Salm 93 - Am Bìoball Iomraidh Gàidhlig 1880 1992

Mòralachd agus naomhachd oighreachd Chrìosd.

¹ Tha an Tighearna a’ rìoghachadh, tha e air a sgeadachadh le mòralachd; tha an Tighearna air a sgeadachadh le neart, agus chrioslaich e e fhèin; tha an saoghal mar an ceudna air a dhaingneachadh, a‑chum nach gluaisear e.

² Dhaingnicheadh do rìgh‐chathair o chian; o shìorraidheachd tha thusa ann.

³ Thog na tuiltean suas, a Thighearna, thog na tuiltean suas an guth; togaidh na tuiltean suas an tonnan.

⁴ Os cionn toirm uisgeachan lìonmhor, os cionn tonnan neartmhor na mara, is neartmhor anns na h‑àrdan an Tighearna.

⁵ Tha do theisteis ro‑fhìor; dod thaigh‐sa is iomchaidh naomhachd, a Thighearna, gu bràth.