1 Corintios 10 - Nuevo Testamento Tzeltal de Amatenango

Tsitsel yuꞌun te ma lekuk ta chꞌuunel te lotil diosetike

¹ Kermanotak, maꞌ jkꞌan te ya xchꞌay ta awoꞌtanik te antibo jmeꞌ-jtatik te axintesot ta spisilik ta yanil te tokale, sok spisilik te kꞌaxik tal ta tsajal mare.

² Spisilik la yichꞌik jaꞌ kꞌoem te tutꞌil jun nax a laj kꞌotik sok te jMoises te axinteslanot ta tokal sok te kꞌaxik ta mare.

³ Y spisilik la sweꞌik te jun nax weꞌelil a aꞌbot yuꞌun te Diose.

⁴ Y spisilik a yuchꞌik te jaꞌ a aꞌbot yuꞌun te Diose. Porke la yuchꞌik te jaꞌ te lokꞌ tal ta tone te jaꞌ joyinbilik yuꞌune. Y te tone jaꞌix te Cristoe.

⁵ Pero chꞌin ma spisiluk te la spasik te tut ma lekuk ta stojol Diose. Jaꞌ yuꞌun te stiꞌbalulike witsil jilel ta lajel te ba jojchol luware.

⁶ Spisil te jicha kꞌot ta pasele yuꞌun jich ya jnaꞌtik a te joꞌotike, yuꞌun jich makꞌ ya jkꞌupintik spasel te tut ma lekuke, jich tutꞌil te la skꞌan yoꞌtanike.

⁷ Jaꞌ yuꞌun, ma me achꞌuunik te lotil diosetike jich tutꞌil te la spasik stukelike. Jich tutꞌil te tsꞌibabil jilele: “Te jtejklume la snajkan sbaik ta weꞌel y ta uchꞌbajel, y teꞌ nax a lijkik ta pas-kꞌin”, te xchie.

⁸ Ma me wakꞌ jpastik antsiwejel, jich tutꞌil te la spasike, te jich chamik beintitres mil ta jtul ta jun nax kꞌaal.

⁹ So ma me wakꞌ kilbetik yoꞌtan te Kajwaltike jich tutꞌ stukelik te la yilbeyik yoꞌtane. Jich a chamik te tiꞌel ta chan.

¹⁰ Sok ma me awixtaꞌkꞌoptayik te Diose jich tutꞌil te la yixta-kꞌoptayik stukelike, te jich a miltalanot yuꞌun te chꞌul ángel te ya xmilawane.

¹¹ Spisil to jicha kꞌot ta pasel yuꞌun te antibo jmeꞌ-jtatike yuꞌun jun seña ta jtojoltik, y jicha tsꞌibayot jilel ta Sjun te Diose. Yuꞌun jun jpꞌijuteseltik te kuxulotik ta slajibal kꞌaale.

¹² Jich yuꞌun, te machꞌa ya skuy te lekix ta skꞌope, a me yil sba te ma me xyal ta mulile.

¹³ Te jaꞌexe maꞌyuk kꞌaxem awuꞌunik te ilel-awoꞌtanik te ma ba yaꞌiyojik te yanetike. Y te jaꞌexe ya xjuꞌ te ay smukꞌul awoꞌtanik ta stojol Dios te ma xyakꞌ kꞌaxuk awokolik ta ilel awoꞌtanik te lom tulan te ma xkujch awuꞌunike. Pero ma jichuk, te kꞌalal ya xtal te ilel-awoꞌtanike, te Diose ya sle tutꞌ ya skoltayex lokꞌel a, yuꞌun jich ya xjuꞌ awuꞌunik a.

¹⁴ Jaꞌ yuꞌun, kermanotak te ben kꞌuxex ta koꞌtane, jilesaik me ta jmel nax te xchꞌuunel te lotil diosetike.

¹⁵ Jich ya jkꞌoponlanex te tutꞌil mukꞌul gente te ya snaꞌikix kꞌinale. Y jaꞌex mismo ya xjuꞌ ya awichꞌik jkuenta te tutiꞌ kaltalanbeyexe.

¹⁶ Te kꞌalal ya kuchꞌtik te tut ay ta chꞌul baso te ya kalbetik kola yal a te Diose, jich ya kakꞌtik ta ilel te tutꞌil jun nax kꞌoemotik sok Cristo ta skuenta te xchꞌichꞌele. Te kꞌalal ya jweꞌtik te waj te ya xatꞌ jbajtik aye, jich ya kakꞌtik ta ilel te tutꞌil jun nax kꞌoemotik sok Cristo ta skuenta te stiꞌbalule.

¹⁷ Aunke lom bayalotik, jpisiltik jun nax te waj ya jweꞌtike yuꞌun jun nax kꞌoemotik sok a.

¹⁸ Naꞌaik me te tutꞌil ay te jtejklum Israele: Te machꞌatik ya sweꞌik te chambalametik te ya xꞌakꞌot ta smajtan Diose, jun nax ya xkꞌotik sok te skajtijibe.

¹⁹ Ma yuꞌunuk ya kal te ay ta chꞌuunel te lotil diosetike. Sok ma yuꞌunuk ya kal te ay tulan skꞌoplal te smajtan tiꞌbal te lotil diosetike.

²⁰ Te tut ya kale, jaꞌ te kꞌalal jich ya spasik te machꞌatik ma snaꞌbeyik sba Diose te ay tut ya yaꞌbeyik smajtanin te lotil diose, jaꞌ ya yaꞌbeyik smajtan a te pukuje, y ma jaꞌuk yuꞌun te Diose. Y te joꞌone ma jkꞌan teme jich ya apasik te ya awakꞌ abaik sok te pukujetike.

²¹ Ma spas teme ya awuchꞌ te tut ay ta baso yuꞌun te Kajwaltike y sok tem ya atsakbe te sbaso pukujetike. Ni ma spas te teꞌ ya xba naklan te ba ay xmexa te Kajwaltike y sok teme ya xba naklan te ba ay xmexa te pukujetike.

²² ¿Me yuꞌun jaꞌ ya jkꞌantik te ya kakꞌtik ilinuk te Kajwaltike? ¿Meꞌn joꞌotik mas tulanotik ke te Diose?

Te tutꞌ ayotik ta libre yuꞌun spasel

²³ Ay ya yalik: “Ayotik ta libre yuꞌun spasel te tutꞌ ya jkꞌantike”, xchiik. Jich. Pero ma spisilik ya xlokꞌ jkuenta kuꞌuntik a. Ayotik ta libre yuꞌun spasel te tut ya jkꞌan jpastike, pero ma spisiluk te ya skoltayotik ta skuenta Diose.

²⁴ Ma me ayuk machꞌa ya sle te stukel nax slekil aye. Jaꞌ ya skꞌan te ya jlebetik slekil euk te yane.

²⁵ Te jaꞌexe weꞌaik spisil te tut ya xchonot te ba ay jmil-tiꞌbaletike. Ma me ajojkꞌoyik ba talem te tiꞌbale yuꞌun jich me jun awoꞌtan a.

²⁶ Porke ta spisil te balmilale sok spisil te tutik ay ae, jaꞌ yuꞌun te Kajwaltike.

²⁷ Teme ay jtul te ma xchꞌuunejuk Dios teme ya yikꞌex ta weꞌele y teme ya akꞌan xbaexe, weꞌaik spisil te tut ya skꞌaesbeyex tale. Ma me ajojkꞌoyik ba tal te tiꞌbale, skuenta jun awoꞌtanik a.

²⁸ Yan teme ay machꞌa ya yalbeyex: “Te tiꞌbal to jaꞌ aꞌbil ta smajtan te lotil diosetike”, teme xchie, ma me aweꞌik teme jich aye, ta skaj te machꞌa la yalbeyat sok skuenta maꞌyuk machꞌa ya xjim yoꞌtan yuꞌun.

²⁹ Manchuk me ma xjim te awoꞌtan yuꞌune, ja ya jnaꞌ teme ya xjim yoꞌtan te yane. Pero ay yan ya yal: “¿Tuꞌun te ya kichꞌ komel te tut libre ayon ta spasel ta skuenta yoꞌtan te yane?

³⁰ Teme ya kalbe kola yal Dios yuꞌun te tut ya jweꞌe, ¿tuꞌun te ya awalbikon te ma lekuk te ya jweꞌe?” teme xchie.

³¹ Ya kalbeyex: Teme ay tutꞌ ya xweꞌex o xꞌuchꞌaex o teme ay tut yan xan ya apasik, pasaik spisil ta skuenta slekilal a te Diose.

³² Ma me awakꞌik ta ilel te tut ma tsaꞌamuk ta stojol te yane, ni jaꞌuk te juriyoetike, ni te machꞌatik ma juriyouke, ni te machꞌatik ayikix ta stojol te Diose.

³³ Te tut ya jpas te joꞌone, jaꞌ te tut lek yoꞌtanik yuꞌun ta spisilik. Ma jaꞌuk ya jle te joꞌon nax jlekilal aye. Jaꞌ ya jlebey slekilalik euk te yane yuꞌun jich me ya staik skolelik ekꞌa.