Salm 140 - Am Bìoball Iomraidh Gàidhlig 1880 1992

1 Ghuidh Daibhidh gun teasairgeadh Dia e o ais‐innleachd a naimhdean. 12 Tha dòchas aige gun cùm an Tighearna ceartas ris na bochdan.

Don àrd‐fhear‐ciùil. Salm le Daibhidh.

¹ Teasairg mi, a Thighearna, on droch dhuine; o fhear an fhòirneirt glèidh mi,

² A tha a’ smaoineachadh aimhleis nan cridhe; cruinnichidh iad gach là a‑chum cogaidh.

³ Gheuraich iad an teanga, mar theanga nathrach; tha nimh na nathrach fom bilean. Selah.

⁴ Glèidh mi, a Thighearna, o làmhan nan aingidh; o fhear an fhòirneirt dìon mi, lem b’àill mo cheuman a thilgeadh bun‐os‑cionn.

⁵ Dh’fhalaich na h‑uaibhrich ribe dhomh agus cùird; sgaoil iad lìon ri taobh na slighe; leag iad ceapan‐tuislidh romham. Selah.

⁶ Thubhairt mi ris an Tighearna, Is tu mo Dhia; èisd, a Thighearna, ri guth m’athchuingean.

⁷ A Iehòbhah, a Thighearna, neart mo shlàinte, dh’fhalaich thu mo cheann ann an là a’ chatha.

⁸ Na deònaich, a Thighearna, miannan an aingidh; na soirbhich le a ais‐innleachd, air eagal gun àrdaich iad iad fhèin. Selah.

⁹ A‑thaobh nan daoine a chuartaich mi, còmhdaichidh aimhleas am bilean fhèin iad.

¹⁰ Tuitidh èibhlean teine orra; anns an teine tilgear iad; ann an slocan domhain, a‑chum nach èirich iad a‑rìs.

¹¹ Na daingnichear fear‐labhairt uilc air an talamh; sealgaidh olc air fear an fhòirneirt a‑chum a sgrios.

¹² Tha fhios agam gun cùm an Tighearna ceartas ris an duine thruagh, còir ris na bochdan.

¹³ Gu dearbh bheir na fìreanan moladh dod ainm; gabhaidh na h‑ionracain còmhnaidh ad fhianais.