Salm 56 - Am Bìoball Iomraidh Gàidhlig 1880 1992

1 Rinn Daibhidh gearan a bhrìgh fòirneirt a naimhdean. 9 Chuir e an cèill a dhòchas ann am facal Dhè, agus gheall e Dia a mholadh.

Don àrd‐fhear‐ciùil air Ionatelim‐rechocim. Michtam le Daibhidh nuair a ghlac na Philistich e ann an Gat .

¹ Dèan iochd orm, a Dhè, oir b’àill le duine mo shlugadh suas; tha e gam shàrachadh gach là le cogadh.

² B’àill lem eascairdean mo shlugadh suas gach là, oir is lìonmhor iad a tha a’ cogadh rium o ionad àrd.

³ Anns an là air am bi eagal orm, earbaidh mi asadsa.

⁴ Ann an Dia molaidh mi a fhacal; ann an Dia chuir mi mo dhòigh; chan eagal leam ciod a dh’fhaodas feòil a dhèanamh orm.

⁵ Gach là tha iad a’ fiaradh mo bhriathran; tha an smuaintean uile am aghaidh a‑chum uilc.

⁶ Tha iad a’ cruinneachadh le chèile, tha iad gam falach fhèin; tha iad a’ toirt fa‑near mo cheuman nuair a tha iad a’ feitheamh airson m’anama.

⁷ Le eucoir an tèid iad as? Ann ad fheirg tilg sìos na slòigh, a Dhè.

⁸ Rinn thu mo sheachrain àireamh; cuir mo dheòir ann ad shearraig; nach eil iad ann ad leabhar?

⁹ An sin tillear mo naimhdean air an ais, anns an là a ghairmeas mi ort: air seo tha fhios agam, oir tha Dia leam.

¹⁰ Ann an Dia molaidh mi a fhacal; anns an Tighearna molaidh mi a fhacal.

¹¹ Ann an Dia chuir mi mo dhòigh; chan eagal leam ciod a dh’fhaodas duine a dhèanamh orm.

¹² Ormsa, a Dhè, tha do bhòidean; ìocaidh mi cliù dhut;

¹³ Oir shaor thu m’anam on bhàs, agus mar an ceudna mo chasan o thuisleadh, a‑chum gun gluaisinn ann ad fhianais, a Dhè, ann an solas nam beò.