Salm 2 - Am Bìoball Iomraidh Gàidhlig 1880 1992

1 Cumhachd agus oighreachd Chrìosd: 10 thugadh earail do bhritheamhan na talmhainn iad a dhèanamh seirbhis dha.

¹ Carson a ghabh na cinnich boile, agus a smaoinich na slòigh nì dìomhain?

² Carson a dh’èirich rìghrean na talmhainn, agus a ghabh na h‑uachdarain comhairle le chèile an aghaidh an Tighearna, agus an aghaidh a Aoin ungte‐san, ag ràdh,

³ Briseamaid o chèile an cuibhreach, agus tilgeamaid dhinn an cuing?

⁴ An tì a tha na shuidhe air nèamh, nì e gàire; nì an Tighearna fanaid orra.

⁵ An sin labhraidh e riu na fheirg, agus na chorraich cuiridh e uamhann orra.

⁶ Gidheadh dh’ung mise mo Rìgh air Sion, mo shliabh naomh‐sa.

⁷ Cuiridh mi an cèill òrdagh an Tighearna: thubhairt e rium, Is tu mo mhac‐sa; an‑diugh ghin mi thu.

⁸ Iarr orm, agus bheir mi dhut na cinnich mar oighreachd, agus crìochan na talmhainn mar sheilbh.

⁹ Brisidh tu iad le slait iarainn; mar shoitheach creadhadair, pronnaidh tu iad nam bloighdean.

¹⁰ A‑nis, matà, a rìghrean, bithibh glic; gabhaibh fòghlam, a bhritheamhan na talmhainn.

¹¹ Dèanaibh seirbhis don Tighearna le eagal, agus dèanaibh gàirdeachas le ball‐chrith.

¹² Pògaibh am Mac air eagal gum bi fearg air, agus gun sgriosar sibh anns an t‑slighe, nuair a lasas ach gu beag a chorraich. Is beannaichte iadsan uile a dh’earbas as.