Mata 28 - Am Bìoball Iomraidh Gàidhlig 1880 1992

1 Tha aiseirigh Chrìosd air a’ cur an cèill do na mnathan: 9 nochd Crìosd e fhèin dhaibh. 11 Thug na h‑àrd‐shagairt airgead do na saighdearan a‑chum gun abradh iad gun do ghoideadh as an uaigh e.

¹ An dèidh na sàbaid, aig briseadh na fàire air a’ chiad là den t‑seachdain, thàinig Muire Magdalen, agus a’ Mhuire eile, a dh’fhaicinn na h‑uaighe.

² Agus, feuch, bha crith‐thalmhainn mhòr ann; oir thàinig aingeal an Tighearna a‑nuas o nèamh, agus air teachd dha, charaich e a’ chlach on doras, agus shuidh e oirre.

³ Agus bha a ghnùis mar dhealanach, agus a aodach geal mar shneachd.

⁴ Agus air eagal roimhe chriothnaich an luchd‐coimhead, agus chaidh iad an riochd mairbh.

⁵ Ach fhreagair an t‑aingeal agus thubhairt e ris na mnathan, Na biodh eagal oirbhse: oir tha fhios agam gu bheil sibh ag iarraidh Iosa, a chaidh a cheusadh.

⁶ Chan eil e an seo; oir dh’èirich e, mar a thubhairt e: thigibh, faicibh an t‑àite anns an robh an Tighearna na laighe.

⁷ Agus imichibh gu luath, agus innsibh da dheisciobail gun d’èirich e o na mairbh: agus, feuch, tha e a’ dol romhaibh do Ghalile; an sin chì sibh e; feuch, thubhairt mise ribh e.

⁸ Agus dh’imich iad gu luath on uaigh, le eagal agus mòr‐ghàirdeachas, agus ruith iad a dh’innse da dheisciobail.

⁹ Agus ag imeachd dhaibhsan a dh’innse da dheisciobail, feuch, thachair Iosa fhèin orra, ag ràdh, Fàilte dhuibh. Agus thàinig iad am fagas dha, agus rug iad air a chasan, agus rinn iad adhradh dha.

¹⁰ An sin thubhairt Iosa riu, Na biodh eagal oirbh: imichibh, abraibh rim bhràithrean iadsan a dhol do Ghalile, agus an sin chì iad mi.

¹¹ Agus nuair a bha iadsan ag imeachd, feuch, thàinig cuid den luchd‐faire don bhaile, agus nochd iad do na h‑àrd‐shagartan gach nì a thachair.

¹² Agus air cruinneachadh dhaibhsan an ceann a chèile maille ris na seanairean, agus air gabhail comhairle dhaibh, thug iad mòran airgid do na saighdearan,

¹³ Ag ràdh, Abraibh‐se gun tàinig a dheisciobail anns an oidhche, agus gun do ghoid iad e, nuair a bha sinne nar cadal.

¹⁴ Agus ma chluinneas an t‑uachdaran seo, cuiridh sinne impidh air, agus nì sinn sibhse tèarainte.

¹⁵ Agus ghabh iad an t‑airgead, agus rinn iad mar a theagaisgeadh dhaibh: agus tha a’ chainnt seo air a h‑aithris am measg nan Iùdhach gus an là‑an‑diugh.

¹⁶ An sin chaidh an t‑aon‐deisciobal‐deug do Ghalile, don bheinn far an d’òrdaich Iosa dhaibh.

¹⁷ Agus nuair a chunnaic iad e, rinn iad adhradh dha: ach bha cuid aca fo amharas.

¹⁸ Agus thàinig Iosa, agus labhair e riu, ag ràdh, Thugadh dhòmhsa gach uile chumhachd air nèamh agus air talamh.

¹⁹ Uime sin imichibh‐se, agus dèanaibh deisciobail de gach uile chinneach, gam baisteadh ann an ainm an Athar, agus a’ Mhic, agus an Spioraid Naoimh;

²⁰ A’ teagasg dhaibh na h‑uile nithean a dh’àithn mise dhuibh a choimhead. Agus, feuch, tha mise maille ribh a‑ghnàth, gu deireadh an t‑saoghail. Amen.