌel te ba kꞌajkꞌe.

¹⁶ ¿Tuꞌun me yuꞌun maꞌ anaꞌojikuk te jaꞌex stemploex te Diose, y te Espíritu yuꞌun te Diose teꞌey ba ayexe?

¹⁷ Teme ay machꞌa ya sjimbey te templo yuꞌun te Diose, Dios me ya xjimot yuꞌun euk. Porke te temploe jaꞌ yuꞌun te Diose, y te templo abi, jaꞌex me.

¹⁸ Ma me machꞌa ya sloꞌlay sba. Teme ay machꞌaukex a te pꞌij skuyoj sbae, teme ta skuenta nax pꞌijilil ta balmilale, jich me ya skuy sba te tutꞌil maꞌyuk tutꞌ ya snaꞌe, yuꞌun jich me ya xkꞌot te batsꞌi ay spꞌijile.

¹⁹ Yuꞌun te pꞌijilil skuenta balmilale, puru jowil nax kꞌoem yuꞌun te Diose. Jich tutꞌil tsꞌibabil jilel te jich ya yale: “Te machꞌatik pꞌijike, jaꞌ me strampa ya xkꞌot te spꞌijilike —xchi me.

²⁰ Y jich ya yal xan: “Te Kajwaltike snaꞌoj te jowil nax te tut snopojike te machꞌatik skuyoj sbaik ta pꞌije.

²¹ Jaꞌ yuꞌun ma me ayuk machꞌa lom bujtsꞌan kꞌinal ya yaꞌiy yuꞌun ta skuenta jtul winik te jaꞌ ya stsꞌakliye. Yuꞌun spisil te tutik aye, jaꞌex awuꞌunik.

²² Me jaꞌ jPablo, o Apolos, o jPedro, o balmilal, o kuxlejal, o lajel, o jaꞌ te tut ay te ora to, o jaꞌ te tut ay ta patil baele. Spisil jaꞌex awuꞌunik.

²³ Y te jaꞌexe ayex ta skuenta Cristo. Y te Cristoe ay ta skuenta Dios.