Salm 14 - Am Bìoball Iomraidh Gàidhlig 1880 1992

1 Chuir Daibhidh an cèill truaillidheachd a’ chinne‐daoine; 4 agus dhearbh e an aghaidh nan aingidh o sholas an cogais fhèin.

Don àrd‐fhear‐ciùil. Salm le Daibhidh.

¹ Thubhairt an t‑amadan na chridhe, Chan eil Dia ann. Tha iad truaillidh; rinn iad obraichean gràineil; chan eil neach ann a nì math.

² Dh’amhairc an Tighearna a‑nuas o nèamh air cloinn nan daoine, a dh’fheuchainn an robh neach ann a bha glic, a bha ag iarraidh Dhè.

³ Chlaon iad uile; tha iad gu lèir air fàs salach; chan eil neach ann a nì math, chan eil eadhon aon.

⁴ Nach eil eòlas acasan uile a tha a’ dèanamh na h‑eucoir, a tha ag ithe suas mo shluaigh, mar a dh’itheadh iad aran, agus nach gairm air an Tighearna?

⁵ An sin ghabh iad eagal mòr, a chionn gu bheil Dia ann an ginealach nam fìrean.

⁶ Nàraich iad comhairle an duine bhochd, a chionn gur e an Tighearna a thèarmann.

⁷ O gun tigeadh slàinte Israeil a‑mach à Sion! Nuair a bheir an Tighearna air ais braighdeanas a shluaigh, nì Iàcob gàirdeachas, nì Israel aoibhneas.