Salm 11 - Am Bìoball Iomraidh Gàidhlig 1880 1992

1 Chuir Daibhidh a dhòchas ann an Dia. 4 Freasdal agus ceartas an Uile‐chumhachdaich.

Don àrd‐fhear‐ciùil. Salm le Daibhidh.

¹ As an Tighearna earbaidh mi. Carson a their sibh rim anam, Teich as mar eun gud shliabh?

² Oir feuch, chuir na h‑aingidh bogha air lagh; ghleus iad an saighead air sreing, a‑chum tilgeadh anns an dorchadas orrasan a tha ceart nan cridhe.

³ Ma sgriosar na bunaitean, ciod a nì am fìrean?

⁴ Tha an Tighearna na theampall naomh; tha rìgh‐chathair an Tighearna anns na nèamhan; chì a shùilean, rannsaichidh a rosgan clann nan daoine.

⁵ Rannsaichidh an Tighearna am fìrean; ach an t‑aingidh, agus esan a thug spèis do fhòirneart, is fuath le a anam.

⁶ Frasaidh e air na h‑aingidh ribeachan, teine agus pronnasg agus doineann uamhasach, mar chuibhreann an cupain.

⁷ Oir is ionmhainn leis an Tighearna cheart ceartas; amhaircidh a ghnùis air an duine ionraic.