Taisbeanadh 22 - Am Bìoball Iomraidh Gàidhlig 1880 1992

1 Abhainn uisge na beatha, 2 craobh na beatha. 5 Is e Dia fhèin solas na caithreach. 9 Chan fhulaing an t‑aingeal adhradh a dhèanamh dha. 18 Chan fhaodar nì sam bith a chur ri facal Dhè, no a thoirt uaith.

¹ Agus dh’fheuch e dhomh abhainn fhìorghlan de uisge na beatha, soilleir mar chriostal, a’ teachd a‑mach à rìgh‐chathair Dhè, agus an Uain.

² Ann am meadhon sràid na cathrach, agus air gach taobh den abhainn, bha craobh na beatha, a’ giùlan dà‑thoradh‐dheug, agus a’ toirt a toraidh uaipe gach uile mhìos; agus bha duilleach na craoibhe a‑chum leigheas nan cinneach.

³ Agus cha bhi mallachd air bith ann nas mò: ach bidh rìgh‐chathair Dhè agus an Uain innte; agus nì a sheirbhisich seirbhis dha.

⁴ Agus chì iad a aghaidh; agus bidh a ainm‐san air clàr an aodainn.

⁵ Agus cha bhi oidhche an sin, agus chan eil feum aca air coinnil, no air solas na grèine: oir bheir an Tighearna Dia solas dhaibh: agus rìoghaichidh iad gu saoghal nan saoghal.

⁶ Agus thubhairt e rium, Tha na briathran seo dìleas agus fìrinneach. Agus chuir an Tighearna, Dia nam fàidhean naomha, a aingeal fhèin a nochdadh da sheirbhisich nan nithean sin as èiginn tachairt gu h‑aithghearr.

⁷ Feuch, tha mi a’ teachd gu luath: is beannaichte an tì a choimheadas briathran fàidheadaireachd an leabhair seo.

⁸ Agus chunnaic mise Eòin na nithean seo, agus chuala mi iad: agus nuair a chuala agus a chunnaic mi iad, thuit mi sìos a’ dèanamh adhraidh ro chasan an aingil a nochd na nithean seo dhomh.

⁹ An sin thubhairt e rium, Feuch nach dèan thu e: oir is co‑sheirbhiseach dhut mise, agus dod bhràithrean na fàidhean, agus dhaibhsan a choimheadas briathran an leabhair seo: dèan adhradh do Dhia.

¹⁰ Agus thubhairt e rium, Na seulaich facail fàidheadaireachd an leabhair seo: oir tha an t‑àm am fagas.

¹¹ An tì a nì eucoir, dèanadh e eucoir a‑ghnàth: agus an tì a tha salach, biodh e salach a‑ghnàth: agus an tì a tha na fhìrean, biodh e na fhìrean a‑ghnàth: agus an tì a tha naomh, biodh e naomh a‑ghnàth.

¹² Agus, feuch, tha mi a’ teachd gu h‑aithghearr; agus tha mo luach‐saothrach maille rium, a thoirt do gach aon fa leth, a rèir mar a bhios a ghnìomharan.

¹³ Is mise Alpha agus Omega, an tùs agus a’ chrìoch, an ciad neach agus an neach deireannach.

¹⁴ Is beannaichte iadsan a nì a àitheantan‐san, a‑chum gum bi còir aca air craoibh na beatha, agus gun tèid iad a‑steach tre na geatachan don bhaile.

¹⁵ Oir an taobh a‑muigh tha madaidhean, agus luchd‐draoidheachd, agus luchd‐strìopachais, agus luchd‐mort, agus luchd‐iodhal‐adhraidh, agus gach neach a ghràdhaicheas, agus a nì, breug.

¹⁶ Chuir mise Iosa m’aingeal a dhèanamh fianais dhuibhse air na nithean seo anns na h‑eaglaisean. Is mise freumh agus gineal Dhaibhidh, an reul dhealrach agus mhaidne.

¹⁷ Agus tha an Spiorad agus a’ bhean nuadh‐phòsda ag ràdh, Thig. Agus abradh an tì a chluinneas, Thig. Agus an neach air a bheil tart, thigeadh e. Agus ge bè neach leis an àill, gabhadh e uisge na beatha gu saor.

¹⁸ Oir tha mi a’ dèanamh fianais do gach uile neach a chluinneas briathran fàidheadaireachd an leabhair seo, Ma chuireas neach air bith ris na nithean seo, cuiridh Dia airsan na plàighean a tha sgrìobhte anns an leabhar seo:

¹⁹ Agus ma bheir neach air bith o bhriathran leabhar na fàidheadaireachd seo, bheir Dia a chuibhreann‐san à leabhar na beatha, agus as a’ bhaile naomh, agus as na nithean a tha sgrìobhte anns an leabhar seo.

²⁰ Tha an Tì a tha a’ toirt fianais air na nithean seo ag ràdh, Gu deimhinn tha mi a’ teachd gu h‑aithghearr. Amen. Seadh, thig, a Thighearna Iosa.

²¹ Gràs ar Tighearna Iosa Crìosd gu robh maille ribh uile. Amen.