Salm 53 - Am Bìoball Iomraidh Gàidhlig 1880 1992

1 Chuir Daibhidh an cèill truaillidheachd a’ chinne‐daoine. 6 Mhiannaich e slàinte an Tighearna fhaicinn.

Don àrd‐fhear‐ciùil air Mahalat. Maschil le Daibhidh.

¹ Thubhairt an t‑amadan na chridhe, Chan eil Dia ann; tha iad truaillidh, agus rinn iad aingidheachd ghràineil; chan eil neach ann a nì math.

² Dh’amhairc Dia a‑nuas o nèamh air cloinn nan daoine, a dh’fheuchainn an robh neach ann a bha glic, a bha ag iarraidh Dhè.

³ Chaidh gach aon dhiubh air ais; tha iad gu lèir air fàs salach; chan eil neach ann a nì math, chan eil eadhon aon.

⁴ Nach eil eòlas acasan a tha a’ dèanamh na h‑eucoir, a tha ag ithe suas mo shluaigh mar a dh’itheadh iad aran, agus nach gairm air Dia?

⁵ An sin ghabh iad eagal mòr, nuair nach robh adhbhar eagail ann; sgaoil Dia a chnàmhan‐san o chèile a champaich ad aghaidh; nàraich thu iad, a chionn gun do rinn Dia tàir orra.

⁶ O gun tigeadh slàinte Israeil a‑mach à Sion! An uair a bheir Dia air ais braighdeanas a shluaigh, nì Iàcob gàirdeachas, nì Israel aoibhneas.