1 Corintios 12 - Nuevo Testamento Tzeltal de Amatenango

Te majtaniletik ya yakꞌ te Chꞌul Espiritue

¹ Kermanotak, ya jkꞌan te jaꞌex ya anaꞌik te tutꞌil ay skꞌoplal te majtaniletik yuꞌun te Chꞌul Espiritue.

² Te jaꞌexe anaꞌojik te kꞌalal ma to achꞌuunejikuk a te Diose, jun awoꞌtanik likbilex te chꞌayemex bael te ba ay te lotil diosetik te makꞌ xlaj kꞌopoje.

³ Jaꞌ yuꞌun, te ora to ya jkꞌan ya anaꞌik te maꞌyuk machꞌa xjuꞌ ya yal te ma tsaꞌamuk te Jesuse teme jaꞌ ya xkꞌopoj ta spoder te Espíritu yuꞌun te Diose. Y sok maꞌyuk machꞌa ya xjuꞌ ya yal: Te Jesuse ja Kajwal”, teme ma jaꞌuk ya xkꞌopoj ta spoder te Chꞌul Espiritue.

⁴ Skajal-skaj majtaniletik ya yaꞌbotik te Diose, pero te machꞌa ya yakꞌe jaꞌ mismo te Espiritue.

⁵ Ay skajal-skaj te tutꞌil ya xtuunotike, pero spisil te aꞌtele jun nax te Yajwale.

⁶ Y ay skajal-skaj te tutꞌil ay ta pasel te aꞌtele, pero jun nax te Dios te ya yaꞌbotik te ya xjuꞌ kuꞌuntik spasel.

⁷ Dios ya yaꞌbe ta juju-tul te ay tut ya spas ta skuenta te Espiritue yuꞌun jich ya sta slekilalik ta spisilik a.

⁸ Ta skuenta te Espiritue, ay chaꞌoxtul te jaꞌ aꞌbil te ay spꞌijil ya xkꞌopoje. Y jaꞌ nax ta skuenta te Espíritu te ay yanetik te akꞌtalanbil te ya snaꞌik yalel te bayal tut yiloje.

⁹ Ay yan ya xꞌaꞌbot xchꞌuunel yoꞌtan, pero jaꞌ nax ta skuenta te Espiritue. Y ay yanetik yichꞌoj smajtan ta slekutesel jchameletik.

¹⁰ Sok ay yan yichꞌojik spoder ta spasel milagroetik, y ay xan yan yuꞌun ya yalik skꞌop Dios. Y ay yan te ya xꞌaꞌbot snaꞌ yuꞌun Dios teme ta skuenta lekil Espíritu o ta skuenta pukuj te ya xkꞌopojike. Y ay xan yan te ya snaꞌ xkꞌopojik ta yanetik kꞌope, y ay yan xan te ya xꞌaꞌbot te ya snaꞌik skꞌasesel te yan kꞌopetik te tutꞌ ya xꞌalote.

¹¹ Pero ta spisil te jich ay ta pasele, jtul nax Espíritu ya yaꞌbe ta juju-tul te tut la skꞌan yoꞌtan stukele.

Jpisiltik stiꞌbalul Cristo kꞌoemotik

¹² Te Cristoe jich ay tutꞌil te jtiꞌbalultike. Aunke ben bayal tut lokꞌem a, pero jun nax ay.

¹³ Manchuk me juriyootik o ma juriyoukotik, o mosoil o libreix ayotik, jun nax a kꞌootik kꞌalal la kichꞌtik jaꞌ ta skuenta te Espíritu, jich tutꞌil te jun nax ay te jtiꞌbalultike. Y ta jpisiltik ayotik ta skuenta te mismo Espiritue.

¹⁴ Ta skojtol te tiꞌbalulile ma jkajuk nax tut ay yuꞌun, ben bayal tut ay a.

¹⁵ Te jichuk ya yal te okole: “Ma joꞌukon kꞌabalon, jich maꞌyukon ta skuenta tiꞌbalulil”, te xchiuke, ma yuꞌunuk tey ya yijkitay sbaix a te ba tiꞌbalulile.

¹⁶ Y te jichuk ya yal te chikinile: “Ma joꞌukon sitilon, jich maꞌyukon ta skuenta tiꞌbalulil”, te xchiuke, ma yuꞌunuk tey ya yijkitay sbaix a te ba tiꞌbalulile.

¹⁷ Te sitiluk skojtol te tiꞌbalulile, ma spas ya yaꞌiy kꞌop. Y te jaꞌuk chikinil skojtol te tiꞌbalulile, ma spas ya yaꞌibe yikꞌ te tut ay yikꞌe.

¹⁸ Pero te Diose jich a yakꞌ ta skajal-skaj te tutꞌ ay te tiꞌbalulile te jich a skꞌan yoꞌtan stukele.

¹⁹ Te junuk nax ay te tut ay teꞌae, te tiꞌbalulile ma tsꞌakaluk te jichuke.

²⁰ Pero jun nax ay te tiꞌbalulile, aunke ben bayal te tut ay ta skajal-skaje.

²¹ Te sitile ma spas ya yalbey te kꞌabale: “Ma puersaukat kuꞌun”, ma xchiuk. Ni te jolole ma xjuꞌ ya yalbey te okoletik: “Ma puersaukex kuꞌun”, ma xchiuk.

²² Ma jichuk. Te tutik ay ta tiꞌbalulil te maꞌyuk spuersa yilele, jaꞌlan te mas lom puersae.

²³ Y te tutik ay ta tiꞌbalulil te maꞌyuk stuunel yilele, jaꞌ mas ya skꞌan jkꞌuxutaytik lek. Y te tutik ma snujpꞌuk ya kakꞌtik ta ilele, jaꞌ mas to xan ya skꞌan jmaktik ta lek.

²⁴ Pero ma skꞌan makel stukel te ba mas tsaꞌam ta ilele. Dios a spas te tiꞌbalulile. Ja sluwaril te ay te maꞌyuk skꞌoplale, ya skꞌan akꞌel lek ta jkuenta.

²⁵ Yuꞌun maꞌyuk tut ya skontrain sbaik a te tutik ay ta tiꞌbalulile. Jich talel bael ya xkꞌuxutay sbaik.

²⁶ Teme ay ta wokol junuk te tut ay ta tiꞌbalulile, spisil te yane aylan ta wokol euk. Y teme ya sta slekilal junuke, ta spisilik ya xjunub yoꞌtanik yuꞌun.

²⁷ Te jaꞌexe stiꞌbalul Cristo kꞌoemex, y ta juju-tulex ja yok-skꞌab kꞌoemex.

²⁸ Dios jicha skꞌan ta juju-tijkꞌ hermanoetik te jaꞌ nail ay te apostoletike; y ta xchebal, jꞌalwanejetik; y ta yoxebal, maestroetik. Teꞌ nax ay ekꞌa te machꞌatik ya xꞌaꞌbot spas milagroetik, y ay yan te ya slekutes jchameletik, o ya xkoltawanik, o ya stsobawanik, o ya xkꞌopojik ta yanetik kꞌop.

²⁹ Ni ma spisiluk apostoletik ni ma spisiluk jꞌalwanejetik, ni ma spisiluk maestroetik, ni ma spisiluk ya spasik milagroetik,

³⁰ ni spisiluk ay spoder yuꞌun ya slekutes jchameletik. Sok ma spisiluk ya xkꞌopojik ta yanetik kꞌop, ni ma spisiluk ya snaꞌik skꞌasesel yanetik kꞌop.

³¹ Te jaꞌexe ya skꞌan te junuk awoꞌtanik yuꞌun te ya yaꞌbelex te ben tsaꞌam majtaliletike. Joꞌon me ya jnopesex ta jun be te ben tsaꞌame.