1 Corintios 14 - Nuevo Testamento Tzeltal de Amatenango

Te machꞌatik ya xkꞌopojik ta yan kꞌopetike

¹ Oꞌtaninaik me te ayuk xkꞌuxul awoꞌtanike. Sok junuk me awoꞌtanik te yakuk yaꞌbeyex Dios te majtaniletik yuꞌun te Espiritue. Jaꞌuk me ya akꞌanik te yakuk yaꞌbeyex awalik te skꞌop Diose.

² Te machꞌa ya xkꞌopoj ta yan kꞌope, jaꞌ ya yalbe te Diose, ma jaꞌuk ya yalbe te gentee, yuꞌun maꞌyuk machꞌa ya yaꞌiy tut xyal. Te tut ya yale, jaꞌ ta skuenta te Espiritue. Pero maꞌyuk machꞌa ya snaꞌ tut xyal.

³ Yan te machꞌa ya xꞌaꞌbot ta skuenta yalel te tut ya yal te Diose, jaꞌ ya yalbe te machꞌa stsoboj sba soke. Jich ya xmukꞌubik xan ta stojol Dios te yanetike, y ya xꞌaꞌbot spuersa yoꞌtanik sok ya xjunutesbot yoꞌtanik.

⁴ Te machꞌa ya xkꞌopoj ta yan kꞌope, stukel nax mismo yipal ta chꞌiel ta stojol Dios. Pero te machꞌa ya yal te skꞌop Diose, jaꞌ ya xmukꞌubik xan ta stojol Dios yuꞌun a spisil te hermanoetike.

⁵ Te joꞌone koꞌtanuk te apisilikuk te ya xkꞌopojex ta yanetik kꞌope. Pero jaꞌ mas ya skꞌan koꞌtan te yauk awalik te skꞌop Dios. Jaꞌ to jaꞌ mas lek stukel. Yan te ya xkꞌopojex ta yan kꞌopetike, ja ma tulanuk skꞌoplal teme ma xꞌanaꞌik skꞌasesele. Yuꞌun jich ma xmukꞌubik ta stojol Dios te juju-tijkꞌ hermanoetike.

⁶ Jaꞌ yuꞌun, kermanotak, makꞌ ya xtuun awuꞌunik teme tal kilex y te ya jkꞌoponex ta yan kꞌopetike. Jaꞌ to ya xtuun awuꞌunik teme ya kalbeyex te tut yachꞌil yalojbon te Diose, sok teme jaꞌ ya kaꞌbeyex anopik te tut apꞌijuteselike, sok teme ya kalbeyex te skꞌop Diose.

⁷ Jich tutꞌil instrumentoetik yuꞌun kꞌinetik jich tutꞌil te amaye o jich tutꞌil te arpae, teme ma skajal-skajuk yokꞌele, ma xchiknaj teme yanetik te skꞌop te jujune.

⁸ O te ba ay guerra, teme ma jamaluk a okꞌ te kornetae, maꞌyuk machꞌa ya xchap sba te ya xba yaꞌbe sba soke.

⁹ Jich mismo euk te jaꞌexe, teme maꞌyuk sluwaril te kꞌop ya awalike, ¿Tutꞌil kꞌan naꞌbek sluwaril te tut yipalat ta yalele? ¡Jowil nax yipalat ta kꞌop!

¹⁰ Yuꞌun ay bayal ta jkaj yan kꞌopetik ta balmilal y spisil ay sluwaril ta aꞌiyel.

¹¹ Pero teme ma xkaꞌi tut xyal te kꞌopetike, jich kꞌoemon te tutꞌil jyanlum yuꞌun te machꞌa ya skꞌoponone, y jich kꞌoem kuꞌun ekꞌa te tutꞌil jyanlume.

¹² Jaꞌ yuꞌun, te jaꞌexe te ben jun awoꞌtanik ya akꞌanik te majtaniletik yuꞌun te Espiritue, oꞌtaninaik ta mas te majtaniletik te ya skoltayik ta smukꞌutesel ta skuenta espíritu te juju-tijkꞌ hermanoetike.

¹³ Jich yuꞌun, te machꞌa ya xkꞌopoj ta yan kꞌopile, aꞌ skꞌanbe Dios te yauk xjuꞌ yuꞌun skꞌasesele.

¹⁴ Yuꞌun teme ya jkꞌopon Dios ta yan kꞌopile, batsꞌi jaꞌ nax ya jkꞌopon Dios sok te jchꞌulele. Pero maꞌyuk tut ya kaꞌibe sluwaril a.

¹⁵ ¿Tut ya skꞌan ya jpas teme jichte? Yuꞌun jaꞌ ya skꞌan te ya jkꞌopon Dios sok te jchꞌulele y sok te ya kaꞌibe sluwarile. Ya skꞌan ya jkꞌayojin Dios sok te jchꞌulele y sok te ya kaꞌibe sluwarile.

¹⁶ Porke teme yipalat ta skꞌoponel Dios, jaꞌ nax sok te achꞌulele. Y teme ay jtul gente te jich to nax ay te yipal ta yaꞌiyele, ma spas ya sjoyinat ta yalel kola yal, yuꞌun ma xyaꞌi te tut ya awale.

¹⁷ Te tut ya awalbe kola yale, manchuk me ben tsaꞌam, pero ma sta skoltayel a te yane te ya xmukꞌub ta stojol Dios.

¹⁸ Ya kalbe kola yal Dios te kꞌax jich ya xkꞌopojon ta yanetik kꞌopile tutꞌil te jaꞌexe.

¹⁹ Pero te ba ay te juju-tijkꞌ hermanoetike, jaꞌ lek te joꞌpꞌaluk nax ya kal te kꞌopetik te ya yaꞌiybeyik sluwarile yuꞌun ya xpꞌijub xan yuꞌune, ke te ya kal diez mil ta pꞌal kꞌopetik ta yan kꞌope.

²⁰ Kermanotak, ma me jichukex te tutꞌil ay te untike. Jachikukex me te tutꞌil untik te ma to ayuk ya spas te tut ma tsaꞌamuke. Pero jichukex me te tutꞌil mukꞌul gente te ayix srasone.

²¹ Ta sjunal te mantaliletike tsꞌibabil jilel teꞌa: “Ya jkꞌopon te nasion to ta yanetik kꞌopiletik y sok ta stiꞌ te jyanlumetike. Pero ni ma jaꞌuk ya yaꞌiyik a, xchi te Kajwaltike”, xchi me.

²² Te tutꞌil ay te yan kꞌopile, jaꞌ jun seña yuꞌun te machꞌatik ma xchꞌuunejuk te Diose, ma jaꞌuk yuꞌun te hermanoetike. Pero te machꞌa ya yal te skꞌop Diose, jaꞌ jun seña yuꞌun te hermanoetike, ma jaꞌuk yuꞌun te machꞌatik ma xchꞌuunejuk Diose.

²³ Porke te kꞌalal stsoboj sbaik te hermanoetike, teme spisilik yipalik ta kꞌop te yanetik kꞌopile, y teme och bael euk te machꞌa ma snaꞌbe sluwaril, o jtul te machꞌa ma xchꞌuunejuk Diose, jich ya skuy te ya xjowiyexe.

²⁴ Yan teme apisilik yipalex ta yalel te skꞌop Diose, y teme och bael jtul te ma xchꞌuunejuk Diose o jtul te ma snaꞌbe sluwarile, jich me ya snaꞌik te jmulawilike. Y stukel mismo ya yaꞌi sba yuꞌun te ya yaꞌi te tut ya awalik ta apisilike.

²⁵ Jich ya xchiknaj te tut mukul ay ta yoꞌtane, y jich me ya skejan sba ta stojol Dios, y jich me ya snaꞌ te batsꞌi jich te ay ta awolilik te Diose.

Tsaꞌamuk me ta pasel awuꞌunik spisil

²⁶ Jaꞌ yuꞌun, kermanotak, te kꞌalal ya atsob abaik te jaꞌexe, ay yan ya xjuꞌ yuꞌun skꞌayojinel kꞌayojetik, sok ay yan ya snojpeswan, sok ay yan ya yal te tut ya xꞌaꞌbot snaꞌ yuꞌun Dios, sok ay yan ya xkꞌopoj ta yanetik kꞌopiletik, sok ay yan ya skꞌases te yanetik kꞌopiletike. Pero ta spisiluk me, jaꞌuk me yuꞌun te ya xmukꞌubik ta stojol Dios ta spisilik a.

²⁷ Teme ay machꞌa ya xkꞌopoj ta yanetik kꞌopiletike, tikꞌ a teme ay cheb o oxeb naxe. Pero ta juju-tul me ya xkꞌopojik, y ya skꞌan leel jtuluk te machꞌa ya skꞌases te kꞌopiletike.

²⁸ Y teme maꞌyuk machꞌa ay te ba ay hermanoetik te ya snaꞌ skꞌasesele, jaꞌ lek te makꞌ xkꞌopoj ta yan kꞌopil te ba ay hermanoetike, a kꞌopojuk nax ta yoꞌtan sok te Diose.

²⁹ Jich euk, teme jaꞌ ya awalik te skꞌop Diose, jaꞌ lek teme ay cheb-oxeb naxe. Y te yanetike a me yaꞌiyik ta lek te tut ya xꞌalote.

³⁰ Pero teme ay tut ya xꞌaꞌbot snaꞌ yuꞌun Dios te jtul gente te teꞌ nakal ae, jich te machꞌa nail yipal ta kꞌope a me skom sba.

³¹ Jich ya xjuꞌ ya xkꞌopoj ta juju-tul te machꞌa skꞌan ya yal te skꞌop Diose. Yuꞌun jich me ya snopik ta spisilik a sok ya yichꞌ spuersa yoꞌtanik a.

³² Te machꞌa ya yal te skꞌop Diose, ya xjuꞌ yuꞌun te ya skom sba ta kꞌop sok te yoꞌtane.

³³ Porke te Diose jaꞌ Dios yuꞌun te butsꞌan kꞌinale, ma jaꞌuk yuꞌun te kꞌexlaltik sba ta aꞌiyele. Ya skꞌan ya anopik spasel tutꞌil ya spasik spisil te hermanoetik ta stojol Diose.

³⁴ Te antstike ya me skꞌan skom sba ta kꞌop te ba ay ta kulto te hermanoetike. Porke ma spas te ya xkꞌopojike. Yuꞌun jaꞌ ya skꞌan te ya xchꞌuun te ya xkomot yuꞌun te mantaliletik yuꞌun te Diose.

³⁵ Teme ay tut skꞌan snaꞌbe sluwarile a sjojkꞌobe ta sna te smamlale. Porke ma lekuk teme ay jtul ants te ya xkꞌopoj ta kultoe.

³⁶ Jaꞌ me xꞌanaꞌik te maꞌ jaꞌukex a chiknaj ta akuentaik te skꞌop Diose. Ni ma jaꞌukex nax te la awaꞌibeyik sluware.

³⁷ Teme ay machꞌa skuyoj sbaix ta jꞌalwaneje, o ya skuy te jich albil yuꞌun te Espiritue, a me snaꞌ te tut yipalon ta stsꞌibayele jaꞌ me smantal te Kajwaltike.

³⁸ Y teme ma xyaꞌiye, jaꞌ nax jich ma me awaꞌiybeyik skꞌop euk.

³⁹ Jich yuꞌun, kermanotak, junuk me awoꞌtanik te ya awalik te skꞌop Diose. Y ma me akomik te ya xkꞌopojik ta yan kꞌopiletike.

⁴⁰ Pero ayuk me sluwaril y stojiluk me ya apasik spisil.