Salm 52 - Am Bìoball Iomraidh Gàidhlig 1880 1992

1 Chronaich Daibhidh Doeg airson a mhì‐rùin, agus ro‑innis e a sgrios. 8 Thug e buidheachas do Dhia do bhrìgh gun robh dòchas aige na thròcair.

Don àrd‐fhear‐ciùil. Maschil le Daibhidh nuair a thàinig Doeg an t‑Edomach agus a dh’innis e do Shaul agus a thubhairt e ris, Thàinig Daibhidh gu taigh Ahimeleich.

¹ Carson a nì thu uaill as an olc, O ghaisgich? Mairidh maitheas Dhè a‑ghnàth.

² Dealbhaidh do theanga aimhleas, mar ealtainn ghèir, ag obrachadh ceilge.

³ Is annsa leat an t‑olc na am math, a’ bhreug na briathran a’ cheartais. Selah.

⁴ Is ionmhainn leat gach facal millteach, a theanga chealgach.

⁵ Uime sin sgriosaidh Dia thu gu bràth; bheir e air falbh thu, agus tàirngidh e as do phàillean thu, agus spìonaidh e do fhreumhan à tìr nam beò. Selah.

⁶ Agus chì na fìreanan, agus bidh eagal orra, agus nì iad gàire uime, ag ràdh,

⁷ Feuch, seo am fear nach do rinn a neart de Dhia, ach a dh’earb à pailteas a bheartais, agus a neartaich e fhèin na aingidheachd.

⁸ Ach bidh mise mar chrann‐ola uaine ann an taigh Dhè; earbaidh mi à tròcair Dhè gu saoghal nan saoghal.

⁹ Molaidh mise thu gu sìorraidh, a chionn gun do rinn thu e; agus feithidh mi air d’ainm‐sa, oir tha e math an làthair do naomh.