Salm 149 - Am Bìoball Iomraidh Gàidhlig 1880 1992

1 Is airidh Dia air cliù airson a mhaitheis da shluagh, 6 agus airson a dhìoghaltais air na cinnich.

¹ Molaibh‐se an Tighearna. Seinnibh don Tighearna òran nuadh, seinnibh a mholadh ann an coitheanal nan naomh.

² Biodh Israel aoibhneach na Chruithear; dèanadh clann Shioin gàirdeachas nan Rìgh.

³ Moladh iad a ainm anns an dannsa; le tiompan agus le clàrsaich seinneadh iad dha.

⁴ Oir gabhaidh an Tighearna tlachd na shluagh; nì e na daoine sèimhe sgiamhach le slàinte.

⁵ Dèanadh na naoimh gàirdeachas ann an glòir; dèanadh iad iolach air an leapaichean.

⁶ Biodh àrd‐chliù Dhè nam beul, agus claidheamh dà fhaobhair nan làimh,

⁷ A‑chum dìoghaltas a dhèanamh air na cinnich, smachdachadh goirt air na slòigh;

⁸ A‑chum an rìghrean a cheangal le slabhraidhean, agus an àrd‐uaislean le geimhlean iarainn;

⁹ A‑chum am breitheanas a tha sgrìobhte a chur an gnìomh orra; tha an t‑urram seo aig a naoimh uile. Molaibh‐se an Tighearna.