Salm 13 - Am Bìoball Iomraidh Gàidhlig 1880 1992

1 Tha Daibhidh a’ caoidh gun do dhìochuimhnich Dia e: 3 a’ guidhe gun soillsicheadh e inntinn: 5 agus ag earbsadh ri slàinte o thròcair an Tighearna.

Don àrd‐fhear‐ciùil. Salm le Daibhidh.

¹ Cia fhad, a Thighearna, a dhìochuimhnicheas tu mi? An ann gu bràth? Cia fhad a dh’fhalaicheas tu do ghnùis uam?

² Cia fhad a ghabhas mi comhairle ann am anam, bròn ann am chridhe gach là? Cia fhad a dh’àrdaichear mo nàmhaid os mo chionn?

³ Amhairc orm, èisd rium, a Thighearna mo Dhia; soillsich mo shùilean, air eagal gun caidil mi a‑chum bàis;

⁴ Air eagal gun abair mo nàmhaid, Bhuadhaich mi na aghaidh; gun dèan m’eascairdean gàirdeachas nuair a dh’aomar mi.

⁵ Ach dh’earb mise as do thròcair; nì mo chridhe gàirdeachas ann ad shlàinte.

⁶ Seinnidh mi don Tighearna, a chionn gun do bhuin e rium gu fial, agus seinnidh mi cliù do ainm an Tighearna as ro‑àirde.