Salm 108 - Am Bìoball Iomraidh Gàidhlig 1880 1992

1 Ghlac Daibhidh misneach gu Dia a mholadh, 5 agus dh’iarr e còmhnadh uaith a rèir a gheallaidhean.

Laoidh no Salm le Daibhidh.

¹ Tha mo chridhe deas, a Dhè; seinnidh mi agus molaidh mi, eadhon lem ghlòir.

² Mosgail, a shaltair agus a chlàrsach; mosglaidh mi fhèin moch air mhadainn.

³ Molaidh mi thu am measg nan sluagh, a Thighearna, agus seinnidh mi dhut am measg nan cinneach.

⁴ Oir is mòr do thròcair os cionn nan nèamh, agus tha d’fhìrinn gu ruig na neòil.

⁵ Bi air d’àrdachadh os cionn nan nèamh, a Dhè; agus os cionn na talmhainn uile biodh do ghlòir.

⁶ A‑chum gun teasairgear iadsan as ionmhainn leat, saor thusa led dheas‐làimh, agus èisd rium.

⁷ Labhair Dia, na naomhachd, Nì mi aoibhneas, roinnidh mi Sechem, agus tomhaisidh mi gleann Shucoit.

⁸ Is leamsa Gilead; is leamsa Manaseh; agus is e Ephraim neart mo chinn; Iùdah fear‐tabhairt mo lagha.

⁹ Is e Mòab mo shoitheach‐ionnlaid; os cionn Edoim tilgidh mi mo bhròg; thar Palestin nì mi caithreim.

¹⁰ Cò a bheir mi don bhaile dhaingnichte? Cò a threòraicheas mi gu Edom?

¹¹ Nach tusa, a Dhè? Nach tusa a thilg uat sinn, agus nach deachaidh a‑mach, a Dhè, le ar n‑armailtean?

¹² Thoir còmhnaidh dhuinn ann an airc, oir is dìomhain furtachd duine.

¹³ Trìd Dhè nì sinn treubhantas, oir saltraidh esan sìos ar naimhdean.