Salm 81 - Am Bìoball Iomraidh Gàidhlig 1880 1992

1 Earail gu Dia a mholadh. 8 Chomhairlich Dia do Israel ùmhlachd a thoirt da thoil, agus gheall e an teasairginn o làimh an naimhdean.

Don àrd‐fhear‐ciùil air Gitit . Salm le Asaph.

¹ Seinnibh gu h‑ait do Dhia ar neart; togaibh iolach to Dhia Iàcoib.

² Glacaibh salm, agus thugaibh tiompan leibh; a’ chlàrsach bhinn maille ris an t‑saltair.

³ Anns a’ ghealaich nuaidh sèidibh an trompaid, anns an àm shuidhichte, air là ar fèille.

⁴ Oir bu reachd seo do Israel, riaghailt le Dia Iàcoib.

⁵ Mar fhianais shuidhich e e ann an Iòseph, nuair a thàinig e a‑mach à tìr na h‑Eiphit, far an cuala e cainnt nach do thuig e.

⁶ On eallaich thug mi as a ghualainn; o na poitean shaoradh a làmhan.

⁷ Ann an teinn ghairm thu, agus shaor mi thu; fhreagair mi thu ann an ionad diamhair an tàirneanaich; dhearbh mi thu làimh ri uisgeachan Mheribah. Selah.

⁸ Eisd, O mo shluagh, agus bheir mi fianais dhut; O Israeil, ma dh’èisdeas tu rium;

⁹ Cha bhi dia coigreach annad, agus cha chrom thu sìos do dhia coimheach.

¹⁰ Is mise an Tighearna do Dhia, a thug a‑nìos thu à tìr na h‑Eiphit; fosgail do bheul gu farsaing, agus lìonaidh mise e.

¹¹ Gidheadh cha d’èisd mo shluagh rim ghuth, agus cha do ghabh Israel rium.

¹² Uime sin thug mi thairis iad do ana‑miann an cridhe fhèin; dh’imich iad nan comhairle fhèin.

¹³ O nach èisdeadh mo shluagh rium, nach imicheadh Israel am shlighean!

¹⁴ Gu luath leagainn sìos an eascairdean, agus thionndaidhinn mo làmh an aghaidh an naimhdean.

¹⁵ Bheireadh luchd‐fuath an Tighearna ùmhlachd dha, ach mhaireadh an aimsir‐san gu bràth.

¹⁶ Agus bheathaicheadh e iad le smior a’ chruithneachd, agus le mil on charraig shàsaichinn thu.