Salm 124 - Am Bìoball Iomraidh Gàidhlig 1880 1992

Bheannaich Daibhidh an Tighearna do bhrìgh gun do shaor e a shluagh uathasan a dh’èirich nan aghaidh.

Laoidh nan ceum, le Daibhidh.

¹ Mura biodh an Tighearna leinn, abradh Israel a‑nis;

² Mura biodh an Tighearna leinn, nuair a dh’èirich daoine nar n‑aghaidh;

³ An sin shluigeadh iad beò sinn, nuair a las am fearg nar n‑aghaidh;

⁴ An sin thigeadh tuiltean uisgeachan tharainn, rachadh an sruth thar ar n‑anam;

⁵ An sin rachadh na h‑uisgeachan uaibhreach thar ar n‑anam.

⁶ Beannaichte gu robh an Tighearna, nach tug sinn mar chreich dam fiaclan.

⁷ Chaidh ar n‑anam as mar eun a ribe nan eunadair; bhriseadh an ribe, agus chaidh sinn as.

⁸ Tha ar cobhair ann an ainm an Tighearna, a rinn nèamh agus talamh.