Salm 12 - Am Bìoball Iomraidh Gàidhlig 1880 1992

1 Dh’iarr Daibhidh còmhnadh o Dhia. 3 Tha e a’ gabhail misnich dha fhèin do bhrìgh gun toir Dia an t‑aingidh gu breitheanas, agus gun teasairg e na h‑ionracain.

Don àrd‐fhear‐ciùil air Seminit. Salm le Daibhidh.

¹ Cuidich leam, a Thighearna, oir chan eil duine diadhaidh ann; oir theirig na h‑ionraic o mheasg clann nan daoine.

² Labhraidh iad dìomhanas gach neach ra choimhearsnach; le bilean miodalach, le cridhe dùbailte labhraidh iad.

³ Sgathaidh an Tighearna na bilean miodalach uile, an teanga a labhras nithean mòra;

⁴ Iadsan a thubhairt, Le ar teangaidh buadhaichidh sinn; is leinn fhèin ar bilean; cò a tha na thighearna os ar cionn?

⁵ Airson fòirneart nam bochd, airson osnaich nan ainnis, a‑nis èiridh mi, arsa an Tighearna; cuiridh mi e ann an tèarainteachd uaithesan a bhagras na aghaidh.

⁶ Is briathran fìorghlan briathran an Tighearna; mar airgead air a dhearbhadh ann an àmhainn chreadha, air a ghlanadh seachd uairean.

⁷ Gleidhidh tusa sinn, a Thighearna; dìonaidh tu sinn on ghinealach seo gu bràth.

⁸ Gluaisidh na h‑aingidh air gach taobh, nuair a dh’àrdaichear iadsan as suaraiche de chloinn nan daoine.