Salm 9 - Am Bìoball Iomraidh Gàidhlig 1880 1992

1 Mhol Daibhidh an Tighearna do bhrìgh gun tug e breith air a naimhdean. 13 Ghuidh e gun dèanadh Dia tròcair air na àmhghar, agus gun saoradh e an t‑ainnis à làimh an aingidh.

Don àrd‐fhear‐ciùil air Mut‐laben. Salm le Daibhidh.

¹ Molaidh mi thu, a Thighearna, lem uile chridhe; cuiridh mi an cèill d’obraichean iongantach gu lèir.

² Nì mi aoibhneas agus gàirdeachas annad; seinnidh mi cliù dod ainm, O Thì as àirde.

³ Nuair a thillear mo naimhdean air an ais, tuitidh iad agus thèid as dhaibh ad fhianais;

⁴ Oir sheas thu dhomh mo chòir agus mo chùis; shuidh thu air do rìgh‐chathair a’ toirt breith le ceartas.

⁵ Smachdaich thu na cinnich, sgrios thu na h‑aingidh; chuir thu as dan ainm gu saoghal nan saoghal.

⁶ Chaidh crìoch air sgrios an nàmhaid am feasd; leag thu sìos am bailtean mòra; thèid as dan cuimhne maille riu fhèin.

⁷ Ach mairidh an Tighearna gu sìorraidh; dheasaich e a rìgh‐chathair a‑chum breitheanais.

⁸ Agus bheir esan breith air an t‑saoghal ann am fìreantachd, nì e breitheanas don t‑sluagh ann an ceartas.

⁹ Agus bidh an Tighearna na dhaingneach don tì a shàraichear, na dhaingneach ann an aimsirean teanntachd.

¹⁰ Agus cuiridh iadsan don aithne d’ainm an dòigh annad, oir cha trèig thusa, a Thighearna, iadsan a dh’iarras thu.

¹¹ Seinnibh cliù don Tighearna a chòmhnaicheas ann an Sion; aithrisibh am measg nan cinneach a ghnìomharan.

¹² Nuair a nì e rannsachadh air fuil, cuimhnichidh e orra; cha dìochuimhnich e glaodh nam bochd.

¹³ Dèan tròcair orm, a Thighearna; amhairc air m’àmhghar a tha mi a’ fulang uapasan lem fuathach mi, O thusa a tha gam thogail suas o gheatachan a’ bhàis;

¹⁴ A‑chum gum foillsich mi do chliù uile ann an geatachan nighean Shioin: nì mi gàirdeachas ann ad shlàinte.

¹⁵ Thuit na cinnich sìos anns an t‑sloc a rinn iad; anns an lìon a dh’fhalaich iad chaidh an cas fhèin an sàs.

¹⁶ Aithnichear an Tighearna anns a’ bhreitheanas a rinn e; ann an gnìomh a làmh fhèin ribear an t‑aingidh. Higaion. Selah.

¹⁷ Cuirear na h‑aingidh gu ifrinn, na cinnich uile nach cuimhnich Dia.

¹⁸ Oir cha dìochuimhnichear an t‑ainnis gu bràth; cha tèid as do dhòchas nam bochd gu sìorraidh.

¹⁹ Eirich, a Thighearna, na buadhaicheadh duine; thugar breith air na cinnich ad fhianais.

²⁰ Cuir, a Thighearna, eagal orra, a‑chum gun aithnich na cinnich nach eil annta fhèin ach daoine. Selah.