Tìtus 2 - Am Bìoball Iomraidh Gàidhlig 1880 1992

1 Comhairlean air an tabhairt do Thìtus araon mu thimcheall a theagaisg agus a chaitheamh‐beatha. 9 Mu dhleasdanas sheirbhiseach, agus mar an ceudna mu dhleasdanas nan uile Chrìosdaidhean.

¹ Ach labhair thusa na nithean a thig ri teagasg fallain:

² Eadhon na daoine aosda a bhith aireach, suidhichte, measarra, fallain anns a’ chreideamh, ann an gràdh, ann am foighidinn:

³ Mar an ceudna na mnathan aosda a bhith nan giùlan mar as cubhaidh do naomhachd, gun a bhith nan luchd‐tuaileis, gun a bhith trom air fìon, a bhith nan luchd‐teagaisg air nithean matha;

⁴ A‑chum gun teagaisg iad na mnathan òga a bhith ciallach, gràdhach air am fir, gràdhach air an cloinn,

⁵ A bhith eagnaidh, geamnaidh, fantainn aig an taigh, a bhith math, umhail dam fir a‑chum nach faigh facal Dhè mì‑chliù.

⁶ Cuir impidh air na daoine òga mar an ceudna, iad a bhith ciallach.

⁷ Anns na h‑uile nithean gad nochdadh fhèin ann ad eisempleir dheagh obraichean: ann an teagasg a’ nochdadh neo‐thruaillidheachd, suidheachadh inntinn, treibhdhireis,

⁸ Cainnt fhallain nach fhaodar a dhìteadh; a‑chum gum bi nàire air an neach a tha nur n‑aghaidh, a chionn nach eil droch nì sam bith aige ri labhairt umaibh.

⁹ Earalaich seirbhisich a bhith umhail dam maighistirean fhèin, agus an deagh‐thoileachadh anns na h‑uile nithean: gun a bhith a’ labhairt nan aghaidh;

¹⁰ Gun a bhith a’ ceiltinn aon nì den cuid, ach a’ nochdadh gach uile dheagh thairisneachd; a‑chum gun dèan iad teagasg Dhè ar Slànaighear maiseach anns na h‑uile nithean.

¹¹ Oir dh’fhoillsicheadh gràs slàinteil Dhè do na h‑uile dhaoine;

¹² A’ teagasg dhuinn gach mì‑dhiadhachd agus ana‑miann saoghalta àicheadh, agus ar beatha a chaitheamh gu stuama, gu cothromach, ach gu diadhaidh anns an t‑saoghal seo an làthair;

¹³ Air dhuinn sùil a bhith againn ris an dòchas bheannaichte sin, eadhon foillseachadh glòir an Dè mhòir, agus ar Slànaighir Iosa Crìosd:

¹⁴ A thug e fhèin air ar son, a‑chum gun saoradh e sinn o gach aingidheachd, agus gun glanadh e dha fhèin sluagh sònraichte, eudmhor mu dheagh obraichean.

¹⁵ Na nithean seo labhair, agus earalaich, agus cronaich leis an uile ùghdarras. Na dèanadh duine sam bith tàir ort.