1 Corintios 11 - Nuevo Testamento Tzeltal de Amatenango

¹ Te jaꞌexe jaꞌ me xꞌanopik te tut ya kakꞌ awilike, jich tutꞌ joꞌon te jaꞌ jnopojbe tutꞌ ay te Cristoe.

Skꞌoplal antstik ta kultoe

² Kermanotak, ben jun koꞌtan awuꞌunik te ma xchꞌayon ta awoꞌtanike. Sok te tutꞌil ay ta awoꞌtanik te nojpesel a kaꞌbeyex jilele.

³ Pero ya jkꞌan ya anaꞌik te Cristo jaꞌ jolol yuꞌun spisil te winketike. Y te winike jaꞌ jolol yuꞌun te yiname, jich tutꞌil te jaꞌ sjol Cristo te Diose.

⁴ Teme ay jtul winik teme ya smuk sjol te kꞌalal ya skꞌopon Dios, o te kꞌalal ya yal skꞌop Diose, jaꞌ ya yakꞌ ta kꞌexlal a te jolol yuꞌune.

⁵ Pero ta spisil antstik teme makꞌ smuk sjol te kꞌalal ya skꞌopon Dios, o te kꞌalal ya yal skꞌop Diose, jaꞌ ya yakꞌ ta kꞌexlal a te jolol yuꞌune. Jaꞌ pajal sok teme jkꞌaxel tꞌaxal a jil ta joxel te sjole.

⁶ Porke teme ay jtul ants te makꞌ smuk sjole, jaꞌ lek te yauk yakꞌ ta joxel jmel naxe. Pero teme ya xkꞌexaw ya yaꞌiy yuꞌun te joxbil o teme tꞌaxanbil te sjole, a me smuk abi.

⁷ Te winike ma spas te ya smuk sjol stukele, porke jaꞌ slokꞌol Dios stukel y teꞌ ya xchiknaj a te slekilal Diose. Pero te antse teꞌ ya xchiknaj slekil a ta skuenta te winike.

⁸ Yuꞌun te winike ma teyuk a lokꞌ ba antse; jaꞌ te antse teꞌ lokꞌ ba winike.

⁹ Y te winike ma jaꞌuk a pas ta skaj te antse; jaꞌ te antse jaꞌ a pas ta skaj te winike.

¹⁰ Jaꞌ yuꞌun puersa jich ya skꞌane te ya yakꞌ ta sjol jun seña te ay yaꞌtel te antse, y sok ta skaj te chꞌul angeletike.

¹¹ Pero ta skuenta te Kajwaltike, maꞌyuk tut ya xjuꞌ yuꞌun te winik teme maꞌyuk te antse, sok maꞌyuk tut ya xjuꞌ yuꞌun te antse teme maꞌyuk te winike.

¹² Yuꞌun jich tutꞌil te antse teꞌ lokꞌ te ba ay te winike, batsꞌi jich euk te winike ya xꞌayin ta skuenta ants. Y spisil ta skuenta Dios ya xchiknaj.

¹³ Ichꞌaik jkuenta mismo te jaꞌexe me jaꞌ lek te ants te ya skꞌopon Dios te makꞌ smuk sjole.

¹⁴ Te tutꞌil ayotike mismo ya yaꞌbotik jnaꞌtik te jaꞌ jun kꞌexlal teme ya stsꞌijtes stsotsil sjol te winike.

¹⁵ Yan te antstike teme ya stsꞌijtes stsotsil sjolike, jaꞌ lek stukel. Porke stukelike jich akꞌtalanbil te najtꞌ stsotsil sjolik te jich ya smuk sjolik ae.

¹⁶ Pero teme ay machꞌa ma tsaꞌamuk ya yaꞌiy te tuti kale, a me snaꞌbe sluwaril te maꞌyuk yan tut ya jpastike te joꞌotik sok te yanetik te xchꞌuunejikix Diose.

Te machꞌatik ma tulanuk skꞌoplal ta yoꞌtan te xmexa Kajwaltike

¹⁷ Te tut sigue, ya kalbeyex te ora to, ma lekuk ya kaꞌiy te tut ya apasike. Yuꞌun ya kaꞌiy te tut ora ya atsob abaike, jaꞌ nax awixlanelik en bes ke lek te tut ya apasike.

¹⁸ Te primero ma lekuk ya kaꞌiye, jaꞌ te ay albilon te kꞌalal ya atsob abaik ta kultoe te juju-tijkꞌ ayexe. Y ay jchꞌuunej te jicha nix ayex aye.

¹⁹ Yuꞌun ya kaꞌiy te jaꞌexe puersa ya xba apit abaik ta juju-tijkꞌ; yuꞌun te ya xchiknaj a te machꞌa batsꞌi xchꞌuunej te Diose.

²⁰ Te tutꞌil jich axatꞌoj abaike, jich ma tojukix ya apasik te xmexa Kajwaltik kꞌalal ya atsob abaike.

²¹ Porke ta yorail te ya xweꞌexe, ta juju-tul ya xnalaj ta weꞌel te tut yichꞌoje. Y jich ay to ta wiꞌnal ya xjil a te yane, y te yane asta ya xyakub.

²² ¿Meꞌn maꞌyuk anaꞌik te jaꞌexe te ba ya xweꞌex-xꞌuchꞌaexe? ¿Tuꞌun te ya apꞌajik te machꞌatik xchꞌuunejikix Diose? ¿Y tuꞌun te ya awakꞌik ta kꞌexlal te machꞌatik maꞌyuk tut ay yuunike? ¿Tut a te ya kalbeyexe? ¿Me ya kal te ben tsaꞌam te tut ya apasike? Maꞌuk.

Te Xmexa Kajwaltike

²³ Porke te joꞌone jaꞌ yakꞌojbon te Kajwaltik te nojpesel te la kaꞌbeyexe. Jaꞌ bi, jaꞌix a te mismo ajkꞌubal te ya xꞌakꞌot entregal te Kajwaltik Jesuse, la stsak ta skꞌab te waje.

²⁴ Y teꞌ nax a la yalbe kola yal Dios yuꞌun, la xetꞌ, y la yal: “Awilik, weꞌaik. Jaꞌto jaꞌ jtiꞌbalul te ya xꞌakꞌot ta milel yuꞌun a lekilik a te jaꞌexe. Jich me pasulanaik sil tiempo yuꞌun teꞌ me ya anaikon a”, xchi.

²⁵ Jaꞌ nax jich te kꞌalal laj yoꞌtanik ta weꞌele, la stsak ta skꞌab te basoe y la yal: “Te baso to jaꞌ te yachꞌil trate te ay spuersa ya xkꞌot ta skuenta te jchꞌichꞌele. Ta juju-mel te ya awuchꞌike, yuꞌun teꞌ me ya anaꞌikon a —xchi.

²⁶ Jich yuꞌun ta juju-chꞌoj te ya aweꞌik te waj to sok te ya awuchꞌik te tut ay ta basoe, jaꞌ ya awalik ta jamal a te tutꞌil a cham te Kajwaltike, jaꞌ to te kꞌalal ya xchꞌatal xane.

Tutꞌil ya skꞌan ya jtsaktik te xmexa Kajwaltike

²⁷ Jich yuꞌun, machꞌauk a te ya sweꞌ te waje o ya yuchꞌ te tut ay ta baso yuꞌun te Kajwaltike, teme ma tulanuk skꞌoplal ta yoꞌtane, la staix smul yuꞌun a te tutꞌil maꞌyuk skꞌoplal ta yoꞌtan te stiꞌbalul y sok xchꞌichꞌel te Kajwaltike.

²⁸ Pero ta juju-tul a me yaꞌi sba tutꞌ ay teme jun yoꞌtan te ya sweꞌ te waje y ya yuchꞌ te tut ay ta basoe.

²⁹ Porke teme ya sweꞌ y ya yuchꞌe, teme ma snaꞌbe sluwar te jaꞌ seña te sitꞌbalul te Kajwaltike, yuꞌun stukel me ya sta kastigo a te ya sweꞌ y ya yuchꞌe.

³⁰ Jaꞌ yuꞌun, ben bayal te ayex ta chamele y sok te maꞌyuk apuersaike. Y ay chaꞌoxtul te chamix baele.

³¹ Yan teme la kaꞌiy jbatik ta lek te joꞌotik mismoe, te Kajwaltike ma lomuk nax ya yaꞌbotik kastigo.

³² Aunke te Kajwaltike ay ya yaꞌbotik kastigo yuꞌun ya xpꞌijubotik a y yuꞌun ma chaꞌyeluk ya xbootik sok a te machꞌatik ayik ta skuenta te balmilale.

³³ Jich yuꞌun, kermanotak, te kꞌalal ya atsob abaik ta weꞌele, maliya me abaik ta juju-tul.

³⁴ Y teme ay machꞌa ay ta wiꞌnale, a me weꞌuk ta sna. Yuꞌun te Diose makꞌ ya yaꞌbeyex kastigo a teme jich ya atsob abaike. Y te yan xan kꞌopetike, jaꞌ ya jchaptalan jilel a te kꞌalal ya xtal kilexe.