Salm 68 - Am Bìoball Iomraidh Gàidhlig 1880 1992

1 Ghuidh Daibhidh gun sgapadh Dia a naimhdean. 4 Earail gu Dia a mholadh airson a thròcairean, 7 agus airson a chùraim da shluagh.

Don àrd‐fhear‐ciùil. Salm no laoidh le Daibhidh.

¹ Eireadh Dia! Biodh a naimhdean air an sgapadh, agus teicheadh iadsan aig a bheil fuath dha o a ghnùis!

² Mar a dh’fhuadaichear deatach, fuadaichear iad; mar a leaghar cèir fa chomhair an teine, sgriosar droch dhaoine am fianais Dhè.

³ Ach biodh na fìreanan aoibhneach; dèanadh iad gàirdeachas am fianais Dhè, agus biodh iad suilbhir le luath‐ghaire.

⁴ Seinnibh do Dhia, molaibh a ainm; àrdaichibh esan a tha a’ marcachd air na nèamhan le a ainm Iah, agus dèanaibh gàirdeachas na fhianais.

⁵ Athair nan dìlleachdan agus britheamh nam bantrach, is e Dia ann an ionad‐còmhnaidh a naomhachd.

⁶ Suidhichidh Dia na daoine aonaranach ann an teaghlach; bheir e a‑mach iadsan a tha ceangailte le cuibhrichean; ach gabhaidh na ceannaircich còmhnaidh ann an tìr thartmhoir.

⁷ A Dhè, nuair a chaidh thu a‑mach rod shluagh, nuair a dh’imich thu anns an fhàsach; Selah;

⁸ Chriothnaich an talamh, shil mar an ceudna na nèamhan; leagh na beanntan o làthair Dhè, Sinài sin fhèin o làthair an Tighearna, Dia Israeil.

⁹ Shil thu a‑nuas uisge gu pailt, a Dhè; air d’oighreachd, agus i sgìth, dh’fhurtaich thu.

¹⁰ Chòmhnaich do choitheanal innte; dheasaich thu, a Dhè, ded mhaitheas don bhochd.

¹¹ Chuir an Tighearna a ghuth a‑mach; bu lìonmhor cuideachd na muinntir a dh’fhoillsich e.

¹² Theich, theich rìghrean nan armailtean, agus roinn ise a dh’fhan aig an taigh a’ chreach.

¹³ Ged laigh sibh am measg choireachan, bidh sibh mar sgiathan calamain air an còmhdach le airgead, agus a iteagan le òr buidhe.

¹⁴ Nuair a sgaoil an t‑Uile‐chumhachdach rìghrean innte, bha i geal mar shneachd air Salmon.

¹⁵ Tha beinn Dhè mar bheinn Bhasain, na beinn àrd mar bheinn Bhasain.

¹⁶ Carson a leumas sibh, a bheanntan àrda? Is i seo a’ bheinn anns am miann le Dia còmhnaidh a ghabhail; seadh, còmhnaichidh an Tighearna innte gu bràth.

¹⁷ Tha carbadan Dhè nam fichead mìle, le mìltean de mhìltean aingeal; tha an Tighearna nam measg, mar ann an Sinài, anns an ionad naomh.

¹⁸ Chaidh thu suas air ionad àrd, thug thu bruid ann am braighdeanas; thug thu tìodhlacan do dhaoine, seadh, eadhon do dhaoine ceannairceach, a‑chum gun gabhadh an Tighearna còmhnaidh nam measg.

¹⁹ Beannaichte gu robh an Tighearna, a tha gach là gar cumail suas, Dia ar slàinte! Selah.

²⁰ Is e ar Dia‑ne Dia na slàinte, agus don Tighearna Dia buinidh an t‑slighe on bhàs.

²¹ Ach brisidh Dia ceann a naimhdean, claigeann greannach an fhir a dh’imicheas na pheacaidhean.

²² Thubhairt an Tighearna, Mar o Bhasan bheir mi mo shluagh air an ais; bheir mi air an ais iad mar o dhoimhneachdan na fairge;

²³ A‑chum gun tumar do chas ann am fuil do naimhdean, teanga do mhadraidh anns an nì cheudna.

²⁴ Chunnaic iad do thriall, a Dhè, triall mo Dhè, mo Rìgh, anns an ionad naomh!

²⁵ Dh’imich an luchd‐seinn air thoiseach, an luchd‐ciùil nan dèidh, am meadhon mhaighdeann a’ bualadh thiompan.

²⁶ Anns na coitheanalan beannaichibh an Tighearna Dia, an Tighearna o thobar Israeil.

²⁷ An sin tha Beniàmin beag na uachdaran orra, ceannardan Iùdah an luchd‐comhairle, ceannardan Shebuluin, ceannardan Naphtali.

²⁸ Dh’àithn do Dhia dhut do neart; neartaich, a Dhè, an nì seo a rinn thu air ar son.

²⁹ Airson do theampaill ann an Ierusalem, bheir rìghrean tìodhlac dhut.

³⁰ Smachdaich luchd nan sleagh, mòr‐chuideachd nan tarbh le laoigh an t‑sluaigh, gus an strìochd iad le mìrean airgid; sgap thusa na slòigh a ghabh tlachd den chogadh.

³¹ Thig àrd‐uaislean as an Eiphit; sìnidh Etiopia a làmhan a‑mach gu luath ri Dia.

³² A rìoghachdan na talmhainn, seinnibh do Dhia; seinnibh moladh don Tighearna: Selah:

³³ Dhàsan a tha a’ marcachd air nèamhan nan nèamh o chian! Feuch, tha e a’ cur a‑mach a ghutha, guth neirt.

³⁴ Thugaibh‐se neart do Dhia; thar Israel tha a ghlòir, agus tha a neart anns na neòil.

³⁵ Is uamhasach thusa, a Dhè, od ionadan naomha! Is e Dia Israeil a bheir neart agus treòir da shluagh. Guma beannaichte Dia!