Salm 36 - Am Bìoball Iomraidh Gàidhlig 1880 1992

1 Euceart agus cealg nan aingidh. 5 Òirdheirceas tròcair Dhè. 10 Dh’aslaich Daibhidh air Dia gum buanaicheadh e a chaoimneas dhaibhsan a bha ionraic nan cridhe.

Don àrd‐fhear‐ciùil. Le Daibhidh, òglach an Tighearna.

¹ Is e a their an t‑aingidh an taobh a‑staigh de a chridhe, gum peacaich e; chan eil eagal Dhè fa chomhair a shùl.

² Oir nì e bàigh ris fhèin na shùilean fhèin, gus am faighear a‑mach a chionta mar adhbhar fuatha.

³ Is euceart agus cealg briathran a bheòil; leig e dheth a bhith glic, math a dhèanamh.

⁴ Dealbhaidh e euceart air a leabaidh; suidhichidh e e fhèin air slighe nach eil math; chan oillteil leis an t‑olc.

⁵ A Thighearna, anns na nèamhan tha do thròcair; tha d’fhìrinn gu ruig na neòil.

⁶ Tha d’fhìreantachd mar na beanntan àrda, do bhreitheanais nan doimhne mhòir; gleidhidh tusa, a Thighearna, duine agus ainmhidh.

⁷ Cia luachmhor do choibhneas gràdhach, a Dhè! Uime sin, earbaidh clann nan daoine à sgàil do sgiathan.

⁸ Sàsaichear iad gu mòr le saill do thaighe, agus à abhainn do shòlasan bheir thu orra òl.

⁹ Oir agadsa tha tobar na beatha; ann ad sholas‐sa chì sinne solas.

¹⁰ Buanaich do choibhneas gràidh dhaibhsan a chuir eòlas ort, agus d’fhìreantachd dhaibhsan a tha ionraic nan cridhe.

¹¹ Na tigeadh cas an àrdain orm, agus na gluaiseadh làmh nan aingidh mi.

¹² An sin thuit luchd‐dèanamh na h‑euceirt sìos; leagadh sìos iad, agus chan urrainn dhaibh èirigh.