Salm 61 - Am Bìoball Iomraidh Gàidhlig 1880 1992

1 Rinn Daibhidh ùrnaigh ri Dia, 4 agus chuir e a dhòchas na thròcair.

Don àrd‐fhear‐ciùil air Neginot . Salm le Daibhidh.

¹ Eisd, a Dhè, rim ghlaodh; thoir an aire dom ùrnaigh.

² O iomall na talmhainn èighidh mi riut, nuair a bhios mo chridhe lag; a‑chum na carraig as àirde na mi fhèin, treòraich thusa mi,

³ Oir bha thusa ad thèarmann dhomh, ad thùr làidir an aghaidh an nàmhaid.

⁴ Gabhaidh mi còmhnaidh ann ad phàillean gu bràth; cuiridh mi mo dhòigh ann an sgàil do sgiathan. Selah.

⁵ Oir chuala tusa, a Dhè, mo bhòidean; thug thu oighreachd dhaibhsan air a bheil eagal d’ainme.

⁶ Cuir thusa làithean ri làithean an rìgh; biodh a bhliadhnachan mar linn agus linn.

⁷ Maireadh e gu bràth am fianais Dhè; gleidheadh tròcair agus fìrinn e.

⁸ Mar sin seinnidh mi cliù dod ainm gu bràth, a‑chum gun dìol mi mo bhòidean o là gu là.