1 Corintios 15 - Nuevo Testamento Tzeltal de Amatenango

Te tutꞌil a chꞌakux tal te Cristoe

¹ Te ora to, kermanotak, ya jkꞌan ya anaꞌik te skꞌoplal kolel te la kaltalanbeyexe. Jaꞌ to te skꞌoplal te jaꞌex la awaꞌiyik, y sok te ben jun awoꞌtanik achꞌuunejike.

² Sok jaꞌ me ya xkolex yuꞌun teme makꞌ ya achꞌay ta awoꞌtanik te skꞌoplal te la kalbeyexe, sok teme ma jowiluk nax te la achꞌuunike.

³ Te tut nail a kaꞌbeyex anaꞌike, jaꞌ te tutiꞌ yaꞌbelon jnope. Jaꞌ a kakꞌ anoptalanik te Cristoe cham ta skaj jmultik, jich tutꞌil ya yal te Sjun Diose.

⁴ La smukike y chaꞌkux tal ta yoxebal kꞌaal jich tutꞌil ya yal te Sjun Diose.

⁵ La yakꞌ sba ta ilel yuꞌun te jPedroe y te nax a la yakꞌ sba ta ilel yuꞌun te lajchaytul apostoletike.

⁶ Sok ta patil la yakꞌ sba ta ilel yuꞌun te kꞌaxem kinientos ta jtul hermanoetik te stsoboj sbaike ae. Chꞌin ma spisiluk kuxulik to te ora to, aunke ay machꞌa chamenix.

⁷ Ta patil la yakꞌ sba ta ilel yuꞌun te Jacoboe, y te nax a la yakꞌ sba ta ilel yuꞌun spisil te apostoletike.

⁸ Y ta último la yakꞌ sba ta ilel ta jtojol euk, manchuk teme jich a kꞌoon te tutꞌil alal te ma to yorauk ya xꞌayine.

⁹ Yuꞌun te joꞌone jaꞌ mas pekꞌ ayon yuꞌun te apostoletike. Y ni ma spas te apostol ya yalbelone, porke la jtentalan te hermanoeitk ta stojol Diose.

¹⁰ Pero ta slekil yoꞌtan Dios te jich ayon te tutꞌil ayone, y te slekil yoꞌtan kuꞌune ma lomuk nax, yuꞌun atꞌejemonix bayal ke ta spisil te yanetike. Aunke ma joꞌukon kaꞌtel jtukel, yuꞌun jaꞌ aꞌtej ta jkuenta te Diose ta skuenta slekil yoꞌtan te la skoltayone.

¹¹ Pero ma kocheluk teme joꞌon a aꞌtejon o jaꞌ a aꞌtej te yane. Sino ke jaꞌ to jaꞌ te la kalbeytik skꞌoplal y jaꞌ te la achꞌuunikix te jaꞌexe.

Te tutꞌil ya xchaꞌkux tal te animaetike

¹² Pero teme jaꞌ ya kalbetik skꞌoplale te chaꞌkux tal te Cristoe, ¿porke ay jtul-cheb ya awalik te jaꞌexe te makꞌ xchꞌakux tal te animaetike?

¹³ Porke teme makꞌ xchaꞌkux tal te animaetike, jich euk te Cristoe ma chaꞌkuxemuk.

¹⁴ Y teme ma chaꞌkuxemuk te Cristoe, te skꞌoplal te yipalotik ta yalele ni ma baleuk ya xkꞌot. Ni ma baleuk te xchꞌuunel awoꞌtanike.

¹⁵ Teme ma chaꞌkuxemuk te Cristoe, te joꞌotike jich lotil testigootik kꞌoemotik yuꞌun te Dios abi, yuꞌun la kaltikix te Dios a xchaꞌkuses tal te Cristo. Teme ma chaꞌkuxemuk te Cristoe, te batsꞌi jichuke jaꞌ te animaetike makꞌ xchꞌakuxik tal.

¹⁶ Porke teme makꞌ xchaꞌkux te animaetike, jich ma chaꞌkuxemuk ekꞌa te Cristoe.

¹⁷ Y teme ma chaꞌkuxemuk te Cristoe, ni ma baleuk ya xkꞌot te xchꞌuunel awoꞌtanik te jaꞌexe, sok sigue to me akuchoj amulik abi.

¹⁸ Jich euk te machꞌatik chamenikix ta skuenta Cristoe jich chꞌayemik euk teme jich aye.

¹⁹ Teme jaꞌ nax liꞌ ta balmilal to te ay smukꞌul koꞌtantik ta skuenta te Cristoe, joꞌotik mas lom oꞌol jbajtik ta spisil teme jich aye.

²⁰ Pero batsꞌi jich te Cristo te chaꞌkuxeme. Stukel primero sba sit te kosechae, y stukel primero te chaꞌkux tale.

²¹ Jich tutꞌil ta skaj nax jtul winik te och lajel ta balmilale, jich ta skaj nax jtul winik te och chaꞌkuxel te ba animaetike.

²² Y jich tutꞌil ta skuenta jꞌAdan spisil ya xchamik, jich ta skuenta Cristo spisil ya sta xkuxlejal.

²³ Pero chikan tutꞌil ya xkꞌot ta skuenta juju-tul: Jaꞌ nail te Cristoe, ta patil te kꞌalal ya sujt tal te Cristoe ya xchaꞌkux te machꞌatik yuꞌune.

²⁴ Teꞌ nax a jaꞌix a te slajibal kꞌaale. Te kꞌalal Cristo ya slajinbe spisil yaꞌtel te machꞌatik tulan yaꞌtelik sok te ay spuersaike, y ya yaꞌbe entregal ta stojol te Dios Tatile te yaꞌtel yichꞌoj ta ajwalile.

²⁵ Porke te Cristoe puersa ya yichꞌ yaꞌtel ta ajwalil jaꞌto teme la xpuchꞌ ta tekꞌel spisil te skontratake.

²⁶ Y te slajibal skontra te ya yichꞌ lajinele, jaꞌ te lajele.

²⁷ Porke Dios yakꞌojbeyix te spisil ya spuchꞌ ta tekꞌele. Pero te kꞌalal jich ya yal te spisil ya xꞌaꞌbot ta skuentae, jich chikan ta jamal a te ma aꞌbiluk ta jkuenta a te Diose. Jaꞌ nax Dios te la yakꞌ ta skuenta Cristo spisil te tutik aye.

²⁸ Y te kꞌalal spisil ayix ta skuenta a te Cristoe, jich te Cristoe te stukel nichꞌanile, stukel mismo ya yakꞌ sba ta skuenta Dios. Te jaꞌ nax a yakꞌ ta skuenta Cristo spisil te tutik aye. Jich te Diose stukel nax ay ta skuenta spisil.

²⁹ Teme makꞌ xchaꞌkux te animaetike, lom nax te ay machꞌatik la yichꞌik jaꞌ yuꞌun te machꞌatik chamenikixe. Teme makꞌ xlaj chaꞌkuxe te machꞌatik chamenik, ¿tuꞌun te la yakꞌ sbaik ta ichꞌjaꞌ yuꞌun teme jichte?

³⁰ ¿Y tuꞌun te ayotik ta peligro joꞌotik sil tiempo teme jichte?

³¹ Porke, kermanotak, sil tiempo ayon ta peligro yuꞌun milel. Batsꞌil lom jich te tut ya kalbeyexe te lom jun koꞌtan ya kaꞌiy ta akuentaik te tutꞌil achꞌuunejik te Kajwaltik Jesucristoe.

³² Te joꞌone la jpas puersa ta Efeso te ba ay te machꞌatik pajalik sok jtiꞌawal chambalam. Pero ¿tutiꞌ lokꞌ kuꞌun a? Teme batsꞌi jich te makꞌ xchaꞌkux te animaetike, jich tutꞌil te ay machꞌa jich ya yale: “Weꞌukotik y uchꞌaukotik, yuꞌun te pajele ya xchamotik”, xchiik me.

³³ Ma me achꞌuunik loꞌlayel. Yuꞌun ay machꞌa ya yal: “Te joꞌtaktik te ma lekikuke ya xchꞌaytalan te tut lek ta pasele”, te xchiike.

³⁴ Ilme abaik, ma me ale amulik. Yuꞌun ay jtul-cheb te jaꞌexe te ma xꞌanaꞌbeyik sba te Diose. Jich ya kalbeyex to yuꞌun ya xkꞌexawex a.

Tutꞌil ya xchaꞌkux tal te animaetike

³⁵ Pero ay wan machꞌa ya sjojkꞌoy: “¿Tutꞌil wan ya xchaꞌkux tal te animaetike? ¿Tut me yilel te stiꞌbalul ya yichꞌike?” teme xchie.

³⁶ Ma xꞌanaꞌik te tut ya ajojkꞌoyike. Te tsꞌunubil ya atsꞌunike puersa ya xkꞌaꞌ. Yuꞌun jich me ya xjuꞌ ya xchꞌi tal te yaꞌnimale.

³⁷ Te tut ya yichꞌ awele ma jaꞌuk te yaꞌnimal te ya xtꞌom tal lokꞌele. Jaꞌ nax ya yichꞌ tsꞌunel te sbakꞌe, me triwu o tutikuk a.

³⁸ Ta patil Dios ya yakꞌ yanejuk jich tutꞌil ya skꞌan yoꞌtane. Y te juju-kaj tsꞌunubile ya yaꞌbe steꞌel sok yaꞌnimal chikan tut aye.

³⁹ Ma pajaluk stiꞌbalulik spisilik te tutik kuxajtik ta balmilale. Te jkaj tiꞌbalulile jaꞌ te winike, te yane jaꞌ stiꞌbalul te chambalametike, y te yane jaꞌ te mutetike, y te yan xane jaꞌ te chayetike.

⁴⁰ Jaꞌ nax jich, ay tiꞌbaluliletik skuenta chꞌulchan y ay tiꞌbaluliletik skuenta balmilal. Pero yan stsaꞌamulik te tiꞌbaluliletik skuenta chꞌulchane. Y yan stsaꞌamul euk te tiꞌbaluliletik skuenta balmilale.

⁴¹ Te xojobil kꞌajkꞌale ma pajaluk sok te xojobil ue, y te xojobil ekꞌetike yan ekꞌa. Y mismo te ekꞌetike skajal-skaj tutꞌil ay te xojobilike.

⁴² Y jich mismo ya xkꞌot ta pasel te ya xchꞌakux tal te animaetike. Te tut ya xmujke ya me xkꞌaꞌ; te tut ya xchꞌakux tale makꞌ me xkꞌaꞌix a.

⁴³ Te tut ya xmujke maꞌyuk ta jkuenta; te tut ya xchaꞌkuxe ben tsaꞌamix a. Te tut ya xmujke maꞌyuk spuersa; te tut ya xchꞌakuxe ayix spuersa a.

⁴⁴ Te tut ya xmujke batsꞌi stiꞌbalul; te tut ya xchaꞌkuxe jun tiꞌbalulil ta skuenta Espíritu. Ay tiꞌbalulil nax, y jich ay tiꞌbalulil ta skuenta Espíritu.

⁴⁵ Jich ya yal te Sjun Diose: “Te primero winik jꞌAdan, aꞌbot stiꞌbalul sok xkuxlejal”, xchi me. Pero te slajibal jꞌAdane, jꞌakꞌ-kuxlejal stukel ta skuenta Espíritu.

⁴⁶ Pero te tut skuenta Espiritue ma jaꞌuk nail. Jaꞌ nail te tiꞌbal naxe y patil jaꞌ te skuenta Espiritue.

⁴⁷ Te primero winike pasot ta tsꞌubilum y tsꞌubilum nax. Y te xchebal winike jaꞌ ta skuenta chꞌulchan stukel.

⁴⁸ Te tiꞌbaluliletik skuenta balmilale jaꞌ pajal sok te winik te pasbil ta tsꞌubilume; y te tiꞌbaluliletik skuenta chꞌulchane jaꞌ pajal ya xkꞌot sok te machꞌa skuenta chꞌulchane.

⁴⁹ Jich tutꞌil te pajalotik sok te winik te pasbil ta tsꞌubilume, jich pajal ya xkꞌootik sok euk te machꞌa skuenta te chꞌulchane.

⁵⁰ Ya jkꞌan ya kalbeyex, kermanotak, te tut skuenta tiꞌbal sok te bake ma spas te ya xꞌoch kꞌoel te ba ay ta ajwalilnel te Diose. Y te tut ya xkꞌaꞌe ma spas ya xkꞌot te ba ma xꞌkꞌae.

⁵¹ Pero ya jkꞌan ya kalbeyex sluwaril te tut ma awaꞌiyejikuke: Ma jpisiltikuk ya xchamotik. Pero jpisiltik ya xyanejotik.

⁵² Ta jtsꞌin nax te ya swikꞌ sba y ya smutsꞌ sba te jsitike, te kꞌalal ya xꞌokꞌ ta último te kornetae. Porke ya xꞌokꞌ te kornetae, y te animaetike ya me xchaꞌkuxik tal. Yuꞌun makꞌ me xchaꞌchamikix a. Y te joꞌotike ya me xyanejotik.

⁵³ Yuꞌun te jtiꞌbalultik te ya xkꞌaꞌe puersa ya xjelon yuꞌun te makꞌ ya xkꞌaꞌix aye. Y te jtiꞌbalultik te ya xlaje ya xjelon, makꞌ me xchamix a.

⁵⁴ Y kꞌalal te jtiꞌbalultik te ya xkꞌaꞌe ya me xjelon yuꞌun te makꞌ xkꞌaꞌix aye, y kꞌalal te jtiꞌbalultik ya xlaje ya me xjelon yuꞌun te makꞌ xlajix aye, jaꞌ ya xkꞌot ta pasel te tut ya yal te Sjun Diose: “Te lajele jmel nax a yichꞌ tsalel”, te xchie.

⁵⁵ Te jaꞌat lajel, ¿ba kꞌan juꞌuk xan awuꞌun a? Te jaꞌat mukenal, ¿tutꞌ kꞌan atsalon xan a?” xchi me.

⁵⁶ Te tut ya stsalawan a te lajele, jaꞌ te mulile. Sok te antibo mantaliletike jaꞌ te ya yaꞌbe spuersa a te mulile.

⁵⁷ Pero kola yal Dios yuꞌun te la yaꞌbotik jtsaltik ta skuenta te Kajwaltik Jesucristoe.

⁵⁸ Jich yuꞌun, kermanotak, te ben kꞌuxex ta koꞌtane, sigue junuk awoꞌtanik y ma me xtal-xbajtuk awoꞌtanik. Aꞌtejanik sil tiempo ta mas y ta mas ta yaꞌtel te Kajwaltike. Porke te jaꞌexe ya anaꞌik te ma jowilik te aꞌtel ya apasik te jun nax sok te Kajwaltike.