1 Corintios 13 - Nuevo Testamento Tzeltal de Amatenango

Jaꞌ tulan skꞌoplal te xkꞌuxul-oꞌtanile

¹ Teme jich ya xkꞌopojon te tutꞌ ya xkꞌopoj winketike o jich tutꞌ ya xkꞌopoj te chꞌul angeletike, pero teme maꞌyuk xkꞌuxul koꞌtane, jich nax kꞌoemon tutꞌil te stsꞌintsꞌun nax te takꞌine sok te chꞌininet nax te platilloe.

² Y manchuk me ya xkꞌopojon ta yalel tut skuenta Dios, o ya jnaꞌ yaꞌiyel te tut mukul aye, o ya jnaꞌ spisil te tutik aye, y manchuk me puersa ay xchꞌuunel koꞌtan yuꞌun ya snik te witstikile, pero teme maꞌyuk xkꞌuxul koꞌtane, jowilon nax me abi.

³ Y manchuk teme ya jpukbey meꞌbaetik spisil te tut ay kuꞌune, sok teme jun koꞌtan ya kakꞌ entregal ta chikꞌel te jtiꞌbalule, pero teme maꞌyuk xkꞌuxul koꞌtane, ni ma xtuunon me abi.

⁴ Te xkꞌuxul-oꞌtanile ya snaꞌ tutꞌ ya xkujch yuꞌun. Bayal slekil yoꞌtan sok maꞌyuk il-oꞌtan. Ni makꞌ yakꞌ sba ta akꞌel ta jkuenta, ni makꞌ stoy sba,

⁵ ni ma toybauk, ma stukeluk nax ya sle te tut skꞌane, ni ma xꞌilin, sok ma xtijtunetuk ta kꞌop.

⁶ Sok ma sniꞌuk xyaꞌiy te mulil ay ta pasele. Jaꞌ ben sniꞌ xyaꞌiy te tut leke.

⁷ Te xkꞌuxul-oꞌtanile spisil ya xkujch yuꞌun, spisil ya xchꞌuun, spisil ya smaliy, sok ya stsꞌijk yuꞌun spisil.

⁸ Te xkuxul-oꞌtanile maꞌyuk tut ora ya xlaj stukel. Pero ya me xlaj skꞌoplal stukel te tutꞌil ya xkꞌopojik jꞌalwanejetik, sok te ya xkꞌopojik ta yanetik kꞌop a, sok te ya xkꞌopojik te machꞌatik ya snaꞌik tut ay ta balmilale.

⁹ Porke olil nax te tut ya snaꞌike y sok te skꞌop Dios ya yalike.

¹⁰ Teme kꞌot yorail ta slajibal te kꞌalal ya xtal te tut batsꞌi toj ta naꞌele, teꞌ ya xchꞌay skꞌoplal te tutꞌil olil to nax ya jnaꞌtike.

¹¹ Te kꞌalal chꞌinon to aye, jich ya xkꞌopojon tutꞌil jtul untik, sok jich la jnop y jich jrason tutꞌil jtul untik. Pero te kꞌalal winikubone, la jilesix ta jpat te tut a te yuꞌun jtul untike.

¹² Te ora to jich to nax ya kil tutꞌil ta jun espejo te ma to chikanuk lek ta ilele. Pero ya xtal jun kꞌaal te ya kiltik spisil te tut a te jamale. Te tut jnaꞌoj te ora to, olil to nax. Pero ya xtal jun kꞌaal te ya me kil spisil jich tutꞌil te Dios ya snaꞌbon jbae.

¹³ Ay oxeb te tutik ma xchꞌay skꞌoplale: Jaꞌ te xchꞌuunel-oꞌtanile, sok te tut ya jmalitike, y sok te xkꞌuxul-oꞌtanile. Pero mas tulan skꞌoplal ta yoxebale, jaꞌ te xkꞌuxul-oꞌtanile.