Salm 99 - Am Bìoball Iomraidh Gàidhlig 1880 1992

1 Tha am fàidh a’ nochdadh gu bheil Dia na rìgh os cionn na talmhainn, 5 agus gur còir sleuchdadh aig stòl a chos.

¹ Tha an Tighearna a’ rìoghachadh; criothnaicheadh na slòigh; tha e na shuidhe eadar ceruban; biodh crith air an talamh.

² Tha an Tighearna mòr ann an Sion, agus tha e àrd os cionn gach sluaigh.

³ Moladh iad d’ainm mòr agus uamhasach; is naomh e.

⁴ Agus is toigh leis an Rìgh chumhachdach breitheanas; is tu a shocraicheas a’ chòir; nì thusa breitheanas agus ceartas ann an Iàcob.

⁵ Ardaichibh an Tighearna ar Dia, agus sleuchdaibh aig stòl a chas; is naomh esan.

⁶ Bha Maois agus Aaron am measg a shagart, agus Samuel nam measg‐san a ghairm air a ainm; ghairm iadsan air an Tighearna, agus fhreagair esan iad.

⁷ Ann am baideal neòil labhair e riu; ghlèidh iad a theisteis agus an reachd a thug e dhaibh.

⁸ A Thighearna ar Dia, fhreagair thusa iad; is tu an Dia a thug maitheanas dhaibh, ged rinn thu dìoghaltas airson an gnìomharan.

⁹ Ardaichibh an Tighearna ar Dia, agus sleuchdaibh aig a shliabh naomh, oir is naomh an Tighearna ar Dia.