1 Corintios 16 - Nuevo Testamento Tzeltal de Amatenango

Te majtanil a yakꞌ te hermanoetike

¹ Te tutꞌil ya yichꞌ tsobel majtanil yuꞌun hermanoetik te xchꞌuunejik Diose, jich me xꞌapasik te tutꞌil la kaltalanbe te hermanoetik te ayik ta estado yuꞌun Galacia.

² Ta primero kꞌaal yuꞌun te semanae ta juju-tulex ya me apitik chꞌinuk te jayeb ya ataike, y kꞌejaik me. Yuꞌun te kꞌalal ya xkꞌoone, maꞌyukix ya atsobik a te majtanile.

³ Y te kꞌalal ya xkꞌoone, ya me jtikon bael ta Jerusalen te machꞌatik atꞌujojike. Ya me jpasbe bael skartaik yuꞌun ya yichꞌbeyik bael te hermanoetik te majtanil la awakꞌik bael ta Jerusalene.

⁴ Y teme lek ya xboon ekꞌae, ya me joyinlan bael.

La snop te ya xbeen xan te jPabloe

⁵ Teme talon te ba ayexe, pero nail ya xkꞌaxon tal ta estado yuꞌun Macedonia, y ta patil ya me xkꞌoon ta Corinto.

⁶ Ya wan xjuꞌ ya xjalajon cheꞌoxebuk kꞌaal te ba ayexe, o repente te ya xkꞌax kuꞌun a te skomil kꞌaale. Jich te jaꞌexe ya xjuꞌ ya akoltayikon te ya xbeenon xan bael te ba ya xboon xan ta patile.

⁷ Yuꞌun ma jkꞌan te jkꞌaxel nax ya xkꞌa kilexe. Jaꞌ ya jkꞌan te ya xjalajon cheꞌoxebuk kꞌaal te ba ayexe teme jich ya skꞌan te Kajwaltike.

⁸ Pero ya to me xjalajon ta Efeso jaꞌ to ta skꞌaalel Pentecostes.

⁹ Porke jtaoj to lek entrada ta aꞌtel ta yaꞌtel te Kajwaltike. Y ben lek yipal ta kꞌoel, aunke ben bayal te skontrainejon yuꞌune.

¹⁰ Teme kꞌot te jTimoteoe, ikꞌaik me ta lek te ba ayexe, yuꞌun jich ya xꞌaꞌtej ta yaꞌtel Kajwaltik jich tutꞌil joꞌone.

¹¹ Jich yuꞌun ma me ayuk jtulukex te ya apꞌajike. Ma me jichuk nax, koltayaik me te tutꞌil jun yoꞌtan ya xbeene, yuꞌun jich me ya xtal yilon. Porke yipalon ta smaliyel sok te yan xan hermanoetike.

¹² Y te kermanotik Apolose, bayal a jkꞌanbeyix pawor te yauk xtal yilex sok te hermanoetike, pero maꞌ skꞌan te ora ya xtale. Ya me xtal ta kꞌalal ay stiempoe.

Stsitselik ta slajibal sok spajtil yoꞌtanik

¹³ Kuxa me awoꞌtanik y junuk me awoꞌtanik ta xchꞌuunel te Cristoe. Pasaik me winikil, y ayuk me spuersa awoꞌtanik.

¹⁴ Y spisil te tut ya apasike, pasaik me sok xkꞌuxul awoꞌtanik.

¹⁵ Kermanotak, te jaꞌexe anaꞌojik te machꞌatik ay yuꞌun te Estéfanase te jaꞌ nail a xchꞌuunik Dios te ayik ta estado yuꞌun Acaya. Stukelik te lek yakꞌoj sbaik ta mantaltesel yuꞌun te hermanoetik te xchꞌuunejik Diose.

¹⁶ Awokolikuk me te jaꞌexe, akꞌaik me ta jkuenta te machꞌatik pajal yoꞌtanik soke, y spisil te machꞌatik ya xkoltawanik y ya xꞌaꞌtejike.

¹⁷ Ben jun koꞌtan yuꞌun te talem te Estéfanase sok te Fortunatoe y sok te Acaicoe. Yuꞌun jaꞌ ajelolik te tutꞌil jakal ayex te jaꞌexe.

¹⁸ Stukelik a yakꞌ junubuk koꞌtan jich tutꞌil te la yaꞌbeyexe. Jich ya skꞌan ya awakꞌik ta jkuenta te machꞌa pajal yoꞌtanik soke.

¹⁹ Te hermanoetik te ayik ta estado yuꞌun Asia la stikonbeyex spajtil awoꞌtanik. Te Aquilae sok sPrisilae y sok te kongregasion te ya stsob sbaik sok ta snae, la stikonbeyex bayal spajtil awoꞌtanik ta skuenta te Kajwaltike.

²⁰ Ichꞌaik te spajtil awoꞌtanik te la stikonbeyex spisil te hermanoetike. Patbeya aba awoꞌtanik ta juju-tul sok sbujtsꞌ awoꞌtanik.

²¹ Joꞌon jPabloon, te ya jtsꞌibabeyex te spajtil awoꞌtanik te la jpas ta jkꞌab te letra to.

²² Teme ay machꞌa ma kꞌuxuk ta yoꞌtan te Kajwaltik Jesucristoe, ay me ta skuenta chꞌayel abi. ¡Te Kajwaltike, ya me xtal!

²³ Te Kajwaltik Jesucristoe aꞌ yaꞌbeyex bayal bendision ta akuentaik.

²⁴ Ta apisilik te jaꞌexe jaꞌ ya kaꞌbeyex tal te xkꞌuxul koꞌtan ta skuenta te Cristo Jesuse. Jichuk.